ޕްރޮސެކިއުޓާ ޖެނެރަލް ގެ މަގާމުގައި ހުންނެވި ހުސައިން ޝަމީން އެ މަގާމުން ވަކިކުރަން ރައްޔިތުންގެ މަޖިލީހުގެ ޖުޑިޝަރީ ކޮމިޓީން ފާސްކޮށްފިއެވެ.
ލައިވް ކޮށް ކުރިއަށް ގެންދިޔުމަށް ޝަމީމުގެ ފަރާތްޕުޅުން އެދިވަޑައިގެންނެވި ނަމަވެސް ސިއްރު ކޮމިޓީއެއްގެ ގޮތުގައި ކުރިއަށް ގެންދިޔަ ބައްދަލުވުމަށް ފަހު މެންބަރުން އެގޮތަށް ނިންމާފައި ވާކަން 'ދަ ޕްރެސް' އަށް ވަނީ އެނގިފައެވެ.
ޝަމީމް މަގާމުން ވަކިކުރަން މަޖިލީހަށް ހުށަހެޅުއްވީ ހުޅުދޫ ދާއިރާގެ މެންބަރު މުހައްމަދު ޝާހިދެވެ.
ޝަމީމް ވަކިކުރަން ފެންނަ ކަމަށް ކޮމިޓީން ނިންމާފައި ވާ އިރު އެ ނިންމުމާ ބެހޭ ގޮތުން އަދި ރަސްމީ ސިފައެއްގައި ކޮމިޓީގެ ބަހެއް ނުލިބެއެވެ.
'ދަ ޕްރެސް' އަށް އެނގިފައި ވާ ގޮތުން ޝަމީމް ހާޒިރު ކުރި ކޮމިޓީގައި އޭނާ ވަނީ، މަގާމުން ވަކިކުރަން އިތުބާރު ނެތް ކަމަށް ބުނެ ކޮމިޓީން ބަލަމުން ދިޔަ މައްސަލައަކީ އެއްވެސް އަސްލެއް ނެތް ތުހުމަތެއް ކަމަށެވެ. އަދި ވަކިކުރަނީ އޭނާ ލައްވައި ގާނޫނާއި ގަވައިދާ ހިލާފު ކަމެއް ނުކުރުވޭނެތީ ކަމަށް ވެސް އޭނާ ކޮމިޓީގައި ވިދާޅުވެފައި ވެއެވެ.
ޝަމީމް ވަކި ކުރަން ކޮމިޓީން ނިންމި މައްސަލަތަކުގެ ތެރޭގައި ނިމދިޔަ ސަރުކާރުގެ ޓޫރިޒަމް މިނިސްޓަރު އަލީ ވަހީދުގެ މައްޗަށް އުފުލި ޖިންސީގޯނާގެ ދައުވާ އަނބުރާ ނެގުމާއި، ކުރީގެ ޔޫތު މިނިސްޓަރު މަހްލޫފުގެ މައްޗަށް އުފުލި ހިޔާނާތުގެ ދައުވާ ނެގުމާއި، މިލަންދޫ ދާއިރާގެ މެންބަރު އަލީ ރިޒާގެ މައްޗަށް އުފުލި ހިއުމަން ޓްރެފިކިން ދައުވާ ނެގުމާއި، ވެންޓިލޭޓަރު ވައްކަމުގެ މައްސަލައިގައި ހިމެނޭ މީހުނަށް ދައުވާ ނުކުރަން ނިންމުމާއި، ސަފާރީ ރޭޕް ކޭސް އިސްތިއުނާފު ނުކުރަން ނިންމުން ފަދަ ބޮޑެތި މައްސަލަތައް ހިމެނެއެވެ.
މީގެ އިތުރުން ބައެއް މައްސަލަތައް އޭނާގެ މައްޗަށް ފާހަގަ ކޮށް ކޮމިޓީގައި ބަހުސް ކޮށްފައި ވެއެވެ.
ޕީޖީ ކަމުން ޝަމީމް ވަކިކުރި އިރު މީގެ ކުރިން މަޖިލީހުން ވަނީ ނިދިޔަ ސަރުކާރުގައި ހުރި ގަވަރުނަރުވެސް ވަކިކޮށްފައެވެ.
