ފެނަކަ ކޯޕަރޭޝަންގެ ކުރިގެ މެނޭޖިން ޑިރެކްޓަރު، އަހުމަދު ސައީދުގެ ޕާސްޕޯޓް ހިފަހައްޓައިފިއެވެ.
އޭނާގެ ޕާސްޕޯޓް ހިފެހެއްޓީ އެންޓި ކޮރަޕްޝަން ކޮމިޝަނުން ބަލަމުންދާ މައްސަލައަކާ ގުޅިގެން ކަމަށް އެ ކޮމިޝަނުން މި ނޫހަށް ވަނީ ކަށަވަރު ކޮށްދީފައެވެ.
"ދަ ޕްރެސް" އަށް މައުލޫމާތު ދެމުން އޭސީސީން ބުނީ، ސައީދުގެ ޕާސްޕޯޓު ހިފަހައްޓާފައި ވަނީ މި މަހުގެ 9 ވަނަ ދުވަހު ކަމަށެވެ. ނަމަވެސް އެއީ ބަލަމުންދާ މައްސަލައަކަށް ވުމާއެކު އިތުރު މައުލޫމާތު ހިއްސާ ކުރެވެން ނެތް ކަމަށް އެ ކޮމިޝަނުން ވަނީ މައުލޫމާތު ދީފައެވެ.
މިދިޔަ ސަރުކާރުން ފެނަކަ އެމްޑީގެ މަގާމު އަދާކޮށްފައިވާ ސައީދުއަށް ވަނީ ގިނަ ކޮރަޕްޝަންގެ ތުހުމަތުތަކެއް އަމާޒުވެފައެވެ.
ފެނަކައިގެ ކުރީގެ މެނޭޖްމަންޓުން ކޮރަޕްޝަނަށް މަގުފަހިވާގޮތަށް ހަވާލުކޮށްފައިހުރި 25 މަޝްރޫއެއްގެ މައްސަލަ އެންޓި ކޮރަޕްޝަން ކޮމިޝަނަށް މި ސަރުކާރުން ހުށަހަޅާފައިވާއިރު ވަކި ބަޔަކަށް ފައިދާ ވާގޮތަށް ފެނަކައިން މަޝްރޫއުތައް ހަވާލުކޮށްފައިވާކަމަށް ބުނެ ސައީދުގެ މައްޗަށް ވަނީ ގިނަ ތުހުމަތުތަކެއް ކޮށްފައެވެ.
އެގޮތުން މި ސަރުކާރުން ވެރިކަމާ ހަވާލުވުމަށްފަހު ބޭއްވި ނޫސްވެރިންގެ ބައްދަލުވުމުގައި ފެނަކައިގެ މިހާރުގެ މެނޭޖިންގް ޑިރެކްޓަރު، މުއާޒް މުހައްމަދު ރަޝީދު ވިދާޅުވީ ކުންފުނީގެ ހާލަތު ވަރަށް ދަށްވެފައިވާ ކަމަށާއި މިހާރު އޮތް ހާލަތުން އޮޕަރޭޝަންގެ ކަންތައްތަކަށް ވެސް ބުރޫ އަރާފަދަ ދަރަޖައަށް ވެއްޓިފައިވާ ކަމަށެވެ.
އެގޮތުން ކުންފުނީގެ ދަރަނި 871 މިލިއަން ރުފިޔާ އަށް އަރާ ކަމަށާއި، އެކިފަރާތްތަކަށް ދޭންޖެހޭ ފައިސާގެ ގޮތުގައި 3.2 ބިލިއަން ރުފިޔާ [ޖުމްލަ 4.16 ބިލިއަން ރުފިޔާ] ދަރަނީގެ ގޮތުގައި ދައްކަންޖެހޭ ކަމަށް މުއާޒް ވަނީ ވިދާޅުވެފައެވެ.
ޒަމާނުއްސުރެވެސް ފެނަކައަކީ ކޮރަޕްޝަންގެ އެތައް ތުހުމަތުތަކެއް ކުރަމުންދާ ކުންފުންޏަކަށްވާއިރު މީގެ ކުރިން ސައީދު ވަނީ އޭނާއަށް ކުރެވޭ ތުހުމަތުތައް އިންކާރުކޮށްފައެވެ.
