އިންގްލިޝް ޕްރިމިއާ ލީގުގައި ނިއުކާސަލް ޔުނައިޓެޑްއާ އާސަނަލް ކުޅުނު މެޗު 1-0 އިން ނިއުކާސަލް ކާމިިޔާބުކޮށްފިއެވެ.
ނިއުކާސަލްގެ ދަނޑުގައި ކުޅުނު މެޗުގައި ޖެހި ހަމައެކަނި ލަނޑު އެޓީމުން ޖަހާ ފައިވަނީ މެޗުގެ 12 ވަނައެވެ. މި ލަނޑު އެޓީމަށް ކާމިޔާބުކޮށް ދިނީ ސުވިޑަންގެ ފޯވަޑް އެލެކްޒެންޑާ އައިސެކްއެވެ.
މިމެޗުގައި އާސަނަލްއަށް މާ މޮޅު ކުޅުމެއް ނުދެއްކުނު އިރު އެޓީމަށް ޖުމްލަ އުފެއްދުނީ އެންމެ 6 ހަމަލާއެވެ. މީގެ ތެރެއިން ގޯލަށް އަމާޒުވީ އެންމެ ހަަމަލާއެކެވެ.
މި ނަތީޖާއާއެކު އާސަނަލް އެންމެ ފަހުން ކުޅުނު ތިން މެޗުން 9 ޕޮއިންޓްގެ ތެރެއިން ލިބިފައި މިވަނީ އެންމެ ޕޮއިންޓެކެވެ. މިގޮތުން، ލީގުގައި އެންމެ ފަހުން ކުޅުނު ތިން މެޗުގެ ތެރެއިން ދެ މެޗުން ބަލިވި އިރު އާސަނަލްގެ އަނެއް މެޗުވީ އެއްވަރެވެ.
10 މެޗު ކުޅެ އާސަނަލް 18 ޕޮއިންޓާއެކު ތާވަލުގެ ތިންވަނައިގައި އޮތް އިރު އެއްވަނައާ ދެވަނައިގައި އޮތް ސިޓީ އަދި ލިވަޕޫލަށް އާސަނަލްއާ 8 ޕޮއިންޓް ދުަރަށް ދިއުމުގެ ފުރުސަތު އެބައޮތެވެ.
މިއަދުގެ މެޗުން މޮޅުވި ނިއުކާސަލް މިވަނީ ތާވަލުގެ 8 ވަނައަށް އަރާފައެވެ.
