ސަރުކާރުގެ ފަރާތުން މިއަދު މި ހުށަހަޅާ ބަޖެޓަކީ ގައުމުގެ ތާރީހުގައި އެއް އަހަރު ދުވަހުގެ ތެރޭގައި ގެދޮރުވެރިކަމަށް ހާއްސަކޮށްގެން ސަރުކާރަކުން އެންމެ ބޮޑު ހޭދައެއް ކުރުމަށް ހުށަހަޅާފައިވާ ބަޖެޓު ކަމަށް ފިނޭންސް މިނިސްޓަރު މޫސާ ޒަމީރު ވިދާޅުވެއްޖެއެވެ.
އަންނަ އަހަރަށް ލަފާކޮށް ސަރުކާރުގެ ފަރާތުން ރައްޔިތުންގެ މަޖިލީހުގައި ބަޖެޓު ހުށަހަޅުއްވަމުން މިނިސްޓަރު ވިދާޅުވީ، ފާއިތުވި ސަރުކާރުތަކުން އާންމުން ގެދޮރުވެރިކުރުވުމަށް މަސައްކަތްތައް ކުރި ނަމަވެސް އެދެވޭ ހައްލެއް މި މައްސަލައަށް ލިބިފައިނުވާ ކަމަށެވެ.
މިއަދު ހުށަހަޅާ ބަޖެޓަކީ އާންމުން 'ގެދޮރުވެރިކުރުވާނެ' ބަޖެޓުގެ ގޮތުގައި ސިފަކުރައްވައި މިނިސްޓަރު ވިދާޅުވި ގޮތުގައި، ސަރުކާރުގެ ތަސައްވުރަކީ ގެދޮރުވެރިކަމާއި ބޯހިޔާވަހިކަމަށް އެދެވޭ ހައްލެއް ހޯދައިދީ، ދިވެހި އާބާދީގެ ބޮޑު ބަޔަކީ ގެދޮރުވެރި ބަޔަކަށް ހެދުމެވެ.
އެގޮތުން އަންނަ އަހަރުގެ ބަޖެޓު އެކުލަވާލުމުގައި އެންމެ ބޮޑު އިސްކަމެއް ދީފައި ވާނީ ސަރުކާރުގެ މި ތަސައްވުރާ އެއްގޮތަށް އާންމުން ގެދޮރުވެރި ބަޔަކަށް ހެދުމަށް ކަމަށް މިނިސްޓަރު ވިދާޅުވިއެވެ.
"ފަސް އިންސައްތަ އިންޓްރެސްޓުގައި ގެދޮރުވެރިކަމުގެ ލޯނު ދޫކުރުމަށް އެއް ބިލިއަން ރުފިޔާ މި ބަޖެޓުގައި ހިމަނާފައިވާ އިރު، މި ފައިސާ ބޭނުންކޮށްގެން ރާއްޖޭގެ ބޭންކުތައް މެދުވެރިކޮށް މަދުވެގެން ދެ ބިލިއަން ރުފިޔާގެ ހައުސިން ލޯނު ދެވޭނެ މަގު ވެސް ފަހިވެގެންދާނެ. މީގެ އިތުރުން 1.8 ބިލިއަން ރުފިޔާގެ ޖާގަ ގެދޮރުވެރިކަމުގެ އާ ޕީއެސްއައިޕީ މަޝްރޫއުތައް ހިންގުމަށް ކަނޑައަޅާފައިވާނެ،" މިނިސްޓަރު ވިދާޅުވިއެވެ.
އެހެންކަމުން އަންނަ އަހަރަށް ލަފާކޮށް ހުށަހެޅި މި ބަޖެޓަކީ މި ގައުމުގެ ތާރީހުގައި ގެދޮރުވެރިކަމަށް ހާއްސަކޮށްގެން ސަރުކާރަކުން އެންމެ ބޮޑު ހޭދައެއް ކުރުމަށް ހުށަހަޅާފައިވާ ބަޖެޓު ކަމަށް ވެސް މިނިސްޓަރު ވިދާޅުވިއެވެ.
"މި ދެ ސިޔާސަތުގެ ސަބަބުން، މާތްﷲ ގެ ވާގިފުޅާ އެކު 2025 ވަނަ އަހަރު ވެގެންދާނީ ގެދޮރުވެރިކަމުގެ ރަން ޒަމާނެއްގެ ފެށުމަށް، ވީމާ، 2025 ވަނަ އަހަރުގެ ބަޖެޓަކީ ހަގީގީ މާނައިގައިވެސް ގެދޮރުވެރިކަމުގެ ބަޖެޓެއް،"
