މި އަހަރުގެ ތިން ވަނަ ކުއާޓާ ނިންމާލި އިރު، ސްޓޭޓް ޓްރޭޑިން އޯގަނައިޒޭޝަން (އެސްޓީއޯ) އަށް ޖުމްލަ އާމްދަނީގެ ގޮތުގައި 3.6 ބިލިއަން ރުފިޔާ ހޯދައިފިއެވެ.
މިއަދު އެސްޓީއޯ އިން އާންމުކުރި ތިންވަނަ ކުއާޓާގެ މާލީ ރިޕޯޓުގައި ބުނާ ގޮތުގައި ޖުމްލަ އާމްދަނީގެ ގޮތުގައި 3.6 ބިލިއަން ރުފިޔާ ލިބިފައިވާ އިރު، މިއީ މީގެ ކުރީ ކުއާޓާއާ އަޅާ ބަލާއިރު 3 ޕަސެންޓްގެ ކުރިއެރުމެކެވެ.
އެސްޓީއޯ އިން ބުނީ، ޖުމްލަ އާމްދަނީ އިތުރުވުމުގެ މައިގަނޑު ސަބަބަކީ ކުންފުނިން ކުރަމުންގެންދާ ވިޔަފާރި ރަނގަޅު ވެފައިވުން ކަމަށެވެ. އާމްދަނީ އިތުރުވުމާއެކު ޖުމްލަ ފައިދާގެ ގޮތުގައި ތިންވަނަ ކުއާޓާގައި ވަނީ 592 މިލިއަން ރުފިޔާ ލިބިފައެވެ. މިއީ މީގެ ކުރީ ކުއާޓާއާ އަޅާ ބަލާއިރު 15 ޕަސެންޓްގެ ކުރިއެރުމެކެވެ.
އެ ކުންފުނީގެ ޕްރޮވިޝަންސް އިތުރުވުމާއެކު ހަރަދު އިތުރުވީ ނަމަވެސް ކުންފުނީގެ ޖުމްލަ ފައިދާ އިތުރުވުމާއެކު މި ކުއާޓާގެ ހިންގުމުގެ ފައިދާގެ ގޮތުގައި ވަނީ 251 މިލިއަން ރުފިޔާ ލިބިފައެވެ. މިއީ މީގެ ކުރީ ކުއާޓާއާ އަޅާ ބަލާއިރު 23 ޕަސެންޓްގެ ކުރިއެރުމެކެވެ.
ޓެކްސްއަށް ކެނޑުމުގެ ކުރިން މިކުއާޓާގެ ސާފު ފައިދާއަކީ 198 މިލިއަން ރުފިޔާއެވެ. މިއީ މީގެ ކުރީ ކުއާޓާއާ އަޅާ ބަލާއިރު 12 ޕަސެންޓްގެ ކުރިއެރުމެކެވެ. މީގެ މައިގަނޑު ސަބަބަކީ، ކުންފުނިން ކުރަމުން ގެންދާ ވިޔަފާރިތައް ރަނގަޅުކުރެވި ޖުމްލަ ފައިދާ އިތުރުވެފައިވުން ކަމަށް އެސްޓީއޯ އިން ބުނެއެވެ. ޓެކުހަށް ކެނޑުމަށްފަހު މި ކުއާޓާގެ ސާފު ފައިދާގެ ގޮތުގައި ވަނީ 156 މިލިއަން ރުފިޔާ ލިބިފައެވެ.
