ޔުނައިޓެޑް ނޭޝަންސް (ޔޫއެން)ގެ ޑެޕިއުޓީ ސެކެޓްރީޖެނަލް އަމީނާ ޖ. މުހައްމަދާއި އެމްޑީޕީގެ ރައީސް އަބުދުﷲ ޝާހިދު ބައްދަލު ކުރައްވައިފިއެވެ.
ޔޫއެން ޖެނެރަލް އެސެމްބްލީގެ ކުރީގެ ރައީސްކަން ކުރެއްވި ޝާހިދު ޔޫއެންގެ ޑެޕިއުޓީ ސެކެޓްރީ ޖެނަރަލާއި ބައްދަލު ކުރައްވާފައިވަނީ މިހާރު ޔޫއެންއަށް ކުރައްވަމުން ގެންދަވާ ދަތުރުގެ ތެރެއިންނެވެ.
ދެ ބޭފުޅުންގެ ބައްދަލުވުމަށްފަހު އެކްސްގައި ހިއްސާ ކުރެއްވި ޕޯސްޓެއްގައި ޝާހިދު ވިދާޅުވީ އެނބުރި ޔޫއެންއަށް ވަޑައިގެންނެވުމަކީ ލިބޭ ވަރަށްބޮޑު އުފަލެއް ކަމަށާއި، ބައިނަލްއަގްވާމީ ދެމެހެއްޓެނިވި ސުލްހައަށްޓަކާ، އެންމެންގެ އަޑުވެސް އެހުމަކީ މުހިންމުކަމެއް ކަމުގައި ދެކެވަޑައިގަންނަވާ ކަމަށެވެ.
އަދި ބައިނަލްއަގުވާމީ ސުލްހައާއި އެއްބައިވަންތަކަން ދެމެހެއްޓުމަށް، ޑީޕްލޮމަސީ ކުރިއެރުވުމަށްޓަކާ ބައިނަލްއަގުވާމީ ޖަމިއްޔާ ޖަމާއަތްތަކާއެކު މަސައްކަތް ކުރުމުގެ ފުރުސަތު ލިބުމަކީ ލިބޭ ވަރަށްބޮޑު ޝަރަފެއް ކަމުގައިވެސް ޝާހިދު ވިދާޅުވިއެވެ.
އަދި ދުނިޔޭގެ ސުލްހައާއި އެއްބައިވަންތަކަން ކުރިއެރުވުމަށް "ޓްރެކް 1.5 ޑިޕްލޮމަސީ"ގެ މުހިންމު ދައުރު އިތުރަށް ކުރިއެރުވުމުގައި ކުރެވެމުންދާ މަސައްކަތްތަކާ ބެހޭގޮތުން ޑެޕިއުޓީ ސެކްރެޓަރީ-ޖެނެރަލް އަމީނާ ޖ. މުހައްމަދަށް މައުލޫމާތު ފޯރުކޮށްދިނުމަކީ ލިބިގެންދިޔަ އުފަލެއް ކަމަށް ވިދާޅުވިއެވެ.
ޝާހިދު މިހާރު ޔޫއެންއަށް ކުރައްވަމުން ގެންދަވާ ދަތުރުގައި ޔޫއެން ޑެޕިއުޓީ ސެކެޓްރީ ޖެނެރަލްގެ އިތުރުން ބައެއް ޖަމިއްޔާތަކާއި އަދި ބައެއް ގައުމުތަކުގެ އިސް އެހެން ބައެއް ޑިޕްލޮމެޓުންނާވެސް ބައްދަލުކުރުމަށް ވަނީ ހަމަޖެހިފައެވެ.
އޭގެ ތެރެގައި ސީޝަލްގެ ސަފީރުއާއި، މޮރޮކޯގެ ސަފީރުއާއި، އޮސްޓްރޭލިއާގެ އެމްބެސެޑަރާއި އަދި ޔޫއެންގެ އިކޮނޮމިކް އަދި ސޯޝަލް ކައުންސިލް (އިކޯސޮކް) ރައީސް ހިމެނެއެވެ. އޭގެ އިތުރުން ކެނެޑާގެ ސަފީރުއާއިވެސް ޝާހިދު ބައްދަލު ކުރެއްވުމަށް ވަނީ ހަމަޖެހިފައެވެ.
ޔޫއެންގެ ޖެނެރަލް އެސެމްބްލީގެ 76 ވަނަ ދައުރުގެ ރިޔާސަތު ޝާހިދު ކާމިޔާބު ކުރެއްވީ 2021 ވަނަ އަހަރުގެ ޖޫން މަހު ބޭއްވި އިންތިހާބު ކާމިޔާބު ކުރައްވައިގެންނެވެ. އަފްޣާނިސްތާން ކުރީގެ ފޮރިން މިނިސްޓަރު ޑރ. ޒަލްމާއި ރަސޫލުއާއި ވާދަ ކުރައްވާ އެ އިންތިހާބު ޝާހިދުނ ކާމިޔާބު ކުރެއްވީ ބޮޑު އަޣުލަބިއްޔަތަކުންނެވެ. އެއީ 193 ގައުމު އެކުލެވޭ އާންމު މަޖިލިހުގެ 143 ގައުމުގެ ތާއީދު ހޯއްދަވައިގެންނެވެ.
