ހުޅުމާލޭ މަގުތަކުގެ ދުވާރުމަތީ ބަހައްޓާފައި ހުރި ގޮނޑިތަކާއި މޭޒުތައް މި މަހުގެ 10ވާ ހޮނިހިރު ދުވަހުގެ ކުރިން ނަގަން އަންގައިފިއެވެ.
ހުޅުމާލޭގެ ދުވާރުމައްޗާއި ހެޖުތެރޭގައި ބަހައްޓާފައިވާ ގޮނޑިތަކާއި މޭޒުތައް ނެގުމަށް މީގެކުރިން 2 ފަހަރެއްގެ މަތިން ހައުސިން ޑިވެލޮޕްމެންޓް ކޯޕަރޭޝަން (އެޗްޑީސީ)އިން ވަނީ އަންގާފައެވެ.
އެތަކެތި ނެގުމަށް އަންގާފައިވީ ނަމަވެސް، ގިނަ ފަރާތްތަކުން އެކަމަށް އިޖާބަދީފައިނުވާކަން ފާހަގަކުރެވިފައިވާ ކަމަށް އެޗްޑީސީއިން ބުނެއެވެ.
ދުވާރުމައްޗާއި ހެޖުތެރޭގައި ގޮނޑިއާއި މޭޒު ބަހައްޓައިގެން ވިޔަފާރި އުސޫލުން ބޭނުން ކުރުމަކީ މަނާކަމެއްކަން ފާހަގަކޮށް އެޗްޑީސީއިން ވަނީ މި މަހުގެ 10 ވާ ހޮނިހިރު ދުވަހުގެ ކުރިން ނެގުމަށް ހަނދާކޮށްދީފައެވެ.
އެ މުއްދަތުގައި ދުވާރުމައްޗާއި ހެޖުތެރޭގައި ބަހައްޓާފައިވާ ގޮނޑިއާއި މޭޒު ނަގާފައިނުވާނަމަ، އެތަކެތި ނަގައި އެ ސަރަހައްދު ސާފުކުރުމުގެ މަސައްކަތް ކަމާ ގުޅުން ހުރި އިދާރާތަކާ ގުޅިގެން އެޗްޑީސިީއން ކުރާނެ ކަމަށް އެ ކޯޕަރޭޝަނުން ބުނެއެވެ.
އެޗްޑީސީއިން އިތުރަށް ބުނީ އެ މަސައްކަތުގެ ތެރޭގައި ލިބޭ ގެއްލުމަކަށް އެ ކޯޕަރޭޝަނުން ޒިންމާ ނުވާނެ ކަމަށެވެ.
މީ އަނެއްކާ ފޮނިކަޑާ ބައެއް ހަރާމެ ކަމެއް ކުރަން ކެރޭނެ ނަމަ ހުޅުމާލެ ދުވާރުމަތި އެކަނި ތަ މާރުކޭޓު ތެރޭ ނިކަން ބަލާލަ ބަލަ އެއްކަމެއްވެސް ހައްލެއް ނުވާނެ މާރުކޭޓު ބަލަން ހަވާލުކޮށްފައިވާ މީހާ ހުންނާނީ ފާޑަކަށް؟؟؟؟؟؟