ރާއްޖޭގެ ރިސޯޓު ވިޔަފާރި ދާއިރާގައި މަޝްހޫރު ވިޔަފާރިވެރިޔާ އަހުމަދު ސިޔާމް މުހައްމަދު، ރިސޯޓެއް ތަރައްގީ ކުރަމަށް ބޭނުންވާ 165 މިލިއަން އެމެރިކާ ޑޮލަރުގެ ލޯނެއް ހޯދަން ސަރުކާރުގެ ސޮވެރިން ގެރެންޓީ އަކަށް އެދުމުން އެ ގެރެންޓީ ނުދޭން ފިނޭންސް މިނިސްޓްރީން ނިންމައިފިއެވެ.
ކ. އަތޮޅު އެމެރަލްޑް ރިސޯޓްސް ޕްރައިވެޓް ލިމިޓެޑް ކިޔާ ކުންފުނީގެ ވެރިޔާގެ ހައިސިއްޔަތުން އަހުމަދު ސިޔާމް، ރައީސް ޑރ. މުހައްމަދު މުއިއްޒުއަށް އޭޕްރީލް 7 ވަނަ ދުވަހު ވަނީ ސިޓީއެއް ފޮނުވާފައެވެ. އެ ސިޓީގައި ވަނީ އެމަރަލްޑް ލެގޫންގައި ރިސޯޓު ތަރައްގީ ކުރުމުގެ މަސައްކަތަށް ފައިނޭންސް ހޯދުމުގެ މަސައްކަތް ކުރާތާ އަހަރުތަކެއް ވެފައިވާ ކަމަށާއި، 1500 އަށް ވުރެ ގިނަ ކޮޓަރި ހިމެނޭ އެ ޕްރޮޖެކްޓަށް 165 މިލިއަން ޑޮލަރު (ދެ ބިލިއަން ރުފިޔާ) ބޭނުންވާ ކަމަށް ބުނެފައެވެ.
އަދި ޗައިނާގެ ޝަންހާއީ ކޮންސްޓްރަކްޝަން ގްރޫޕުގެ ޝައުގުވެރިކަން އެ ޕްރޮޖެކްޓަށް ހުރިކަން ފާހަގަކޮށް ސިޓީގައި އިތުރަށް ބުނެފައި ވަނީ އެކަމަށް ބޭނުންވާ ފައިސާ ޗައިނާގެ ބޭންކަކުން ހަމަޖެހެން އޮތީ ދިވެހި ސަރުކާރުގެ ސޮވެރިން ގެރެންޓީ ލިޔުމުން ލިބިގެން ކަމަށެވެ.
ސަރުކާރުގެ ސޮވެރިން ގެރެންޓީ އަމިއްލަ ފަރާތްތަކަށް ދެވޭ އުސޫލެއް އާންމުކޮށްފައިވާއިރު، އެ އުސޫލުގެ ދަށުން 4 ޕަސެންޓަށްވުރެ ދަށް އިންޓްރެސްޓުގައި ނަގާ ލޯނުތަކަށް ސަރުުކާރުގެ ސޮވެރިން ގެރެންޓީ ދެވޭ އުސޫލެއް އޮންނަކަމަށްވެސް އެ ސިޓީގައި ބުނެފައި ވެއެވެ.
ސަރުކާރުގެ ސޮވެރިން ގެރެންޓީ ސިޔާމުގެ މި ލޯނަށް ނުދޭން ނިންމާފައިވީ ނަމަވެސް މީގެ ކުރިން ވަނީ ސިޔާމުގެ ކުންފުންޏަކުން ނ. ދިގުރަށުގައި ތަރައްގީ ކުރި 'ސިޔާމް ވޯލްޑު' ތަރައްގީކޮށް ހިންގުމަށް 2017 ވަނަ އަހަރު ޗައިނާގެ އެގްޒިމް ބޭންކުން ދިވެހި ސަރުކާރުގެ ގެރެންޓީއާއެކު 127 މިލިއަން ޑޮލަރުގެ ލޯނެއް ނަގާފައެވެ.
