ދިވެހިރާއްޖޭގެ އާބާދީގެ 41 ޕަސެންޓް މީހުން ދިރިއުޅެނީ މާލެ ސަރަހައްދު (މާލެ، ހުޅުމާލެ، ވިލިމާލެ އަދި ހުޅުލެ) ގައި ކަމަށް ތަފާސް ހިސާބުތަކުން ދައްކައިފިއެވެ.
ދުނިޔޭގެ އާބާދީގެ ދުވަހާ ގުޅިގެން މޯލްޑިވްސް ބިއުރޯ އޮފް ސްޓެޓިސްޓިކް (އެމްބީއެސް) އިން ނެރުނު ތަފާސް ހިސާބުތަކުން ދައްކާގޮތުގައި ރާއްޖޭގައި ދިރިއުޅޭ އާބާދީ އަކީ 515،132 މީހުންނެވެ. އޭގެތެރޭގައި ހިމެނެނީ 311،994 ފިރިހެނުންނާއި 203،138 އަންހެނުންނެވެ.
ރާއްޖޭގައި ދިރިއުޅޭ ޖުމްލަ އާބާދީގެ 74 ޕަސެންޓްއަކީ ދިވެހިން ކަމަށް ވާއިރު، އެއީ 382،639 މީހުންނެވެ. އަދި 36 ޕަސެންޓަކީ ބޭރު ގައުމުތަކުގެ މީހުންނެވެ. އެއި 132،493 މީހުންނެވެ.
މާލޭގައި ދިރިއުޅޭ އާބާދީއަކީ (41 ޕަސެންޓް) 211،908 މީހުން ކަމަށް ތަފާސް ހިސާބުތަކުން ދައްކައެވެ. އަދި (46 ޕަސެންޓް) 236،911 މީހުން އަތޮޅު ތެރޭގައި ދިރިއުޅޭއިރު 52،482 މީހުން ދިރިއުޅެނީ ރިސޯޓްތަކުގައެވެ. އެއީ ރާއްޖޭގައި ދިރިއުޅޭ އާބާދީގެ 10 ޕަސެންޓް މީހުންނެވެ.
މީގެއިތުރުން ރާއްޖޭގައި ދިރިއުޅޭ 300،422 މީހުން ވަޒީފާ އަދާކުރާ އިރު، އޭގެ ތެރޭގައި ހިމެނެނީ 171،130 ދިވެހިންނާއި 129،292 ބިދޭސީންނެވެ. އަދި (15 އަހަރާއި 24 އަހަރާއި ދެމެދު) ޒުވާނުންގެ ތެރެއިން 19 ޕަސެންޓް ޒުވާނުންނަކީ ވަޒީފާ އަދާ ނުކުރާ އަދި ކިޔެވުމުގައި ހަރަކާތްތެރި ނުވާ ޒުވާނުންކަން ތަފާސް ހިސާބުތަކުން އެނގެއެވެ.
