މި ސަރުކާރުން ސިޔާސީ މަގާމުތަކަށް އައްޔަންކުރި މީހުންގެ އަދަދާއި ސަރުކާރު ހިއްސާވާ ކުންފުނިތަކުން މުވައްޒަފުންނަށް މުސާރައިގެ ގޮތުގައި ހޭދަކުރާ އަދަދު ހާމަކުރުމަށް ގޮވާލައި މިއަދުގެ ޖަލްސާއަށް ހުށަހެޅި ކުއްލި މައްސަލަ ބޭރުކޮށްލައިފިއެވެ.
ގަލޮޅު ދެކުނު ދާއިރާގެ މެންބަރު މީކާއީލް އަހްމަދު ނަސީމް ހުށަހެޅުއްވި ކުއްލި މައްސަލައިގައި ވިދާޅުވީ، ގާނޫނުއަސާސީން ރައީސަށް ލިބިދޭ ބާރުގެ ދަށުން، އެއްވެސް ހައްދެއް ނެތި ރައީސް ޑރ. މުހައްމަދު މުއިއްޒު ސިޔާސީ މަގާމުތަކަށާއި ސަރުކާރު ހިއްސާވާ ކުންފުނިތަކަށް ބޭފުޅުން އައްޔަންކުރަމުންދާ ކަމަށާއި އެކަމުގެ ސަބަބުން މުސާރައިގެ ގޮތުގައި ހޭދަކުރަން ޖެހޭ ވަރު ބޮޑުވެ، ކުންފުނިތަކަށް ގެއްލުން ވަމުންދާ ކަމަށެވެ.
މީކާއީލް ވިދާޅުވީ، ސިޔާސީ މުވައްޒަފުންގެ އަދަދު ރަސްމީ އަދަދު ސާފުކުރުމަށް މާލިއްޔަތު ކޮމިޓީން ފިނޭންސް މިނިސްޓްރީގައި އެދުމުން ވެސް މިނިސްޓަރު ޑރ. މުހައްމަދު ޝަފީގު އެ މައުލޫމާތު ހިއްސާނުކުރައްވާ ކަމަށާއި، މިއީ ގާނޫނުއަސާސީން ރައްޔިތުންގެ މަޖިލީހަށް ދޭ ބާރުތަކަށް ހުރަސްއެޅުން ކަމަށެވެ.
ނޫސްވެރިންނާއި އާންމުން މި މައުލޫމާތު ހިއްސާކުރުމަށް ސަރުކާރުގައި އެދުމުން ވެސް އެ މައުލޫމާތު ހިއްސާކުރުމަށް ސަރުކާރުން އިންކާރުކުރަމުން ދާތީ، މިކަމަކީ ގާނޫނުއަސާސީގައިވާ މައުލޫމާތު ހޯދައި ލިބުމުގެ ހައްގަށް ހުރަސްއެޅުން ކަމަށް ވެސް އޭނާ ވިދާޅުވިއެވެ.
އެހެންކަމުން މީކާއީލް ގޮވާލެއްވީ ސަރުކާރުގެ ސިޔާސީ މަގާމުތަކުގެ އަދަދާއި މުސާރަ ހާމަކުރުމަށެވެ.
ނަމަވެސް ރިޔާސަތުން ވޯޓަށް އެހުމުން، ވޯޓުގައި ބައިވެރިވި 67 މެންބަރުންގެ ތެރެއިން 56 މެންބަރުންގެ ވޯޓާ އެކު މައްސަލަ ވަނީ ބޭރުކޮށްލައިފައެވެ.
