ހައިވޭގައި ކުޑަކުއްޖަކަށް ސައިކަލުގެ ކޮންޓްރޯލް ދީގެން ދުއްވި މައްސަލައެއް ބަލަމުން އަންނަ ކަމަށް ފުލުހުން ބުނެފިއެވެ.
ހައިވޭގައި ކުޑަކުއްޖަކަށް ސައިކަލުގެ ކޮންޓްރޯލް ދީގެން ދުއްވާތައް ފެންނަ ވީޑިއޯއެއް ސޯޝަލް މީޑިއާގައި އަންނަނީ ވައިރަލް ވަމުންނެވެ. އެ ވީޑިއޯ އިން ފެންނަނީ ސައިކަލުގެ ކުރީގައި އިންނަ ކުޑަ ކުއްޖެކެވެ. ބަލާބެލުމަށް އެއީ ގާތްގަނޑަކަށް 5 ނުވަތަ 6 އަހަރު ކުއްޖެކެވެ.
ސައިކަލު ފަހަތުގައި އިން ފިރިހެން މީހާ ސައިކަލުގެ ވައަތު މުއްގަނޑުގައި ހިފަހައްޓައިގެން އިންނަ އިރު ކުރީގައި އިން ކުޑަކުއްޖާ އިންނަނީ ކަނާއަތު މުއްގަނޑުގައި ހިފަހައްޓައިގެންނެވެ. މި ސައިކަލުގައި އިން މީހާ އާއި ކުއްޖާ ވެސް އިނީ ހެލްމެޓް އަޅައިގެންނެވެ.
މި ވީޑިއޯ ވައިރަލް ވުމާއެކު ގިނަ ބަޔަކު އަންނަނީ އެކްސިޑެންޓްތައް ހިނގަން މެދުވެރިވާ ސަބަބުތަކާ ގުޅުވާ ފާޑު ކިޔަމުންނެވެ. އެގޮތުން މިގޮތަށް އަމަލު ކުރުމަކީ އެ ކުޑަކުއްޖާގެ ފުރާނަ ނުރައްކަލަކަށް ހުށަހެޅޭނެ ކަމެއް ކަމަށް ބައެއް މީހުން ބުނެއެވެ. އަދި ބައެއް މީހުންނަށް މިއީ "ވަރަށް ސަޅި" އަދި "ގައްޑާ" ކަމެއް ކަމަށް ބެލި ދާނެ ކަމަށާއި، ފޮނިކަނޑަން މިހެން އުޅޭ މީހުން ވެސް އުޅޭ ކަމީ ދެރަ ކަމެއް ކަމަށް ބުނެފައި ވެއެވެ. މީގެ އިތުރުން މި ސައިކަލު އެކްސިޑެންޓްއެއްވި ނަމަ ގޯސް ވާނީ ދުއްވި މީހާ ކަމަށާއި ކުޑަކުއްޖަކު ގޮވައިގެން ދާ އިރު، ނުރައްކާތެރި ހާދިސާއެއް ހިނގާފާނެ ކަމަށް އަބަދުވެސް ވިސްނަން ޖެހޭނެ ކަމަށް ވެސް ބައެއް މީހުން ބުނެފައި ވެއެވެ.
މި މައްސަލަ ސޯޝަލް މީޑިއާގައި ހއިްސާ ކުރުމުން އޭގައި މައްސަލައެއް ނެތް ކަމަށް ވެސް އެތައް ބަޔަކު ވަނީ ބުނެފައެވެ. އެގޮތުން އެ ސައިކަލުގެ ދަތުރަކީ އެ ކުއްޖާއަށް ވަރަށް ހާއްސަ ހަނދާނަކަށް ވާނެ ކަމަށާއި، ދެ މުއްގަނޑުން އަތް ދޫނުކޮށް ހުރުމުން އޭގާއި މައްސަލައެއް ނެތް ކަމަށް ބައެއް މީހުން ބުނެފައި ވެއެވެ. ކުޑަކުދިންނަށް މަގުމަތީގެ އަދަބުތަކާއި އުޅަނދު ދުއްވުމުގެ ގަވާއިދުތައް އެންމެ ކުޑައިރުއްސުރެ ދަސްކޮށް ދިނުމަކީ ވަރަށް ރަނގަޅު ކަމެއް ކަމަށް ވެސް ބައެއް މީހުން ވަނީ ބުނެފައެވެ.
މި ދެގޮތަށް އަންމުން ފާޑުކިޔައި ތަފާތު ހިޔާލު ހިއްސާ ކުރަމުން ދިޔަ ކަމުގައި ވިޔަސް މިއީ ގާނޫނާ ހިލާފު ކަމެކެވެ. އަދި މިފަދައިން ސައިކަލު ދުއްވާ އެތައް ބަޔަކު އުޅޭ އިރު މިއީ ވިސްނާލަން ޖެހޭ މުހިއްމު ކަމެެއްމެއް މެއެވެ.
