ދިވެހިރާއްޖޭގެ އާބާދީއަށް އަންނަމުންދާ ބަދަލުތަކަށް ފިޔަވަޅު އެޅުމަށް ގުޅިލާމެހިފައިވާ ސިޔާސަތުތަކެއް ބޭނުންވާ ކަމަށް ރައީސްގެ އަނބިކަނބަލުން ސާޖިދާ މުހައްމަދު ވިދާޅުވެއްޖެއެވެ.
އެކަމަނާ މިފަދައިން ވިދާޅުވީ "ޗޭންޖިން ޕޮޕިއުލޭޝަން ޑައިނަމިކްސް އިން ދަ މޯލްޑިވްސް"ގެ ނަމުގައި ބޭއްވި މަތީ ފަންތީގެ ސެޝަންގައިގައި ވާހަކަ ދައްކަވަމުންނެވެ.
މި ސެޝަނުގައި ވާހަކަ ދައްކަވަމުން ސާޖިދާ ވަނީ، ރާއްޖޭގައި މުސްކުޅި އުމުރުގެ އާބާދީ އިތުރުވަމުން ދިއުމާއި، ވިހާ ނިސްބަތް ދަށްވަމުން ދާކަން ފާހަގަ ކުރައްވާފައެވެ. އަދި މިކަންކަމަށް ފިޔަވަޅު އެޅުމަށް ގުޅިލާމެހިފައިވާ ސިޔާސަތުތަކެއްގެ މުހިންމުކަން ފާހަގަ ކުރައްވާފައެވެ. އެގޮތުން ދުވަސްވީ މީހުންނަށްޓަކައި ގާއިމު ކޮށްފައިވާ "އިސްރަށްވެހީންގެ ނާދީ" އަދި ހަމަ އެހެންމެ އައިވީއެފް އަދި އައިޔޫއައިގެ ފަރުވާ ފަދަ ފަރުވާތައް އާސަންދައިގެ ތެރެއިން ހަމަޖެހިގެން ދިޔުމަކީ މުހިންމު ކަމެއްކަމަށް އެކަމަނާ ވިދާޅުވިއެވެ.
އާބާދީއަށް އަންނަ ބަދަލުތަކުގެ ސަބަބުން ކުރިމަތިވެދާނެ ގޮންޖެހުންތަކުން ކާމިޔާބު ކަމާއެކު އަރައިގަތުމަށްޓަކައި ރައްޔިތުންގެ ދުޅަހެޔޮކަމަށް އިސްކަންދިނުމަށް ވެސް ސާޖިދާ ވަނީ އެދިވަޑައިގެންފައެވެ. އަދި ދެމެހެއްޓެނިވި އުމުރާނީ ތަރައްގީގެ މަޝްރޫއު "ރަސްމާލެ" އަދި ސަރުކާރުގެ 20 އަހަރުގެ ގައުމީ ތަރައްގީގެ ޕްލޭން ފަދަ، ގެންގުޅޭ ވަށާޖެހޭ ގޮތްތައް އެކަމަނާ ފާހަގަ ކުރެއްވިއެވެ.
ސާޖިދާ ވިދާޅުވީ ދުވަސްވީ މީހުންގެ ނިސްބަތް ގިނަ އާބާދީއަކަށް ނުވަތަ މުސްކުޅި އާބާދީއަކަށް ރާއްޖޭގެ އާބާދީ ބަދަލުވަމުންދާ ދިޔުމަށް ފިޔަވަޅުއަޅައި، ހޭލުންތެރިކަން އިތުރުކޮށް ގައުމުގައި ފާހަގަތިކަން ދެމެހެއްޓުމަށް، ޖިންސީ ހަމަހަމަކަން ޕްރޮމޯޓްކޮށް މީހުންނަށް އިސްކަން ދިނުމުގެ ސިޔާސަތު މުހިންމު ކަމަށެވެ.
މީގެއިތުރުން ރާއްޖޭގެ އާބާދީއަށް އަންނަމުންދާ ބަދަލުތަކުގެ ސަބަބުން ކުރިމަތިވާ ގޮންޖެހުންތަކާ ކުރިމަތިލުމަށް ސަރުކާރުން ރާއްޖެއަށް ތަރައްގީ ގެނައުމުގައި ގެންގުޅޭ ދެމެހެއްޓެނިވި ތަރައްގީގެ ސިޔާސަތުތައް އެކަމަނާ ފާހަގަ ކުރެއްވިއެވެ.
މި ރަސްމިއްޔާތުގައި ސާޖިދާ ވަނީ "ސެންސަސް 2022 އެނަލިޓިކް ޗެޕްޓާސް އެންޑް އެޓޯލްސް ކާޑް" އިފުތިތާހް ކޮށްދެއްވާފައެވެ. މި ސެޝަނަކީ މިނިސްޓްރީ އޮފް ހައުސިން، ލޭންޑް އެންޑް އާބަން ޑިވެލޮޕްމަންޓާއި، އދގެ އާބާދީ ޖަމްއިއްޔާ (ޔޫއެންއެފްޕީއޭ)ގެ ދިވެހިރާއްޖޭގެ އޮފީސް އަދި މޯލްޑިވްސް ބިއުރޯ އޮފް ސްޓެޓިސްޓިކްސް ގުޅިގެން އިންތިޒާމުކުރި ސެޝަނެކެވެ.
