ސަރުކާރުގެ އިދާރާތަކަށާއި ސަރުކާރު ކުންފުނިތަކަށް ސިޔާސީ މުވައްޒަފުން އިތުރުކޮށް، އާދައިގެ މުވައްޒަފުން ވަކިކުރަމުންދާ ކަމަށް ބުނެ، ވަކިކުރި މުވައްޒަފުންގެ ވަޒީފާ އަނބުރާ އިއާދަކުރުމަށް އެމްޑީޕީން ގޮވާލައިފިއެވެ.
ސަރުކާރުގައި މަސައްކަތްކުރަމުންދާ އާދައިގެ މުވައްޒަފުންގެ ތެރެއިން ވަކިކުރި މުވައްޒަފުންގެ ވަޒީފާ އަނބުރާ އިއާދަކުރުމަށް ގޮވާލައި، އެމްޑީޕީގެ ފަރާތުން މަޖިލީހުގެ މިއަދުގެ ޖަލްސާއަށް ކުއްލި މައްސަލަ ހުށަހެޅުއްވީ އެ ޕާޓީގެ ޕާލިމެންޓްރީ ގްރޫޕްގެ ތަރުޖަމާނު އަދި ކެންދޫ ދާއިރާގެ މެންބަރު މައުރޫފް ޒާކިރެވެ.
މައުރޫފް ވިދާޅުވީ، ދައުލަތުގެ ބަޖެޓު ފައިނޭންސްކުރުމަށް ބޭނުންވާ ފައިސާ ލިބުމުގައި ދަތިތަކެއް ކުރިމަތިވެފައިވާތީ ރިކަރަންޓް ހަރަދު ކުޑަކުރުމަށްޓަކައި ސަރުކާރުން ސިޔާސީ މަގާމުތައް މަދުކުރުން ފަދަ ފިޔަވަޅުތައް އަޅަން ނިންމާފައިވާކަން ރައީސް ޑރ. މުހައްމަދު މުއިއްޒު ހާމަކުރެއްވި ކަމަށާއި، ނަމަވެސް ސިޔާސީ މަގާމުތައް ހިފަހައްޓާނެ ކަމަށް ރައީސް ވިދާޅުވި އަދަދުކަމަށްވާ 700 އަށް ވުރެ މަގާމުތަކުގެ އަދަދު އިތުރުކަމަށެވެ.
އޭނާ ވިދާޅުވި ގޮތުގައި، ރައީސް ގެންދަވަނީ ބޮޑެތި މުސާރައާ އެކު މަސައްކަތަށް އެކަށީގެންނުވާ ވަރަށް މުވައްޒަފުން އައްޔަންކުރައްވައި ގާނޫނުއަސާސީން ލިބިދޭ ބާރުގެ ބޭނުން ނަހަމަގޮތުގައި ހިއްޕަވަމުންނެވެ. އަދި މާލިއްޔަތު ކޮމިޓީން ސިޔާސީ މަގާމުތަކުގެ އަދަދު ހިއްސާކުރުމަށް އެދުމުން، ފިނޭންސް މިނިސްޓަރު ޑރ. މުހައްމަދު ޝަފީގު އެކަމަށް އިންކާރުކުރެއްވި ކަމަށާއި، އެމްޑީޕީން މިދިޔަ ބުދަ ދުވަހު ބޭއްވި ޖަލްސާގައި ހުށަހެޅި މައްސަލަ ބޭރުކޮށްލި ކަމަށް ވިދާޅުވިއެވެ.
އިތުރަށް ވާހަކަ ދައްކަވަމުން މައުރޫފް ވިދާޅުވީ:
- މިދިޔަ ހޮނިހިރު ދުވަހު ފޭދޫ ދާއިރާގެ ކުރީގެ މެންބަރު މުހައްމަދު ނިހާދަށް ސްޓޭޓް މިނިސްޓަރުކަން ދީފައިވާކަމަށް
- ހަރަދު ކުޑަކުރުމަށްޓަކައި ގިނަ މުވައްޒަފުންތަކެއް ވަކިކުރުމަށް އާރުޑީސީން މެމޯއެއް ފޮނުވައި، ހަމަ އެއާއެކު 35 ހާސް ރުފިޔާގެ މުސާރައަކަށް ދެ ކޮންސަލްޓަންޓުން ނަގާފައިވާ ކަމަށް
މައުރޫފް ވިދާޅުވީ، ފެންނަމުން ދަނީ ސަރުކާރު ހިއްސާވާ ކުންފުނިތަކުގައި މަސައްކަތްކުރާ އާދައިގެ މުވައްޒަފުން އެއްވެސް އުސޫލެއް ނެތި ވަކިކުރަމުންދާ މަންޒަރު ކަމަށެވެ.
އެހެންކަމުން ސަރުކާރުގެ އިދާރާތަކަށާއި ކުންފުނިތަކަށް ސިޔާސީ މަގާމުތައް އިތުރުކުރުން ހުއްޓާލައި، މިހާތަނަށް ވަކިކުރި މުވައްޒަފުންގެ ވަޒީފާތައް އިއާދަކޮށްދިނުމަށް އޭނާ ގޮވާލެއްވިއެވެ.
އެކަމަކު މި މައްސަލައަށް ބަހުސްކުރުމާ މެދު ގޮތެއް ނިންމުމަށް ރިޔާސަތުން ވޯޓަށް އެހުމުން، ވޯޓުގައި ބައިވެރިވި 69 މެންބަރުންގެ ތެރެއިން 57 މެންބަރަކު ވޯޓުދެއްވީ މައްސަލައަށް ބަހުސްކުރަން ނުފެންނަ ކަމަށެވެ. ބާކީ ތިއްބެވި މެންބަރުން ވޯޓު ދެއްވީ މައްސަލައަށް ބަހުސްކުރަން ފެންނަ ކަމަށެވެ.
ސަރުކާރުން ނިކަމެތިމީހާ ނިކަމެތިކޮއްލަނީ. މީކީ ހަޖަމު ކުރެވޭނެ ކަހަލަ ކަންކަމެއް ނޫން.