2024 ވަނަ އަހަރުގެ އެންމެ މޮޅު ޓީމުގެ އެވޯޑް ސްޕެއިންގެ ރިއާލް މެޑްރިޑްއަށް ލިބިއްޖެއެވެ. ރޭ ފްރާންސްގެ ޕެރިސްގައި ބޭއްވި ބެލަންޑޯ ހަފްލާގައި މި އިނާމް ރިއާލްއަށް ދޭން އިއުލާނުކުރި ނަމަވެސް ރިއާލުން ވަނީ ރޭގެ ހަފްލާ ބޮއިކޮޓް ކޮށްފައެވެ.
މި ގޮތުން، ރޭގެ ހަފްލާއަށް އެޓީމުގެ އެއްވެސް ކުޅުންތެރިއެއް ވެސް އަދި އޮފިޝަލެއް ވެސް ގޮސްފައި ނުވާ އިރު ރިއާލްއިން ހަފްލާ ބޮއިކޮޓް ކުރީ އަހަރުގެ އެންމެ މޮޅު ކުޅުންތެރިޔާގެ އެވޯޑް އެޓީމުގެ ފޯވަޑް ވިނީސިއަސް ޖޫނިއާއަށް ނުލިބޭނެ ކަން ކުރިން އެނގުމުން ކަމަށް ބޭރުގެ މީޑިއާތަކުން ވަނީ ރިޕޯޓްކޮށްފައެވެ.
މިދިޔަ ސީޒަންގެ ލަ ލީގާ އަދި ޗެމްޕިއަންސް ލީގު ހޯދި ރިއާލްއިން ބުނީ އެޓީމަށް އިހްތިރާމް ނުކުރާ ތަނަކަށް އެޓީމުގެ ކުޅުންތެރިން އަދި އޮފިޝަލުން ވެސް ނުދާނެ ކަމަށެވެ.
އެންމެ މޮޅު ޓީމުގެ އިތުރުން ރިއާލްގެ ކޯޗު ކާލޯ އެންޗޮލާޓީއަށް ވަނީ އަހަރުގެ އެންމެ މޮޅު ކޯޗުގެ އިނާމްވެސް ލިބިފައެވެ. އަދި މިހާރު ރިއާލް އަށް ކުޅޭ ފްރާންސްގެ ކެޕްޓަން ކިލިއަން އަމްބާޕޭއަށް ވަނީ ޔޫރަޕްގައި އެންމެ ގިނަ ގޯލު ޖެހި ކުޅުންތެރިއަކަށްދޭ ގާޑް މުލާ އިނާމް ވެސް ލިބިފައެވެ. މި އިނާމްތަކާ ވެސް ރިއާލްއިން ހަވާލުނުވެއެވެ.
ރޭގެ ހަފްލާގައި އިނގިރޭސި އަދި ބަޔާން މިއުނިކްގެ ފޯވަޑް ހެރީ ކޭންއަށް ވެސް ވަނީ ގާޑް މުލާ އެވޯޑް ލިބިފައެވެ. މިދިޔަ ސީޒަންގައި ބަޔާންއާ ގުޅުނު ކޭން އަދި މިދިޔަ ސީޒަންގައި ފްރާންްސްގެ ޕީއެސްޖީއަށް ކުޅުނު އެމްޕާބޭ ވެސް ވަނީ ޖުމްލަ 44 ލަނޑު ޖަހާފައެވެ.
މިދިޔަ ސީޒަންގެ އެންމެ މޮޅު ޒުވާން ކުޅުންތެރިއަކަށް ހޮވުނީ ސްޕެއިން އަދި ބާސަލޯނާގެ ފޯވާޑް ލަމީން ޔަމާލްއެވެ. އަދި އެންމެ މޮޅު ގޯލް ކީޕަރަކަށް ހޮވުނީ އާޖެންޓީނާ އަދި އެސްޓަން ވިލާގެ އެމީ މާޓީނޭޒްއެވެ.
