ޔުނައިޓެޑް އަރަބް އެމިރޭޓްސްގެ ޝާރްޖާއިން ވެލާނާ އިންޓަނޭޝަނަލް އެއާޕޯޓް (ވީއައިއޭ) އަށް އެއާ އެރޭބިއާގެ ސީދާ ދަތުރުތައް މިއަދު ފަށައިފިއެވެ.
އެއާ އެރޭބިއާގެ ފުރަތަމަ ފްލައިޓް މިއަދު މެންދުރު ފަހު 1:28 ގައި ވީއައޭގައި ވަނީ ޖައްސާފައެވެ. މި ފްލައިޓަށް މަރުހަބާ ކިޔުމުގެ ގޮތުން ހާއްސަ މިއަދު ހާއްސަ ރަސްމިއްޔާތެއް ވަނީ ބާއްވާފައެވެ.
މި ރަސްމިއްޔާތުގައި ރާއްޖެއިން ޔުނައިޓެޑް އަރަބް އެމިރޭޓްސްއަށް ކަނޑައަޅާފައިވާ ޑެޕިއުޓީ އެމްބެސަޑާ ހަސަން ވަހީދު، އެއާ އެރޭބިއާގެ ޔޫއޭއީގެ އޭރިއާ މެނޭޖާ ޝަހްޒަދް ނަގްވީ، އެމްއޭސީއެލްގެ ސީއީއޯ އަދި އެމްޑީ އިބްރާހިމް ޝަރީފް މުހައްމަދު، ޑެޕިއުޓީ އެމްޑީ މުހައްމަދު ލަމްއާން، ޑެޕިއުޓީ އެމްޑީ މުޖުތަބާ ލަތީފްގެ އިތުރުން ކުންފުނީގެ އިސްބޭފުޅުންނާއި ސްޓޭކްހޯލްޑަރުން ބައިވެރިވެވަޑައިގެންނެވިއެވެ.
މި ރަސްމިއްޔާތުގައި ވާޙަކަ ދައްކަވަމުން އެމްއޭސީއެލްގެ އެމްޑީ ޝަރީފް ވިދާޅުވީ، ވެލާނާ އިންޓަނޭޝަނަލް އެއާޕޯޓާއި ޝާރްޖާއާ ދެމެދު ސީދާ ދަތުރުތައް ފެށުމަކީ މެދުއިރުމަތީގެ އިތުރުން ދުނިޔޭގެ ގިނަ ސިޓީތަކާއި ރާއްޖެއާ ދެމެދު ފަސޭހައިން ދަތުރު ކުރެވޭނެ މަގު ހުޅުވިގެންދާނެ ކަމެއް ކަމަށެވެ. އަދި މިގޮތަށް އުފެދޭ އިތުރު ކޮންމެ ކަނެކްޝަނަކާއެކު ސަރަހައްދީ ވައިގެ ދަތުރުފަތުރާއި ދުނިޔޭގެ މި ސިނާއަތުގައި ވެސް ވެލާނާ އިންޓަނޭޝަނަލް އެއާޕޯޓްގެ މަގާމު ރަނގަޅު ވެގެން ދާނެ ކަމަށެވެ.
އެއާ އެރޭބިއާގެ މި ފްލައިޓަކީ ޝާރްޖާއިން ދިވެހި ރާއްޖެއައް ސީދާ ދަތުރުކުރަން ހަމަޖެހިފައިވާ ފުރަތަމަ ފްލައިޓްއެވެ. ޝާރްޖާއާއި ވީއައިއޭ އާ ދެމެދު އެއާ އެރޭބިއާއިން ދުވާލަކު ފްލައިޓެއް އޮޕަރޭޓްކުރުމަށް ވަނީ ނިންމާފައެވެ. މިދަތުރުތަކުގައި ބޭނުންކުރާނީ އެއާބަސް އޭ320 މަރުކާގެ މަތިންދާ ބޯޓެވެ.
އެއާ އެރޭބިއާއަކީ މެދުއިރުމައްޗާއި އުތުރު އެފްރިކާ ސަރަހައްދުގެ ފުރަތަމަ އަދި އެންމެ ބޮޑު ލޯ-ކޮސްޓް ކެރިއާއެވެ. މި އެއާލައިނުން މެދުއިރުމަތި، އުތުރުއެފްރިކާ، އޭޝިއާ އަދި ޔޫރަޕްގެ 170 އަށްވުރެ ގިނަ މަންޒިލަށް ދަތުރުކުރެއެވެ.
