ވޭތުވެދިޔަ 12ވަރަކަށް އަހަރު ދުވަހުގެ ތެރޭގައި ނެޝެނަލް އިންސްޓިޓިއުޓް ފޯ ރިސާޗް އެންޑް އެޑިކްޝަންސް ސްޓަޑީޒް އިން އެއްވެސް މަސައްކަތެއް ހިންގާފައިނުވާކަމަށާއި އެ އިންސްޓިޓިއުޓްގެ މަސައްކަތްތައް ފުޅާކުރުމުގެ މަސައްކަތް މިހާރު ފަށާފައިވާކަމަށް އެންޑީއޭގެ ޗެއާޕާސަން ލުބްނާ ޒާހިރު ވިދާޅުވެއްޖެއެވެ.
ދިވެހިރާއްޖޭގައި މަސްތުވާތަކެތި ބޭނުންކުރާ 7500 ވަރަކަށް މީހުން އުޅޭ ކަމަށް ދިރާސާތަކުން ދައްކާއިރު މަސްތުވާތަކެތީގެ މައްސަލަ އަށް ހައްލު ހޯދުމަށް އެކަށީގެންވާ ފަރުވާގެ ނިޒާމެއް ގާއިމުކުރުމަށް ގިނަ މަސައްކަތްތަކެއް އަންނަނީ ކުރަމުންނެވެ.
އެގޮތުން މަސްތުވާތަކެތީގެ ވަބާގައި ޖެހިފައި ތިބޭ މީހުންނަށް ފަރުވާދޭ ކައުންސިލަރުން ބިނާކުރުމުގެ މަސައްކަތްތައް ކުރަމުން އަންނައިރު ލުބްނާ ވިދާޅުވީ ހެލްތު މިނިސްޓްރީ އާއި އެލައިޑް އިންޝުއަރެންސް އާއެކު މިކަމާއި ގުޅޭ މަޝްވަރާ ބައްދަލުވުމެއް ބާއްވާފައިވާ ކަމަށެވެ. މި މަޝްވަރާގެ ބައްދަލުވުމުގެ ބޭނުމަކީ ރާއްޖޭގެ ހުރިހާ ރަށެއްގައިވެސް މަސްތުވަތަކެތީ ވަބާގައި ޖެހިފައި ތިބޭ މީހުންނަށް ފަރުވާދޭ ކައުންސިލަރުން ބިނާކުރުންކަން ފާހަގަކޮށް ލުބްނާ ވިދާޅުވީ އޮންލައިންކޮށް ކުރިއަށްގެންދިޔުމަށް ނިންމާފައިވާ މި ޕްރޮގްރާމުގެ ބައެއް ބައިތައް ކްލާސްތަކަށް ހާޒިރުވެ ކުރިއަށްގެންދިޔުމަށްވެސް ނިންމާފައިވާ ކަމަށެވެ.
މި ޕްރޮގްރާމާ ގުޅޭގޮތުން އެކްޓިން ސީއީއޯ މުހައްމަދު ރާޝިދު ވިދާޅުވީ ރާއްޖޭގެ ހުރިހާ ހިސާބެއްގައި މަސްތުވާތަކެތީގެ މައްސަލަތައް ފުޅާވަމުން އަންނަ ކަމުގެ މައުލޫމާތު ލިބެމުން އަންނަ ކަމަށެވެ. އަދި ފަރުވާގެ ކަންކަމުގެ ޒިންމާއާ ހަވާލުވެތިބި ބައެއްގެ ހައިސިއްޔަތުން މިހާރު ޕޮލިސީ ލެވެލްގަ ވިސްނުން ހުރީ ކޮމިއުނިޓީގައި ކުދިން ބައިތިއްބައިގެން ކޮމިއުނިޓީއަށް ރީއިންޓަގްރޭޓް ކުރެވޭނެ ގޮތަށް ފަރުވާގެ ބައެއް އިތުރުކުރުން ކަމަށް އޭނާ ވިދާޅުވިއެވެ. މަސްތުވާތަކެތި ބޭނުންކުރާ މީހުންގެ ނަފުސާނީ މައްސަލަތައް ވަރަށް ބޮޑުކަން ފާހަގަކޮށް މުހައްމަދު ރާޝިދު ވިދާޅުވީ ފަރުވާގެ ތެރެއަށް ވަންނަ ގިނަ ކުދިންނަކީ މެންޓަލީ މުޅިން ސްޓޭބަލް ކުދިން ނޫންކަމަށެވެ.
