އިޒްރޭލު ޕާސްޕޯޓުގައި ރާއްޖެ އެތެރެވުން މަނާކުރުމަށް ހުށަހެޅި އިސްލާހުގެ މަސައްކަތް އަންނަ ފެބްރުއަރީ މަހުގެ ނިޔަލަށް ދަންމާލަން ރައްޔިތުންގެ މަޖިލީހުގެ ސަލާމަތީ ހިދުމަތްތަކާ ބެހޭ ކޮމިޓީން ނިންމައިފިއެވެ.
މިއަދާ ހަމައަށް މި އިސްލާހުގެ އެއްވެސް މަސައްކަތެއް ނުކޮށް ފަސް މަސް ވަންދެން ބޭއްވުމަށް ފަހު، ކޮމިޓީން މިއަދު ބޭއްވި ބައްދަލުވުމުގައި ނިންމާފައިވަނީ އަންނަ ފެބްރުއަރީ މަހުގެ ނިޔަލަށް މި އިސްލާހުގެ މަސައްކަތްތައް ނިންމާލުމަށެވެ.
ފެބްރުއަރީ މަހުގެ ނިޔަލަށް މަސައްކަތް ކުރިއަށް ގެންދިއުމަށް ހުށަހެޅުއްވީ ރައްޔިތުންގެ މަޖިލީހުގެ ތުޅާދޫ ދާއިރާގެ މެންބަރު އަބްދުލްހަންނާން އަބޫބަކުރެވެ. ސަބަބެއް ކަމަށް އޭނާ ވިދާޅުވީ، މި އިސްލާހާ ގުޅޭގޮތުން ކަމާބެހޭ ފަރާތްތަކާ މަޝްވަރާކުރަން ޖެހުމާއެކު، އަންނަ ޑިސެމްބަރު މަހުން ފެށިގެން ދެ މަހަށް މަޖިލީހުގެ މެންބަރުން ޗުއްޓީއަށް ދާތީ ކަމަށެވެ.
އަބްދުލްހަންނާންގެ ހުށަހެޅުމަށް ތާއީދުކުރެއްވީ މާފަންނު އުތުރު ދާއިރާގެ މެންބަރު މުހައްމަދު ނާޒިމެވެ.
ނާޒިމް ވިދާޅުވީ އިޒްރޭލުގެ ޕާސްޕޯޓު މަނާކުރުމަށް ހުށަހެޅި އިސްލާހާ ގުޅޭގޮތުން ސިޔާސީ ޕާޓީތަކާއި އެންޖީއޯތަކާއި ކަމާބެހޭ ފަރާތްތަކާ މަޝްވަރާކުރަން ޖެހޭ ކަމަށެވެ. ނަމަވެސް މި އިސްލާހު ހުށަހެޅުއްވި އިދިކޮޅު އެމްޑީޕީގެ ގަލޮޅު ދެކުނު ދާއިރާގެ މެންބަރު މީކާއީލް އަހްމަދު ނަސީމްގެ ނިޔަތާ މެދު ސުވާލު އުފައްދަވައި، އޭނާ ވަނީ މީކާއީލް މި އިސްލާހު ހުށަހެޅުއްވީ ސަރުކާރަށް ސިޔާސީ ނުފޫޒު ހިންގުމަށްޓަކައި ކަން ސިފަކުރައްވައިފައެވެ.
ނާޒިމް އިތުރަށް ވިދާޅުވީ، އިޒްރޭލުގެ ޕާސްޕޯޓުގައި ރާއްޖެ އެތެރެވުން މަނާކުރުމާ މެދު އެންމެންގެ ބަހެއް ވެސް ބޭނުންވާ ކަމަށާއި، މި ނިންމުމުގެ ސަބަބުން ރާއްޖެއަށް ކުރިމަތިވާނެ ގެއްލުންތައް ބެލުމަށް ފަހު ނޫނީ މި ނިންމުން ނިންމައިގެން ނުވާނެ ކަމަށެވެ. އެއާއެކު، ސިޔާސީ ޕާޓީތަކުގެ އިތުރުން މަޓީ އާއި އެނޫން ވެސް ގުޅުންހުރި ފަރާތްތަކާ މަޝްވަރާކޮށް މި ކަމުގައި ކުރިއަށް ދާން ނާޒިމް ހުށަހެޅުއްވިއެވެ.
