"11 ވަނަ ނޫސްވެރިކަމުގެ އެވޯޑް"ގެ އޯޑިއޯ ވީޑިއޯ ކެޓަގަރީގެ ތަހުގީގީ ނޫސްވެރިކަމުގެ އިނާމު ދީފައި ވަނީ މޯލްޑިވްސް މީޑިއާ ކައުންސިލް(އެމްއެމްސީ)ގެ އެވޯޑް ދިނުމުގެ އުސޫލާއި މަގުސަދުތަކާ ހިލާފަށް ކަމަށް ބުނެ ހުށަހަޅާފައިވާ މައްސަލައިގެ ތަހުގީގަށް އޭންޓި ކޮރަޕްޝަން ކޮމިޝަން (އެސީސީ) އިން އެމްއެމްސީއަށް ވަދެއްޖެއެވެ.
އޭސީސީގެ މީޑިއާ އޮފިޝަލަކު ވިދާޅުވީ މި މައްސަލައާ ގުޅޭ އިތުރު މައުލޫމާތު ހޯދުމަށް މިއަދު ހެނދުނުގެ ވަގުތެއްގައި އޭސީސީގެ ޓީމަކުން އެމްއެމްސީއަށް ގޮސްފައިވާ ކަމަށެވެ.
މިދިޔަ ބުދަ ދުވަހުގެ ރޭ ބޭއްވި ނޫސްވެރިކަމުގެ އެވޯޑްގައި އޯޑިއޯ ވީޑިއޯ ކެޓަގަރީގެ ތަހުގީގީ ނޫސްވެރިކަމުގެ އިނާމު ދީފައި ވަނީ، 'އަދަދު' ނޫހުން ތައްޔާރު ކުރި 'ސްކީލާން' ރިޕޯޓަށެވެ. އެއީ ރިޔާސީ އިންތިހާބު ގާތްވެފައި ވަނިކޮށް އަދަދު ނޫހުން ނެރުނު، މިހާރުގެ ރައީސް ޑރ. މުހައްމަދު މުއިއްޒުގެ ދޮންމަންމަ ސްކީލާން އެމަނިކުފާނަށް ކުރާ ތުހުމަތުތަކެއް އެކުލެވިގެންވާ ރިޕޯޓެކެވެ،
މިދިޔަ ބުދަ ދުވަހުގެ ރޭ ބޭއްވި "11 ވަނަ ނޫސްވެރިކަމުގެ އެވޯޑްގެ" އޯޑިއޯ ވީޑިއޯ ކެޓަގަރީގެ ތަހުގީގީ ނޫސްވެރިކަމުގެ އިނާމު ދީފައި ވަނީ މޯލްޑިވްސް މީޑިއާ ކައުންސިލްގެ އެވޯޑް ދިނުމުގެ އުސޫލާއި މަގުސަދުތަކާ ހިލާފަށް ކަމަށް އެ އެވޯޑްތަކަށް އިންސާފު ކުރި ފަނޑިޔާރުން ބުނެފިއެވެ.
މި ރިޕޯޓް އެމްއެމްސީއިން ދީފައި ވަނީ އެމްއެމްސީގެ އެވޯޑް ދިނުމުގެ އުސޫލާއި މަގުސަދުތަކާ ހިލާފަށް ކަމަށް ބުނެ އެ އެވޯޑްތަކަށް އިންސާފު ކުރި ފަނޑިޔާރުންގެ ޓީމުން ވަނީ ބަޔާނެއް ނެރެފައެވެ. އެ ބަޔާނުގައި ފާހަގަކޮށްފައިވާ ގޮތުގައި ތަހުގީގީ ނޫސްވެރިކަމުގެ އެވޯޑް ދީފައިވާ އުފެއްދުމަކީ ދިވެހި މީޑިއާގެ އަހްލާގީ މިންގަނޑުގައި ބަޔާން ކޮށްފައިވާ އުސޫލުތަކަށް ބެލުމެއް ނެތި ޝާއިއު ކޮށްފައިވާ ކޮންޓެންޓެކެވެ.
