ހުޅުމާލޭގައި ބުޓިކް ހޮޓާތައް ތަރައްގީކޮށް ހިންގުމަށް ބޭނުންވާ ޑިވެލޮޕަރުން ހޯދަން ހޮއުސިން ޑިވެލޮޕްމަންޓް ކޯޕަރޭޝަން (އެޗްޑީސީ) އިން އިއުލާން ކޮށްފިއެވެ.
އެޗްޑީސީން ކުރި އިއުލާންގައި ބުނެފައިވާ ގޮތުގައި ހުޅުމާލޭގެ ތިން ސަރަހައްދެއްގައި ބުޓިކް ހޮޓާ އެޅުމަށް ވަނީ ނިންމާފައެވެ. އެ ގޮތުން ތިން ސަރަހައްދުން ބުޓިކް ހޮޓާ އެޅުމަށް ދޫކުރާ ބިމުގެ ބޮޑު މިން ތަފާތެވެ. އެއް ބިމަކީ 645 އަކަފޫޓުގެ ބިމެކެވެ. ދެން އޮތް ދެ ބިމަކީ 353 އަކަފޫޓު އަދި 457 އަކަފޫޓުގެ ބިމެވެ.
އެޗްޑީސީން ބުނީ، މި ކަމަށް ޝައުގުވެރިވާ ހުރިހާ ފަރާތްތަކަށް ހަމަހަމަ ފުރުސަތެއް ދިނުމުގެ ގޮތުން މި ކަމަށް އީއޯއައި ހުށަހެޅުމަށް މިހާރު ވާނީ ފުރުސަތު ހުޅުވާލާފައި ކަމަށެވެ. މި ޕްރޮޖެކްޓަށް އެންމެ ކަމުދާ ބިޒްނަސް މޮޑެލަކީ މި ޕްރޮޖެކްޓަށް ލީސް މޮޑެލްގެ ގޮތުގައި ބަޔަކު ހޯދުން ކަމަށް ވެސް އެޗްޑީސީން ބުނެއެވެ.
ނަމަވެސް މި ޕޮރޮޖެކްޓަށް ހުށަހަޅާ އީއޯއައި ހުންނަން ޖެހޭނީ މި މޮޑެލް އަށް ލިމިޓްކޮށް ނޫން ކަމަށް އެޗްޑީސީން ބުނެއެވެ. އެގޮތުން ހުށަހަޅާ މޮޑެލްއަށް ބެލުމެއް ނެތި ދެ ފަރާތަށް ވެސް ލިބޭނެ ފައިދާތައް ސާފުކޮށް ބަޔާންކުރަން ޖެހޭނެ ކަމަށް އެޗްޑީސީން ބުނެއެވެ.
މި ބުޓިކް ހޮޓެލް ތަރައްގީ ކުރުމަށް އެޗްޑީސީއަށް އެއް ޕްރޮޕޯސަލަށް ވުރެ ގިނަ ޕްރޮޕޯސަލް ލިބިއްޖެ ނަމަ އެޗްޑީސީން ކުރިއަށް ދާނީ އެ ކޯޕަރޭޝަންގެ ވިސްނުމާއި ސްޓްރެޓެޖިކް މަގްސަދުތަކާއި މާސްޓާޕްލޭނަށް އެންމެ އެކަށޭނެ އީއޯއައިއެއް ހިޔާރު ކުރުމަށް ކަމަށް އެ ކުންފުނިން ބުނެއެވެ. އީއޯއައިގެ މޮޑެލް އިވެލުއޭޓް ކުރުމުގައި، އޮޕަރޭޓަރާއި ޑިވެލޮޕާ ނުވަތަ ކޮންޓްރެކްޓަރުގެ ތަޖުރިބާ، ޕްރޮޕޯޒަޑް ޓީމާއި، ފައިނޭންޝަލް ސްޓެބިލިޓީ އަދި ކެޕޭސިޓީއަށް ބަލާނެ ކަމަށް ވެސް އެ ކުންފުނިން ބުނެއެވެ.
މި ޕްރޮޖެކްޓުގެ އެގްރީމެންޓުގައި ސޮއިކުރުމުގެ ކުރިން ކޮންމެ ވަގުތެއްގައި ވެސް އީއޯއައި ޕްރޮސެސް ބާތިލްކޮށް، ހުރިހާ ޕްރޮޕޯސަލްތަކެއް ރިޖެކްޓް ކުރުމުގެ އިހްތިޔާރު އެޗްޑީސީއަށް ލިބިގެންވާ ކަމަށް އެ ކުންފުނިން ނެރުނު އިއުލާންގައި ބުނެފައި ވެއެވެ. އަދި އީއޯއައި ބާތިލްކުރާ ނަމަ އެކަން ހުރިހާ ޕްރޮޕޯސަރުންނަށް އަންގައި، ޕްރޮޕޯސަލްތައް އަނބުރާ ޕްރޮޕޯސަރުންނަށް ރައްދުކޮށްދޭނެ ކަމަށް ވެސް އެޗްޑީސީން ބުނެއެވެ.
އެގޮތުން ޕްރޮޖެކްޓަށް ޕްރޮޕޯސަލް ހުށަހެޅުމުގެ ސުންގަޑިއަކީ އަންނަ ސެޕްޓެމްބަރު މަހުގެ 1 ވަނަ ދުވަހުގެ މެންދުރު ފަހު 2:00 ގެ ކުރިން ކަމަށް އެޗްޑީސީން ބުނެއެވެ. މި ކަމަށް ޕްރޮޕޯސަލް ހުށަހެޅުމަށް އެދޭ ފޯމް ފުރިހަމަ ކޮށް ހުށަހަޅުމަށް ވެސް އެ ކުންފުނިން ބުނެފައި ވެއެވެ.
