ކުރީގެ ނައިބު ރައީސް އަބްދުﷲ ޖިހާދުގެ މައްސަލައިގެ އިސްތިއުނާފު ހުށަހަޅަން ޕްރޮސެކިއުޓާ ޖެނެރަލް (ޕީޖީ) އޮފީހަށް ދިން މުއްދަތުގައި އެކަން ކޮށްފައި ނުވާތީ އެ މައްސަލަ ބަލައިނުގަތުމަށް ހައި ކޯޓުން ނިންމައިފިއެވެ.
މިހާރު މޯލްޑިވްސް އިންޓަނޭޝަނަލް ފައިނޭންޝަލް ސާވިސަސް އޮތޯރިޓީގެ ޗެއާޕާސަން ޖިހާދުގެ މައްސަލަ މިދިޔަ މަހުގެ 27 ވަނަ ދުވަހު ޕީޖީ އޮފީހުން ހައި ކޯޓަށް ފޮނުވި ނަމަވެސް ހައިކޯޓުން އެ މައްސަލަ ބޭރުކޮށްލީ ޖިހާދު ދިރިއުޅުއްވާ ގޭގެ އެޑްރެސް ސާފު ނުކުރެވޭތީ ޗިޓު ހަވާލު ނުކުރެވިގެންނެވެ. އަދި އެ މައްސަލަ އަނބުރާ ފޮނުވައިލީ އަލުން ހުށަހެޅޭ ގޮތަށް 15 ދުވަހުގެ ފުރުސަތެއް ދީފައެވެ.
މިމަހުގެ 15 ވަނަ ދުވަހު އަލުން، މި މައްސަލައިގެ ލިޔެކިއުންތަކާއި އެކު ދައުވާތައް ހައިކޯޓަށް ހުށަހަޅާފައިވާއިރު އިއްޔެ ހައި ކޯޓުން ނިންމި ނިންމުމުގައި ބުނީ، ޖިހާދުގެ މައްސަލަ އަލުން ހުށަހެޅުމަށް ޕީޖީއަށް ދިން ފުރުސަތު މިމަހުގެ 13 އަށް ހަމަވެފައިވާ ކަމަށެވެ. ނަމަވެސް، ޕީޖީން ޖިހާދުގެ މައްސަލައިގެ އިސްތިއުނާފު އަލުން ހުށަހެޅީ އެ ކޯޓުން ދިން މުއްދަތުގެ ދެ ދުވަސް ފަހުން ކަމަށްވާތީ، އެ މައްސަލަ އެ ކޯޓަށް ބަލައިނުގަތުމަށް ނިންމާފައިވާކަމަށް ހައިކޯޓުން ވަނީ ބުނެފައެވެ.
ޖިހާދުގެ މައްޗަށް ޕީޖީއިން ކޮށްފައިވަ ދައުވާއަކީ ފުށިދިއްގަރުފަޅު ސްޕެޝަލް ޓުއަރިސްޓް ޒޯނެއްގެ ގޮތުގައި ތަރައްގީ ކުރުމަށް ޖެނުއަރީ، 2013، ގައި ފައިނޭންސް މިނިސްޓަރަކަށް ހުންނަވައި ޖިހާދު ސޮއި ކުރެއްވި މައްސަލައިގައެވެ.
