އިންގްލިޝް ޕްރިމިއާ ލީގުގެ މިދިޔަ ސީޒަންގެ ޗެމްޕިއަން މެންޗެސްޓާ ސިޓީ މި ސީޒަންގައި ކުޅުނު ފުރަތަމަ މެޗުގައި 2-0 އިން ޗެލްސީ ބަލިކޮށްފިއެވެ.
ޗެލްސީގެ ދަނޑުގައި ކުޅުނު މިމެޗުގެ ފުރަތަމަ ލަނޑު ސިޓީން ޖެހީ މެޗުގެ 18 ވަނަ މިނެޓްގައެވެ. މި ލަނޑު އެޓީމަށް ޖަހާ ދިނީ ނޯވޭގެ ފޯވަޑް އާލިންގް ހާލެންޑެވެ. މިއީ 2022 ވަނަ އަހަރު ޖާމަނީ ބޮރޫޝިއާ ޑޯޓްމަންޑުން ސިޓީއާ ގުޅުނު ހާލެންޑް އެޓީމަށް ޖަހާ ދިން 91 ވަނަ ލަނޑެވެ.
މި ސީޒަން ފެށުމުގެ ކުރިން 11 އާ ކުޅުންތެރިން ގަތް ޗެލްސީއަށް މިމެޗުގައި މާމޮޅު ކުޅުމެއް ނުދެއްކެއެވެ. އަދި މިދިޔަ ސީޒަންގައި އެޓީމު ކެޕްޓަން ކުރި ކޯނާ ގެލަގާ އަދި އިންގްލެންޑްގެ ތަޖުރިބާކާރުގެ ފޯވަޑް ރަހީމް ސްޓާލިންގް ފަދަ ކުޅުންތެރިންނަށް ސްކޮޑުން ޖާގަ ނުލިބުނު އިރު ޗެލްސީގެ ފަރާތުން މާ ގިނަ ހަމަލާތަކެއް ވެސް އުފެއްދިފައެއް ނުވެއެވެ.
ސިޓީން މެޗުގެ ނަތީޖާ ކަަށަވަރުކުރީ ފަހު ހާފް ނިމެން ދަނިކޮށެވެ. މިލަނޑު އެޓީމަށް ޖަހާ ދިނީ ޗެލްސީއަށް ކުރިން ކުޅުނު މަތާއޯ ކޮވަޗިޗެވެ.
މިރޭ ލީގުގައި ދެން ކުޅުނު މެޗުގައި ބްރެންޓްފޯޑް ވަނީ ކްރިސްޓަލް ޕެލަސް 2-1 އިން ބަލިކޮށްފައެވެ.
