މަސްތުވާތަކެތީގެ ވަބާގައި ޖެހިފައިވާ މީހުންނަށް ދޭ ފަރުވާގެ ނިޒާމް ހަރުދަނާކުރުމަށްޓަކައި ދައުލަތުގެ ބަޖެޓަށް 30 މިލިއަން ރުފިޔާ އިތުރުކުރަން ސަރުކާރުން ނިންމައިފިއެވެ.
އެކަން ހާމަކުރެއްވީ، މިދިޔަ އަހަރު ޑްރަގް ކޯޓުން ފަރުވާ ހޯދުމަށް ކުރި އަމުރުގެ ދަށުން ފަރުވާ ފުރިހަމަކުރި ފަރާތްތަކުގެ އަގުވަޒަންކުރުމުގެ ގޮތުން މިދިޔަ ބުރާސްފަތި ދުވަހުގެރޭ ބޭއްވި ހަފްލާއެއްގައި ހޯމްލޭންޑް ސެކިއުރިޓީ މިނިސްޓްރީގެ ސްޓޭޓް މިނިސްޓަރު ލުބްނާ މުހައްމަދު ޒާހިރު ހުސައިން އެވެ.
މި ހަފްލާގައި ވާހަކަ ދައްކަވަމުން ލުބްނާ ވަނީ މަސްތުވާތަކެތިން ސަލާމަތްވުމަށް ފަރުވާ ހޯދާ ފަރާތްތަކަށް މުޖުތަމައުގެ އެހީތެރިކަން ދިނުމުގެ މުހިންމުކަން ފާހަގަކުރައްވައި، ފަރުވާގެ ޕްރޮގްރާމްތައް ނިންމައި މުޖުތަމައަށް ނުކުންނަ މީހުންނަށް ވަޒީފާގެ ފުރުސަތުތައް ތަނަވަސްކޮށްދޭން ސަރުކާރު ހިއްސާވާ ކުންފުނިތަކުގެ ކިބައިން އެދިވަޑައިގެންފައެވެ.
ޑްރަގް ކޯޓުގެ އިސްގާޒީ ފަނޑިޔާރު އަބްދުއްސައްތާރު އަބްދުލްހަމީދު ވިދާޅުވީ، މަސްތުވާތަކެއްޗަށް ދެވިހިފާފައިވާ މީހުން ފަރުވާ ހޯދައި އަލުން މުޖުތަމައަށް ނުކުތުމަށް ކުރާ މަސައްކަތަށް މުޖުތަމައުން ހިތްވަރު ދޭން ޖެހޭ ކަމަށެވެ. ފަނޑިޔާރު ވިދާޅުވީ، ފަރުވާދޭން ތިބި ކައުންސިލަރުންނާއި އެކަމަށް ބޭނުންވާ ވަސީލަތްތައް މަދުވުމުގެ ސަބަބުން ފަރުވާގެ މަރުހަލާ ނުފެށި ލަސްވާ ކަން ފާހަގަކުރެވޭ ކަމަށާއި، އެ ކަންކަމަށް ހައްލުލިބި ފަރުވާގެ މަރުހަލާ އަވަސްކުރެވިގެން ދިއުމަށް އުންމީދުކުރައްވާ ކަމަށެވެ.
މި ހަފްލާގައި ވަނީ ފަރުވާ ފުރިހަމަކުރި މީހުންގެ އިތުރުން، ޑްރަގް ކޯޓަށް އެހީތެރިކަން ފޯރުކޮށްދިން ބައެއް ފަރާތްތަކަށާއި މުވައްޒަފުންގެ މަސައްކަތްތައް ފާހަގަކޮށްފައެވެ.
ޑްރަގް ކޯޓުން ބުނީ ވޭތުވެދިޔަ އަހަރު ފަރުވާއަށް 586 މީހެއްގެ މައްޗަށް އަމުރުކޮށްފައިވާ ކަމަށެވެ. އޭގެ ތެރެއިން 419 މީހަކު ފަރުވާ ފުރިހަމަކޮށްފައިވާ ކަމަށެވެ. އަދި ފަރުވާގެ އަމުރާ ހިލާފުވުމުން، 173 މީހަކު ފަރުވާއިން ވަކިކޮށް ހުކުމް ތަންފީޒުކުރަން އަމުރުކޮށްފައިވާ ކަމަށް ވެސް އެ ކޯޓުން މައުލޫމާތު ދެއެވެ.
