ޏ. ފުވައްމުލަކު ހޮސްޕިޓަލުގެ އިހުމާލުން މަރުވި، ސަދާ ސައުދުﷲގެ މަރުގެ މައްސަލައިގައި އިހުމާލުވެފައިވާ ޑޮކްޓަރުންނާ ނަރުހުންނަށް ކުރާ މަދަނީ ދައުވާ ފުރަތަމަ އަޑުއެހުން މިއަދަށް ތާވަލުކޮށްފިއެވެ.
ސަދާ ސައުދުﷲ މަރުވީ ބަނޑަށް ތަދުވެ، ހޮޑުލެވޭތީ އެ ރަށު ހޮސްޕިޓަލަށް ގެންގޮސް ފަރުވާދެމުން ދަނިކޮށް 3 އޮކްޓޫބަރު 2021 ގައެވެ. ސަދާގެ މަރާ ގުޅިގެން އާއިލާއިން ތުހުމަތުކުރަނީ ސަދާ މަރުވީ ހޮސްޕިޓަލުން ނުބައި އިންޖެކްޝަނެއް ޖެހުމުންކަމަށެވެ.
ސަދާގެ ބައްޕަ ސައުދުﷲ ފޭސްބުކްގައި ކުރި ޕޯސްޓެއްގައި ބުނެފައިވަނީ މި މަސައްކަތް ފެށީ ދިވެހި ދައުލަތުގެ ހޮސްޕިޓަލްތަކުން ފަރުވާ ކުޑަވުމުގެ ސަބަބުން އަދި އިހުމާލުތަކުން ލިބޭ އަނިޔާ ތަކަށް ހައްލެއް ލިބޭނޭ ކަމުގެ ފުރިހަމަ އުއްމީދާއެކުގައި ކަމަށެވެ. މި މައްސަލައިގައި މިހާތަނަށް ނަރުހުންނަށް ވެސް އަދި ޑޮކްޓަރުންނަށް ވެސް އިތުރު ފިޔަވަޅެއް އަޅާފައިނުވާކަން ފާހަގަކޮށް ސައުދުﷲ ވިދާޅުވީ އިހުމާލުވި ކަމަށް ބަލައި، ޑޮކްޓަރުން ވަޒީފާއިން ވަކިކޮށް ގައުމަށް ފޮނުވާލި ނަމަވެސް، މަރުގެ މައްސަލައެއްގައި އެއީ އެންމެ ރަނގަޅު ފިޔަވަޅެއް ނޫންކަމަށެވެ. އަދި ދަރިފުޅުގެ މަރަށް މިހާރު 4 އަހަރުވެފައިވާއިރު، ސިއްހީ ދާއިރާގެ ތެރެއިން ދެން އިންސާފު ލިބޭނެ ކަމަށް ގަބޫލު ނުކުރެވޭ ކަމަށާއި އިހުމާލުވީ ފަރާތްތަކަށް މަދަނީ ދައުވާކުރަން ފޮނުވީ އެހެންވެކަމަށް ސައުދުﷲ ބުންޏެވެ.
މީގެ ކުރިން ސަދާގެ މަރުގެ މައްސަލަ ސަބަބެއް ނެތި ބޭރުކުރަން އުޅޭތީ ދައުލަތުގެ ވަކީލުންނަށް ކޯޓުން ނަސޭހަތްދީފައިވާއިރު، މީގެ ކުރިން ދައުލަތުން ބުނެފައިވަނީ މި މައްސަލައިގައި ދައުވާ ކުރުން ލަސްވެފައިވާކަށާއި އަދި މައްސަލަ ހުށަހެޅީ ނުބައި ފޯމެއް މެދުވެރިކޮށް ކަމަށެވެ. އެހެންނަމަވެސް
މިކަމާ ގުޅިގެން ސިވިލް ކޯޓުން ބުނީ ސަދާގެ މަރުގެ މައްސަލަ އާއިލާއިން ހުށަހެޅީ ކުއްޖާ މަރުވިތާ ތިން އަހަރު ދުވަސް ނުވަނީސްކަމަށާއި އެ ބާވަތުގެ މައްސަލަތަކުގައި 10 އަހަރު ދުވަސް ތެރޭގައި ދައުވާ ކުރުމުގެ ފުރުސަތު މަދަނީ އިޖްރައާތުގެ ގާނޫނުގެ ދަށުން އޮންނަ ކަމަށެވެ. އެހެންކަމުން އެ މައްސަލާގައި ދައުވާ ކުރުން ލަސްވެފައިވާކަމަށް ނުބެލެވޭނެކަމަށްވެސް ސިވިލް ކޯޓުން ވަނީ ބުނެފައެވެ.
މީގެއިތުރުން މައްސަލަ ހުށަހެޅީ ނުބައި ފޯމަކުން ކަމަށް ބުނެ ދައުލަތުގެ ވަކީލުން ދެއްކެވި ވާހަކައަކީވެސް އެއްވެސް އަސާސެއް ނެތް ވާހަކަތަކެއް ކަމަށް ކޯޓުން ވަނީ ބުނެފައެވެ. އަދި މައްސަލަ ހެޔޮ ނިޔަތުގައި ނިންމުމަށް ކޯޓުން ވަނީ ދައުލަތަށް ނަސޭހަތް ދީފައެވެ.
