ރައްޔިތުންގެ މަޖިލީހުގެ ނައިބު ރައީސް އަދި ދިއްގަރު ދާއިރާގެ މެންބަރު އަހްމަދު ނާޒިމް ހުށަހެޅުއްވި ހުށަހެޅުއްވުން ބިލު ހުށަހެޅިއިރު އޮތް ގޮތަށް ބަދަލުކޮށް، ދުންފަތާއި ވޭޕުގެ ބާވަތްތަކުން ނަގާ ޑިއުޓީ ބޮޑުކުރަން ފާސްކޮށްފިއެވެ.
އެކްސްޕޯޓް އިމްޕޯޓް ގާނޫނަށް ސަރުކާރުގެ ފަރާތުން ހުށަހެޅި އިސްލާހުތަކަކީ ސިނގިރޭޓާއި ބިޑިންނާއި ހޫނުކޮށްގެން ބޭނުންކުރެވޭ ގޮތަށް ހުންނަ ދުންފަތުގެ އުފެއްދުންތަކުން ނަގާ އިމްޕޯޓް ޑިއުޓީ 25 ޕަސެންޓުން 50 ޕަސެންޓަށް އިތުރުކޮށް، ކޮންމެ ސިނގިރޭޓަކުންނާއި ބިޑިއަކުން ނަގާ ތިން ރުފިޔާ އަށް ރުފިޔާ އަށް ބޮޑުކުރުމަށާއި، އީ-ސިނގިރޭޓާއި ދުންފަތުގެ އިސްތިއުމާލުކުރަން ބޭނުންކުރާ އާލާތްތަކަށް އަޅާ ކެމިކަލްތަކާއި ފްލެވާތަކުން އިމްޕޯޓް ޑިއުޓީގެ ގޮތުގައި 50 ޕަސެންޓު ނަގައި ކޮންމެ މިލިލީޓަރަކަށް އަށް ރުފިޔާ އިތުރުކުރުމަށެވެ.
މީގެ އިތުރުން ދެން އެ އިސްލާހުގައި ހުށަހަޅާފައިވަނީ އީ-ސިނގިރޭޓާއި ވޭޕްކުރުމަށް ބޭނުންކުރާ އާލާތްތަކުން ނަގާ 25 ޕަސެންޓުގެ އިމްޕޯޓް ޑިއުޓީ 200 ޕަސެންޓަށް އިތުރުކޮށް، ހޫނުކޮށްގެން ބޭނުންކުރެވޭ ގޮތަށް ހުންނަ ދުންފަތުގެ އުފެއްދުންތައް އެއާ އެއްފަދަ މުދަލުގެ ބާވަތެއްގެ ގޮތުގައި ހިމެނުމަށް ވެސް ހުށަހެޅިއެވެ.
އިސްލާހު ދިރާސާކުރުމަށް މާލިއްޔަތު ކޮމިޓީ އާއި އިގްތިސޯދީ ކޮމިޓީގެ ސަބް ކޮމިޓީން ބޭއްވި ބައްދަލުވުމުގައި ނާޒިމް ހުށަހެޅުއްވީ ހީޓެޑް ޓޮބޭކޯގެ ބާވަތްތަކުން ނަގަން ސަރުކާރުން ހުށަހަޅާފައިވާ 200 ޕަސެންޓަށް އިމްޕޯޓް ޑިއުޓީ ބޮޑުކުރުމުގެ ބަދަލުގައި ޑިވައިސްގެ އަގު 200 ރުފިޔާއަށް ބޮޑުކޮށް، ކޮންމެ ސްޓިކަކުން އަށް ރުފިޔާ ނެގުމުގެ ބަދަލުގައި ކޮންމެ ގްރާމަކުން އަށް ރުފިޔާ ނަގާ ގޮތަށް ބަދަލުކުރުމަށެވެ. އަދި އެގޮތަށް ބަދަލުކުރަން ފެންނަ ކަމަށް ސަބް ކޮމިޓީން ނިންމިއެވެ.