މަސްތުވާތަކެތި ބޭނުންކުރާ ފަރާތްތައް ރަށުގަ ބައިތިއްބައިގެން ފަރުވާގެ ކަންތައްތައް ކުރިއަށްގެންދާއިރު އެ މީހުންނަށް ބޭނުންވާ ކައުންސިލިން ނުވަތަ އެނޫންވެސް ސައިކޯސޯޝަލް ސަޕޯޓް ދެވޭނެ ގޮތްތަކެއް ނެތްކަމަށް މުހައްމަދު ރާޝިދު ވިދާޅުވިއެވެ. އަދި އެފެންވަރުގެ ނުވަތަ ސެޝަނެއް ނަގައިދެވޭނެ ފެންވަރުގެ މީހުން މި ދާއިރާއިން ތަމްރީނުވެފައި ނެތްކަމަށް އޭނާ ވިދާޅުވިއެވެ.
"ގިނަ ފަހަރަށް މިކަހަލަ ކަންކަމަކީ ފޯނުން ނުވަތަ އޮންލައިންކޮށް ނިންމާލެވޭ ވަރަށް ވުރެ އުނދަގޫ ކަންކަން. ހާއްސަކޮށް ޒާތީ ވިސްނުމާއި ބިހޭވިއަރ މޮޑެފައިވާން ޖެހޭ ކަމަކަމަށްވާތީ އަޅުގަނޑުމެންނަށް އެބަ ބޭނުންވޭ ކައިރިން ސަޕޯޓް. އެހެންކަމުން އެކަން އަޅުގަނޑުމެންނަށް ފާހަގަކުރެވި ބޭނުންވާ ވަސީލަތްތައް ނެތްކަން އަޅުގަނޑުމެންނަށް ގަބޫލުކުރެވުނީމަ ހެލްތު މިނިސްޓްރީ އާއި އެލައިޑް އިންޝުއަރެންސް އާއެކު މިވަނީ މަޝްވަރާކޮށްފަ" މުހައްމަދު ރާޝިދު ވިދާޅުވިއެވެ. މަސްތުވާތަކެތި ބޭނުންކުރާ މީހުންނަށް ހެލްތު ފެސިލިޓީތައް މެދުވެރިކޮށް އައުޓް ޕޭޝަންޓްގެ ހިދުމަތް ދިނުމާ ގުޅޭގޮތުން ކުރެވުނު މަޝްވަރާއިން އުންމީދެއް ލިބިގެންދިޔަކަމަށް ރާޝިދު ވިދާޅުވިއެވެ.
އެޑިކްޝަން ކައުންސިލަރުން ބިނާކުރުމުގެ މަސައްކަތް ފަށަން ތައްޔާރުވަމުން އަންނައިރު ޑްރަގް ފަރުވާއަށް އެއްބާރުލުން ނުދޭ މީހުންނާ މެދު ގާނޫނީ ފިޔަވަޅު އެޅުމުގެ މަސައްކަތްވެސް އެންޑީއޭއިން ވަނީ ފަށާފައެވެ. އެގޮތުން ޑްރަގް ފަރުވާއަށް އެއްބާރުލުން ނުދޭ މީހުންނާ މެދު ގާނޫނީ ފިޔަވަޅު އެޅުމާއި، ފަރުވާގެ ނިޒާމު ހަރުދަނާ ކުރުމަށް އެންޑީއޭގެ ބޯޑާއި ޑްރަގް ކޯޓާ ދެމެދު ވަނީ މަޝްވަރާ ބައްދަލުވުމެއް ބާއްވާފައެވެ. މި މަޝްވަރާގައި ވަނީ ޑްރަގް ކޯޓުގެ ދަށުން ފަރުވާއަށް ހުކުމް ކުރެވި ފަރުވާ ތަންފީޒު ކުރަން ފެށުމަށްފަހު އެއްބާރުލުން ނުދޭ ފަރާތްތަކަށް ގާނޫނީ ފިޔަވަޅު އެޅުމާއި، ފަރުވާގެ ނިޒާމު އިތުރަށް ހަރުދަނާކުރުމަށް ނިންމާފައެވެ.
