މޯލްޑިވްސް އެއާޕޯޓްސް ކޮމްޕެނީ ލިމިޓެޑް (އެމްއޭސީއެލް)ގެ އުފެއްދުންތެރިކަން އިތުރު ކުރުމުގެ ގޮތުން އެމްއޭސީއެލްއިން ދެމުންދާ އިނާޔަތްތަކަށް ބަދަލުތަކެއް ގެނެސްފިއެވެ.
މުވައްޒަފުންނަށް މިހާރު ފިކްސްޑް އެލަވަންސެއްގެ ގޮތުގައި މަހަކު ދެމުންދާ "ޕްރޮޑަކްޓިވިޓީ އިންސެންޓިވް" މުރާޖައާކޮށް، ބަދަލުތަކެއް ގެނައުމަށް އެމްއޭސީއެލްއިން ވަނީ ނިންމާފައެވެ.
އެގޮތުން މި މަހުގެ 1 ވަނަ ދުވަހުން ފެށިގެން ޕްރޮޑަކްޓިވިޓީ އިންސެންޓިވްގެ 70 ޕަސެންޓަށްވާ މިންވަރު "ހާޒިރީ އެލަވެންސް"ގެ ގޮތުގައި ހަމަޖައްސައި، އެ އެލަވެންސްއަކީ ވަޒީފާއަށް ނުކުންނަ ދުވަހުގެ އެލަވެންސެއްގެ ގޮތަށް ދިނުން އެ ކުންފުނިން ވަނީ ނިންމާފައެވެ. އަދި ޕްރޮޑަކްޓިވިޓީ އިންސެންޓިވްގެ 30 ޕަސެންޓަށްވާ މިންވަރު "ޕްރޮޑަކްޓިވިޓީ އެލަވެންސް"ގެ ގޮތުގައި ހަމަޖައްސައި، އެ އެލަވަންސްއަކީ ކޮންމެ މަހަކު ވެސް ދެވޭ ފިކްސްޑް އެލަވެންސްއެއް ގޮތަށް ދިނުމަށް ވެސް އެމްއޭސީއެލްއިން ވަނީ ނިންމާފައެވެ.
މައުލޫމާތު ލިބިފައިވާ ގޮތުގައި މިއީ މުވައްޒަފުން ފަރުވާތެރިކަމާއެކު ވަޒީފާއަށް ހާޒިރުވުމަށް ބާރު އެޅުމުގެ ގޮތުން ގެނެވުނު ބަދަލެކެވެ. އަދި މިއީ ކުންފުނީގެ އުފެއްދުންތެރިކަން އިތުރުކޮށް ލަނޑުދަނޑިތައް ހާސިލްކުރުމަށް ކުންފުނިން ކުރަމުންދާ މަސައްކަތުގެ ތެރެއިން ކުރަމުންދާ މަސައްކަތެކެވެ.
ޑޮލަރުގެ އެހީ ހިމެނޭ ގޮތަށް އެމްއޭސީއެލްއިން ދެމުންދާ އެއްވެސް އިނާޔަތަކަށް އުނިކަމެއް ނާންނާނެ ކަމުގެ ޔަގީންކަން އެމްއޭސީއެލްއިން ވަނީ އެ ކުންފުނީގެ މުވައްޒަފުންނަށް ދީފައެވެ.
