ކ. އަތޮޅު ތިލަފުށީ ކުޑަގިރި ފަރަށް ބޯޓެއް އެރުމާގުޅިގެން، ފަރަށް ލިބުނު ގެއްލުމުގެ ބަދަލެއްގެ ގޮތުން ދައްކަން ޖެހޭ 3 މިލިއަން ރުފިޔާ، ދެއްކުމަށް "އޭއެމް އެމްއެސްވީ. މަރިޔާ ސިންތަޔަތިރައި ރިޔަނަ" ނަމަކަށް ކިޔާ ބޯޓުގެ ވެރިފަރާތްކަމުގައިވާ ސމތ.ޓ.ޖެސިންތުގެ އައިރު ހާޒިރުގައި ސިވިލް ކޯޓުން ހުކުންކޮށްފިއެވެ.
"އޭއެމް އެމްއެސްވީ. މަރިޔާ ސިންތަޔަތިރައި ރިޔަނަ" ނަމަކަށް ކިޔާ ބޯޓު ކ. އަތޮޅު ތިލަފުށީ ކުޑަގިރިއަށް އެރީ ޖެނުއަރީ 31، 2023ގައެވެ. އީޕީއޭއިން އެއުޅަނދު 3 މިލިއަން ރުފިޔާއިން ޖޫރިމަނާ ކޮށްފައިވާއިރު ޖޫރިމަނާގެ ފައިސާ 30 ދުވަހުގެ ތެރޭގައި ދެއްކުމަށް އުޅަނދުގެ ވެރިފަރާތަށް މީގެ ކުރިންވެސް ވަނީ ހުކުންކޮށްފައެވެ. ޖޫރިމަނާ ފައިސާ ދައްކާފައިނުވާތީ ވަގުތީ އަމުރެއް ނެރެދިނުމަށް އީޕީއޭއިން އެދިގެން އެ ބޯޓު ފުރުން މަނާކޮށް ސިވިލް ކޯޓުންވަނީ މީގެ ކުރިން ވަނީ އަމުރެއްވެސް ނެރެފައެވެ.
ސިވިލް ކޯޓުން ކުރި ހުކުމާއި އެއްގޮތަށް މި ފައިސާ ދައްކާފައި ނުވާތީ ދައުލަތުން ވަނީ ދެވަނަ ފަހަރަށްވެސް މި ފައިސާ ހޯދުމަށް ސިވިލް ކޯޓަށް މައްސަލަ ހުށަހަޅާފައެވެ. މި މައްސަލައިގައި ހުކުމުގައި އިއްޔެ ސިވިލް ކޯޓުން ބުނެފައިވަނީ ދައުވާ ލިބޭ ފަރާތަކީ ބޯޓުގެ ވެރިފަރާތްކަމުގައިވާ ސމތ.ޓ.ޖެސިންތު އާއި ބޯޓުގެ ރާއްޖޭގެ އެޖެންޓު ބިގްވޭވް ޕްރައިވެޓް ލިމިޓެޑްކަން ހިމަނާފައިވީ ނަމަވެސް ބޯޓު ފަރަށް އެރުމުން އީޕީއޭއިން ދައުވާކޮށްފައިވަނީ ބޯޓުގެ ވެރިފަރާތްކަމުގައިވާ ސމތ.ޓ.ޖެސިންތު ކަން އެނގެން އޮތްކަމަށެވެ. އަދި މި މައްސަލައިގައި ދައުވާއަށް ޖަވާބު ދިނުމަށް ސމތ.ޓ.ޖެސިންތުއަށް ދީފައިވާ މުއްދަތުގެ ތެރޭގައި ދައުވާ ޖަވާބުދީފައި ނުވާކަމަށް ކޯޓުން ކުރި ހުކުމުގައި ވަނީ ފާހަގަކޮށްފައެވެ.
އެހެންކަމުން އިއްޔެ ސިވިލް ކޯޓުން އޭނާގެ އައިރު ހާޒިރުގައި ކުރި ހުކުމުގައި ބުނީ އޮކްޓޯބަރު 30، 2024 ވަނަ ދުވަހުން ފެށިގެން 14 ދުވަހުގެ ތެރޭގައި 30،98710 ރުފިޔާ ދެއްކުމަށް ސމތ.ޓ.ޖެސިންތު ގެ މައްޗަށް ހުކުމްކޮށްފައެވެ.
