2024 ވަނަ އަހަރުގެ އެންމެ މޮޅު ފިރިހެން ފުޓްބޯޅަ ކުޅުންތެރިޔަކަށް ސްޕެއިން އަދި މެންޗެސްޓާ ސިޓީގެ މިޑްފީލްޑަރު ރޮޑްރީ ހޮވިއްޖެއެވެ. މިއާއެކު ރޮޑްރީއަށް ރޭ ވަނީ އެންމެ މޮޅު ކުޅުންތެރިޔާއަށް ދޭ ބެލެންޑޯ އެވޯޑް ރޭ އޮތް އިނާމު ދިނުމުގެ ހަފްލާގައި ހަވާލުކޮށްފައެވެ.
މިއީ ސިޓީގެ ކުޅުންތެރިއަކަށް މި އިނާމް ލިބުނު ފުރަތަމަ ފަހަރެވެ. މިދިޔަ ސީޒަންގައި ސިޓީން ހޯދި ތިން ތަށި ކާމިޔާބުކުރުމުގައި ވެސް ރޮޑްރީ މުހިންމު ދައުރެއް އަދާކޮށްފައިވާ އިރު މިއަހަރު އޮތް ޔޫރޯ 2024 ސްޕެއިންއަށް ހޯދައި ދިނުމުގައި ވެސް ރޮޑްރީގެ ރޯލު ބޮޑެވެ.
މި ސީޒަންގެ ކުރީ ކޮޅު ކަކުލަށް ސީރިއަސް އަނިޔާއެއް އޮޕަރޭޝަނެއްކޮށްފައިވާ ރޮޑްރީ ރޭގެ ހަފްލާއަށް ދިޔައީ ވެސް ދަނޑިގަނޑު ޖަހައިގެންނެވެ.
އިނާމާ ހަވާލުވުމަށް ފަހު ރޮޑްރީ ބުނީ މިއީ އޭނާ އަށާ، އޭނާގެ އާއިލާ އަދި އޭނާގެ ގައުމަށް ވެސް ވަރަށް ހާއްސަ ދުވަހެއް ކަމަށެވެ. އަދި މިއީ ސްޕެއިންއިން މީގެ ކުރިން އުފެދިގެން އައި މޮޅު އެހެން ނަމަވެސް މި އިނާމް ނުލިބުނު ކުޅުންތެރިންނަށް ލިބޭ ވެސް ޝަރަފެއް ކަމަށް ރޮޑްރީ ބުންޏެވެ. މިކުޅުންތެރިންގެ ތެރޭގައި އެންޑްރިއަސް އިނިއެސްޓާ، ޒަވީ ހަނާންޑޭޒް، ސާޖިއޯ ބުސްކޭޓްސް، އައިކޭ ކާސިއާސް ފަދަ ސްޕެއިންގެ މޮޅު ކުޅުންތެރިން ރޮޑްރީ ފާހަގަކުރިއެވެ.
މި އަހަރުގެ ދެވަނައަށް އެންމެ މޮޅުކުޅުންތެރިއަކަށް ހޮވުނީި ބްރެޒިލް އަދި ރިއާލް މެޑްރިޑްގެ ފޯވަޑް ވިނީސިއަސް ޖޫނިއާއެވެ. އަދި ތިން ވަނަ ލިބުނީ ހަމަ އެޓީމުގެ އިނގިރޭސި މިޑްފީލްޑަރު ޖޫޑް ބެލިންގްހަމްއަށެވެ. މިއީ 2005 ވަނަ އަހަރުގެ ފަހުން ބެލެންޑޯގެ ގަދަ 3 ގައި އިނގިރޭސި ކުޅުންތެރިއަކު ހިމެނުނު ފުރަތަމަ ފަހަރެވެ.
2024 ވަނަ އަހަރުގެ އެންމެ މޮޅު އަންހެން ކުޅުންތެރިއަކަށް ހޮވުނީި ސްޕެއިން އަދި ބާސަލޯނާގެ ފޯވަޑް އައިތާނާ ބޮންމާތީއެވެ. އޭނާ މިވަނީ މި އިނާމް ޖެހިޖެހިގެން ދެވަނަ ފަހަރު ހޯދާފައެވެ.
