ފުވައްމުލައް ސިޓީގައި ދިރިއުޅެމުންދާ ބިދޭސީ އަކަށް ޓީބީ ޖެހިފައި ވާކަމަށް ބުނެ ފަތުރަމުންދާ ހަބަރު ފުވައްމުލައް ހޮސްޕިޓަލުން ދޮގުކޮށްފިއެވެ.
ފުވައްމުލައް ސިޓީގައި މިހާރު ކުރިއަށްދާ މަކީޓާ އެތްލެޓިކްސް މުބާރާތަށް ރަށުން ބޭރުގެ ގިނަ ބަޔަކުވެސް އެ ރަށަށް ގޮސްފައިވާ މި ދަނޑިވަޅު ސޯޝަލް މީޑިއާގައި ވަނީ އެ ރަށުގެ ގާޑިޔަލެއްގައި މަސައްކަތް ކުރާ ބިދޭސީއަކު ޓީބީއަށް ޕޮޒިޓްވް ވެފައި ވާކަމަށް ބުނެ ކަންބޮޑުވުން ފާޅުކޮށްފައެވެ. އަދި މިކަމަށް އާންމު ހޭލުންތެރި ވުމަށް ގޮވާލައި، ގިނަ ބަޔަކު ވަނީ ކަންބޮޑުވުން ފާޅުކޮށްފައެވެ.
މި ކަންބޮޑުވުންތަކާ ގުޅިގެން ފުވައްމުލައް ހޮސްޕިޓަލުން ނެރުނު ބަޔާނުގައި ބުނީ އާންމު ރައްޔިތުންގެ މެދުގައި ބިރުވެރިކަމާއި ކަންބޮޑުވުން އުފެދޭ ގޮތަށް ސޯޝަލް މީޑިއާގައި ދައުރުވަމުންދާ ވާހަކަތަކަކީ ދޮގެއް ކަމަށެވެ. މީގެ އިތުރުން އެ ހޮސްޕިޓަލުން ވަނީ އެއްވެސް މީހަކު ޓީބީ ބައްޔަށް ޕޮޒިޓިވްވެ ފަރުވާދެމުން ނުދާކަމުގެ ޔަގީންކަން ދީފައެވެ. އަދި އެފަދަ ރިޕޯޓެއްވެސް ލިބިފައި ނުވާކަމަށް ފުވައްމުލަކު ހޮސްޕިޓަލުން ވަނީ ބުނެފައެވެ.
ޓިއުބަ ކިއުލޯސިސް، (ޓީބީ) ނުވަތަ ކެއްސުން ބައްޔަކީ ގައިންގަޔަށް އަރާ ބައްޔެއް ނަމަވެސް ފަރުވާ ކުރެވިއްޖެނަމަ ރަނގަޅު ކުރެވޭ ބައްޔެކެވެ. ޓީބީ ބަލި ޖެހިފައިވާ ކޮންމެ މީހަކީ އޭނާގެ ފަރާތުން ބަލި ފެތުރޭނެ މީހެއް ނޫނެވެ. މިބަލި ފެތުރެނީ ހަމައެކަނި ފުއްޕާމެއަށް ޓީބީ ޖެހިފައިވާ މީހުންގެ ތެރެއިން ކުޅުގައި ޖަރާސީމު ހުންނަ ބަލި މީހުން ގެ ފަރާތުންނެވެ. މިފަދަ މީހުން ކެއްސާ، ކިނބިހި އަޅާ ނުވަތަ ކުޅު ޖެހުމުން ވައިގެ ޒަރީއްޔާއިން ކުޅުގައިވާ ޖަރާސީމު އެހެން މީހުންނަށް ވާސިލް ވެއެވެ.
