އަމިއްލަ ފަރާތްތަކުން ފިހާރަތަކުގައި އަދި އެހެނިހެން ތަންތަނުގައި ވިއްކާ ކާބޯތަކެއްޗަކީ ކަނޑައަޅާފައިވާ މިންގަނޑުތަކަށް ފެތޭ ތަކެތިތޯ ބަލަމުންދާ ކަމަށް މޯލްޑިވްސް ފުޑް އެންޑް ޑްރަގް އޮތޯރިޓީ (އެމްއެފްޑީއޭ) އިން ބުނެފިއެވެ.
ރައްޔިތުންގެ މަޖިލީހުން ފާސްކޮށްފައިވާ ކާބޯތަކެތީގެ ގާނޫނަށް މި މަހުގެ 23 ވަނަ ދުވަހުން ފެށިގެން އަމަލުކުރަން ފަށާނެއެވެ. މި ގާނޫނުގައި އެމްއެފްޑީއޭއަށް ގިނަ ބާރުތަކެއް ދީފައިވާއިރު މި ގާނޫނުގެ ދަށުން ކަނޑައެޅިފައިވާ މިންގަނޑުތަކާ ހިލާފުވާ ފަރާތްތަކާ، ތަންތަން ޖޫރިމަނާކޮށް ލައިސަންސް ހިފަހައްޓައި، އަދި އެ ތަންތަނުގެ މައުލޫމާތު އާންމު ކުރުމުގެ ބާރުވެސް ލިބިދީފައިވެއެވެ.
ޕީއެސްއެމްގެ ރާއްޖެ މިއަދު ޕްރޮގްރާމްގައި މިކަމާއި ގުޅޭ އިތުރު ތަފްސީލުތައް ފުޑް ކޮލިޓީ އެޝުއަރެންސް ކޯޑިނޭޓަރު ހާލިސާ މުހައްމަދު ވަނީ ހާމަކުރައްވާފައެވެ. އެގޮތުން ގާނޫނަށް އަމަލު ކުރަން ފެށުމާއެކު ކާބޯތަކެތީގެ ރައްކާތެރިކަން ކަށަވަރުކޮށް ބެލެހެއްޓުމުގެ މަސައްކަތްތައް ކުރަމުން ދާނީ އެމްއެފްޑީއޭއިން ކަމުގައި ހާލިސާ ވިދާޅުވިއެވެ. އަދި ކާބޯތަކެތީގެ ގިންތިތަކެއް ކަނޑައަޅައި، ހަ މަސް ދުވަސް ތެރޭގައި ކާބޯތަކެތީގެ ވިޔަފާރިކުރާ ތަންތަން ރަޖިސްޓްރީކުރަން ޖެހޭނެކަމަށްވެސް އޭނާ ވިދާޅުވިއެވެ.
މީގެ އިތުރުން ހާލިސާ ވިދާޅުވީ، ކާބޯތަކެތީގެ ގާނޫނަށް އަމަލު ކުރަން ފެށުމާއެކު ފިހާރަތަކުގައި ކާބޯތަކެތި ބެހެއްޓޭނެ މިންގަނޑުތަށް ކަނޑައަޅާނެ ކަމަށާއި އަދި އެއާ އެއްގޮތަށް އަމަލު ކުރަމުންގެންދޭތޯ ވެސް ބަލާނެކަމަށެވެ. އަދި ކުރިން އެންގުމަކާ ނުލައި ކާބޯތަކެތި ތައްޔާރުކުރާ ގެތަކަށް ގޮސް އެ މަސައްކަތް ކުރިއަށްދާ ގޮތް ބެލުމުގެ ބާރުވެސް އެ އޮތޯރިޓީއަށް ލިބިފައިވާކަމަށް ހާލިސާ ވިދާޅުވިއެވެ.
އިތުރުން ހާލިސާ ވަނީ އާންމު ފަރުދުންނާއި ކާބޯތަކެތީގެ ވިޔަފާރި ކުރާ ފަރާތްތަކުން ވެސް މިއީ މުޖުތަމައުގެ ރައްކާތެރި ކަމަށްޓަކައި ކުރާ މަސައްކަތެއް ކަމުގައި ބަލައިގެން، އެއްބާރުލުން ދިނުމަށް އެދިފައެވެ.
