ޑެޕިއުޓީ ޕްރޮސެކިއުޓާ ޖެނެރަލްގެ މަގާމުގައި ހުންނެވި އަލީ ސަމީރު އެ މަގާމުން އިސްތިއުފާ ދެއްވައިފިއެވެ.
ހައި ކޯޓުގެ ފަނޑިޔާރު ކަމުގައި 10 އަހަރަށް ވުރެ ގިނަ ދުވަސް އަދި އޭގެ ކުރިން ސިވިލް ކޯޓުގެ އިސްގާޒީ ކަން ވެސް ކުރެއްވި ސަމީރު ފޭސްބުކްގައި ކުރެއްވި ޕޯސްޓެއްގައި ވިދާޅުވީ އިއްޔެއަކީ ޕީޖީ އޮފީހުގައި އޭނާގެ އެންމެ ފަހު ދުވަސް ކަމަށެވެ. އެހެންވެ، އެކުގައި މަސައްކަތްކުރި އެންމެންނަށް އޭނާ ވަނީ ޝުކުރުއަދާކޮށްފައެވެ. އަދި ކުރިއަށް ހުރި މަސައްކަތާ މެދު ބޮޑު އުއްމީދެއް އެބައޮތް ކަމަށް ސަމީރު ވިދާޅުވިއެވެ.
ޑެޕިއުޓީ ޕްރޮސެކިއުޓާ ޖެނެރަލްގެ މަގާމަށް ސަމީރު އައްޔަން ކުރީ މޭ، 2022 ގައެވެ. ފަނޑިޔާރުކަމުގައި 15 އަހަރަށްވުރެ ދިގު މުއްދަތަކަށް ހިދުމަތްކުރެއްވި ސަމީރަކީ މިސްރުގެ އަލްއަޒުހަރު ޔުނިވާސިޓީއިން ޝަރީއަތާއި ގާނޫނުގެ ރޮނގުން މަތީ ތައުލީމު ހާސިލުކުރެއްވާފައިވާ ބޭފުޅެކެވެ. މީގެ އިތުރުން އޭނާވަނީ މެލޭޝިޔާގެ އިންޓާނޭޝަނަލް އިސްލާމިކް ޔުނިވާސިޓީން ކޮމްޕަރޭޓިވް ލޯ އިން މާސްޓާސް ޑިގްރީ ހާސިލުކުރައްވާފައެވެ.
ޑެޕިއުޓީ ޕީޖީ ކަމަށް ބޭފުޅުން އައްޔަންކުރަނީ ޕްރޮސެކިއުޓާ ޖެނެރަލެެވެ. ސަމީރު އިސްތިއުފާ ދެއްވުމާ އެކު ޑެޕިއުޓީ ޕީޖީ ކަމުގައި ހުންނަވާނީ މަހުމޫދު ސަލީމް އެކަންޏެވެ.
