ވެލާނާ އިންޓަނޭޝަނަލް އެއާޕޯޓް (ވީއައިއޭ) ހިންގާ މޯލްޑިވްސް އެއާޕޯޓްސް ކޮމްޕެނީ ލިމިޓެޑް (އެމްއޭސީއެލް)ގެ ބޯޑުން އިބްރާހިމް ނޫރައްދީން ވަކިކޮށްފިއެވެ.
މިދިޔަ ބުރާސްފަތި ދުވަހު އެ ކުންފުނީގެ ބޯޑުން އިބްރާހީމް ނޫރައްދީން ވަކިކޮށްފައިވާއިރު، އެމްއޭސީއެލްގެ ޑިރެކްޓަރުންގެ ބޯޑަށް ބަދަލު އައިސްފައި ވާތީ މިއަދު އެ ކުންފުނިން ވަނީ މުވައްޒަފުންނަށް ސާކިއުލާއެއް ފޮނުވާފައެވެ.
އެ ސާކިއުލާއެއްގައި ބުނެފައި ވަނީ، ކުންފުނީގެ ބޯޑަށް ބަަދަލު އައިކަން މިދިޔަ ބުރާސްފަތި ދުވަހު އަންގާފައިވާ ކަމަށާއި އެގޮތުން، ޑިރެކްޓަރުންގެ ގޮތުގައި އެމްއޭސީއެލްގެ ބޯޑުގައި މިހާރު ތިއްބެވީ ފަސް މެންބަރުން ކަމަށެވެ. އެ މެންބަރުންނަކީ:
1- އިބްރާހިމް ޝަރީފް - މެނޭޖިން ޑައިރެކްޓަރު
2- އިބްރާހިމް ސިޔާދު ގާސިމް
3- އިބްރާހިމް މަހުދީ
4- ސަހަރު ވަހީދު
5- މުހައްމަދު ރިޔާޒު
އެމްއޭސީއެލްގެ ބޯޑުން އިބްރާހިމް ނޫރައްދީން ވަކިކުރީ ކީއްވެ ކަމެއް ޕްރައިވެޓައިޒޭޝަން އެންޑް ކޯޕަރަޓައިޒޭޝަން ބޯޑް (ޕީސީބީ) އިން ހާމަކޮށްފައެއް ނުވެއެވެ.
އިބްރާހިމް ނޫރައްދީން ވަނީ 2005 ވަނަ އަހަރުން ފެށިގެން އޮކްޓޯބަރު 2008 އާ ހަމައަށް ވެސް އެމްއޭސީއެލްގެ ބޯޑު މެމްބަރުކަން ކުރައްވައިފައެވެ. އަދި އެމްޑީޕީގެ ފުރަތަމަ ވެރިކަމުގައި ޑިސެމްބަރު 2008 ން ފެށިގެން ޖޫން 28، 2010 އާ ހަމައަށްއެ ބޯޑުގެ ޗެއާމަންގެ މަގާމު އަދާކޮށްފައެވެ. އެންމެ ފަހުން އިބްރާހީމް ނޫރައްދީން ބޯޑު މެންބަރުކަމަށް އައްޔަންކޮށްފައިވަނީ 2019 ވަނަ އަހަރުގައެވެ.
