އަރަބް އިސްލާމިކް ސަމިޓުގައި ބައިވެރިވެވަޑައިގަތުމަށް ފޮރިން މިނިސްޓަރު ޑރ. އަބްދުﷲ ހަލީލް ސައުދި އަރަބިއްޔާގެ ވެރިރަށް ރިޔާދަށް ފުރާވަޑައިގެންފިއެވެ.
އެކްސްގައި ކުރެއްވި ޕޯސްޓެއްގައި ހަލީލް ވިދާޅުވީ ސައުދި އަރަބިއްޔާގެ އިސްނެގުމުގެ ދަށުން ބާއްވާ މި ސަމިޓުގައި އިސްލާމީ ގައުމުތަކަށް ކުރިމަތިވެފައިވާ ގޮންޖެހުން ތަކާއި އަދި ފަލަސްތީނުގައި އިޒްރޭލުން ހިންގަމުންދާ ގަތުލުއާއްމާއި ބެހޭ ގޮތުން މަޝްވަރާ ބައްދަލުވުންތަކުގައިވެސް ބައިވެރިވެވަޑައިގަތުމަށް ހަމަޖެހިފައިވާ ކަމަށެވެ.
ހަލީލް ވިދާޅުވީ އިސްލާމީ ގައުމުތަކުން މިކަމުގައި އެކަތި ގަނޑަކަށް ވާން ޖެހޭނެ ކަމަށާއި، ފަލަސްތީނުގައި ހިންގަމުންދާ ގަތުލުއާއްމު މިހާރުން މިހާރަށް ހުއްޓާލަން ޖެހޭ ކަމަށެވެ.
ގެންބިއާގެ ވެރިރަށް ބަންޖުލްގައި މި އަހަރުގެ މެއި މަހު ކުރިއަށް ދިޔަ އޯއައިސީގެ 15 ވަނަ އިސްލާމިކް ސަމިޓުގައި އިސްލާމިކް މިނިސްޓަރު ޑރ. މުހައްމަދު ޝަހީމް އަލީ ސައީދު ވިދާޅުވީ ފަލަސްތީނުގައި އިޒްރޭލުން ހިންގަމުންދާ ގަތުލުއާންމު ހުއްޓާލުމަށް ގޮވާލުމުގެ އިތުރުން އެކަން ތަންފީޒުކުރަން ޖެހޭނެ ކަމަށެވެ.
އޯއައިސީގެ މި ސަމިޓުގައި ޑރ. ޝަހީމް ވަނީ ފަލަސްތީނުގެ ރައްޔިތުންގެ އަސާސީ ހައްގުތައް ނިގުޅައިގަނެފައިވާކަން ފާހަގަކުރައްވާ އެ ފަރާތްތަކަށް އިންސާފު ހޯދައިދެއްވުމަށް ގޮވާލައްވާފައެވެ.