އެކަމަކު ޕީއެންސީގެ ޕާލިމެންޓްރީ ގްރޫޕްގެ ލީޑަރު އަދި އިނގުރައިދޫ ދާއިރާގެ މެންބަރު އިބްރާހީމް ފަލާހު މުޅި މަޖިލީހުގެ ކޮމިޓީގެ އިއްޔެގެ ބައްދަލުވުމުގައި ހުށަހެޅުއްވީ ނާޒިމް ހުށަހެޅުއްވި ބަދަލުތައް އަނބުރާ ގެންގޮސް، ބިލުގައި ސަރުކާރުން ހުށަހަޅާފައިވާ ގޮތަށް ބަދަލުކުރުމަށެވެ. އަދި އެގޮތަށް ބަދަލުކޮށް ސަރުކާރުން ހުށަހެޅި ގޮތަށް ފާސްކުރަން ކޮމިޓީން އިއްޔެ ނިންމައި، ތަޅުމަށް ވަނީ ފޮނުވައިފައެވެ.
ވޭޕާއި ދުންފަތުން ނަގާ އިމްޕޯޓް ޑިއުޓީ ބޮޑުކުރުމަށް ހުށަހެޅި އިސްލާުހު ފާސްކުރުމަށް ރިޔާސަތުން ވޯޓަށް އެހުމުން، އިސްލާހު ފާސްކުރަން ނުފެންނަ ކަމަށް އެމްޑީޕީގެ އަށް މެންބަރުން ވޯޓުދެއްވިއިރު ސަރުކާރުގެ 71 މެންބަރުން ވެސް ވޯޓު ދެއްވީ އިސްލާހު ފާސްކުރަން ފެންނަ ކަމަށެވެ.
މި އިސްލާހަށް އަމަލުކުރަން މާދަމާ ފަށާނެއެވެ.
ވޭޕާއި އެއާ ގުޅޭ ތަކެތި މަނާކުރަން ސަރުކާރުން ނިންމީ މި މަހުގެ 14 ގައެވެ. އެކަން އިއުލާނުކުރައްވައި ރައީސް ޑރ. މުހައްމަދު މުއިއްޒު ވިދާޅުވީ، ވޭޕްކުރުމަށް ބޭނުންކުރާ ތަކެއްޗާއި، އެ ތަކެތީގެ ވަކިވަކި ބައިތައް އެތެރެކުރުން އަންނަ ނޮވެމްބަރު މަހުގެ 15 ވަނަ ދުވަހުން ފެށިގެން މަނާވާނެ ކަމަށާއި، ރާއްޖޭގައި ވޭޕްކުރުމަށް ބޭނުންކުރާ ތަކެތި ބޭނުންކުރުމާއި، ގެންގުޅުމާއި، އުފެއްދުމާއި، ވިއްކުމާއި، ރާއްޖޭގައި އިޝްތިހާރު ކުރުމާއި ހިލޭބެހުން އޭގެ މަހެއްހާ ދުވަސް ފަހުން މަނާވާނެ ކަމަށެވެ.
އެހެންކަމުން ވޭޕް މަނާކުރުމަށް ސަރުކާރުން ނިންމި ނިންމުން ރަސްމީކޮށް ތަންފީޒުކުރެވެން ފެށޭނީ ޑިސެމްބަރު މަހުގެ 15 ވަނަ ދުވަހުން ފެށިގެންނެވެ.
ވޭޕްގެ އިތުރުން ދުންފަތުގެ އިސްތިއުމާލުކުރުމުގެ މައްސަލައަށް ދާއިމީ ހައްލެއް ހޯދުމަށްޓަކައި މާސްޓާޕްލޭނެއް އެކުލަވާލަން ވެސް ރައީސް އިއުލާނުކުރެއްވިއެވެ. އެ މާސްޓާޕްލޭންގައި ހިމެނުމަށް ރައީސް ނިންމެވި ބައެއް ކަންކަމަކީ:
- ދުންފަތާ ދުރު މުޖުތަމައުއެއް ބިނާކުރުމަށް އިޖުތިމާއީ ގޮތުން ހަރަކާތްތެރިވާ ފަރާތްތަކަށާއި، ދުންފަތުގެ އިސްތިއުމާލުނުކުރާ ރަށްރަށް ފާހަގަކުރުމަށް އިނާމެއް ތައާރަފްކުރުން
- އެ އިނާމު ލިބޭ ރަށެއްގެ އިޖްތިމާއީ ކަމަކަށް މާލީ އެހީތެރިކަން ދިނުން
- ދުންފަތާ ދުރުހެލިވާން ބޭނުންވާ ފަރާތްތަކަށް ހާއްސަ ފަރުވާ، ކޮންމެ ރަށެއްގެ ސިއްހީ ހިދުމަތްދޭ މަރުކަޒަކުން ހިލޭ ފޯރުކޮށްދިނުން
