ބަންގްލަދޭޝްގައި މިހާރު ހިނގަމުންދާ އެއްވުންތަކާ ގުޅިގެން، ބަންގްލަދޭޝްގައި ދިރިއުޅޭ އަދި އެގައުމަށް ދަތުރުކުރާ ދިވެހީން މި ދުވަސްވަރު އިތުރަށް ސަމާލުވުމަށް ފޮރިން މިނިސްޓްރީއިން އަންގައިފިއެވެ.
ބަންގްލަދޭޝްގައި މިހާރު ދިރިއުޅޭ އަދި އެގައުމަށް ދަތުރުކޮށްފައިވާ ދިވެހީންގެ ހާލު، ބަންގްލަދޭޝްގައި ހުންނަ ދިވެހިރާއްޖޭގެ ހައިކޮމިޝަނުން ވަރަށް ގާތުން ބަލަމުން އަންނަ ކަމަށް ފޮރިން މިނިސްޓްރީއިން ބުނެއެވެ.
އެގޮތުން މި ވަގުތު ބަންގަލަދޭޝްގެ ޗިޓަގޮންގްގައި ތިބި 83 ދަރިވަރުންނާއި، ޑާކާގައި ތިބި 7 ދަރިވަރުންނާއި ކޮމިލާގައި ހުރި 1 ދަރިވަރަށް ހައިކޮމިޝަނުން ގަވައިދުން ގުޅައި ހާލު ބަލަމުން އަންނަކަން ފޮރިން މިނިސްޓްރީއިން ވަނީ ފާހަގަކޮށްފައެވެ. އަދި މި ދަރިވަރުންނާއެކު، ބަންގްލަދޭޝްގައި މިވަގުތު ތިބިކަމަށް ހައިކޮމިޝަނަށް މައުލޫމާތު ލިބިފައިވާ 119 ދިވެހި ރައްޔިތުންގެ ހާލު ޖުމްލަ ގޮތެއްގައި ރަނގަޅުކަމަށް ހައިކޮމިޝަނުން ވަނީ މައުލޫމާތު ދީފައިވާ ކަމަށް ވެސް މިނިސްޓްރީއިން ބުނެއެެވެ.
ފޮރިން މިނިސްޓްރީއިން ވަނީ މި ވަގުތު ބަންގްލަދޭޝްގައި ބައެއް ވަގުތުތަކުގައި ކާފިއު އިއުލާން ކޮށްފައިވުމުން، ބަންގްލަދޭޝް ސަރުކާރުން އިރުޝާދު ދީފައިވާ ގޮތަށް ބޭރަށް ނުކުމެނޫޅުމަށާއި ބަންގްލަދޭޝް ސަރުކާރާއި ބަންގްލަދޭޝްގައި ހުންނަ ދިވެހިރާއްޖޭގެ ހައިކޮމިޝަންގެ އިރުޝާދާއި އެއްގޮތަށް އަމަލުކުރުމަށް އިލްތިމާސްކޮށްފައެވެ.
ބަންގްލަދޭޝްގައި ހިނގަމުންދާ ހަމަނުޖެހުންތަކާއި ގުޅިގެން އެއްވެސް އެހީތެރިކަމެއް ބޭނުންވާނަމަ، ބަންގްލަދޭޝްގައި ހުންނަ ދިވެހިރާއްޖޭގެ ހައިކޮމިޝަނާ ގުޅުމަށް ފޮރިން މިނިސްޓްރީިއިން ވަނީ އެދިފައެވެ. ބަންގްލަދޭޝްގައި ހުންނަ ދިވެހިރާއްޖޭގެ ހައިކޮމިޝަންގެ ނަންބަރަކީ 1708 120 318 880+ އަދި 1329 748 885 880+ އެވެ.
ބަންގްލަދޭޝްގައި ބާއްވަމުން އަންނަ މުޒާހަރާތަކަކީ މިނިވަންކަން ހޯދުމަށް 1971 ގައި ޕާކިސްތާނާ ކުރި ހަނގުރާމައިގައި ބައިވެރިވި އާއިލާތަކުގެ މެންބަރުންނަށް ހާއްސަކޮށްފައި އޮތް ވަޒީފާގެ ކޯޓާ ސިސްޓަމްއާ ގުޅިގެންނެވެ. ކޯޓާ މައްސަލަ ބޮޑުވެ އެގައުމުގެ ސްޕްރީމް ކޯޓުން އަމުރެއް ނެރެ, ކޯޓާގެ 93 ޕަސެންޓް ހާއްސަ ކުރާނީ މެރިޓް ބޭސިސް [ތައުލީމީ ފެންވަރަށް] ބެލުމަށް ފަހު އެންމެނަށް ވެސް ކުރިމަތިލެވޭގޮތަށް ކަމަށާއި ބާކީ 7 ޕަސެންޓް 1971 ގެ ހަނގުރާމައިގައި ބައިވެރިވި ފަރާތްތަކަށް ކަމަށް ވަނީ ކަނޑައަޅާފައެވެ.
