ވެލާނާ އިންޓަނޭޝަނަލް އެއާޕޯޓް (ވީއައިއޭ)ގައި ނިވާކަން ކުޑަކޮށް ހެދުން އަޅައިގެން ހުރި އަންހެނަކު ހިފަހައްޓައިފިއެވެ.
އެކަމާ ގުޅިގެން ފުލުހުން ބުނީ ވެލާނާ އެއާޕޯޓްގެ ސީޕްލޭން ޓާމިކަލާއި ދިމާލުން ނިވާކަން ކުޑަ ހެދުން އަޅައިގެން ހުރި ބިދޭސީ އަންހެނަކު މިއަދު ހިފަހައްޓާފައިވަނީ މެންދުރު 12:10 ހާއިރު ކަަމަށެވެ.
އަދި އެ މީހާގެ ނަފްސާނީ މައްސަލަތަކެއް ހުރިކަމަށް ބެލެވޭ ކަަމަށް އެއާޕޯޓުން ބެލި މެޑިކަލް އޮފިސަރު މައުލުމާތު ދީފައިވާތީ އޭނާ ޑޮކްޓަރަށް ދެއްކުމަށް އައިޖީއެމްއެޗް އަށް ގެންގޮސްފައިވާ ކަމަށްވެސް ފުލުހުން ވަނީ ބުނެފައެވެ.
އަދި ހަމައެހެންމެ މި މައުލޫމާތު އެ މީހާގެ ސްޕޮންސާއާ ހިއްސާކޮށް އޭނާއާ ހަވާލު ވުމަށް ހޮސްޕިޓަލަށް އައުމަށް އަންގާފައިވާ ކަމަށްވެސް ފުލުހުން ބުނެފައި ވެއެވެ.
ބިދޭސީ މީހާ ހިފަހައްޓާ މަންޒަރު ދައްކުވައިދޭ ވީޑިއޯ އެއް ދައުރުވަމުންދާއިރު ދެ ފުލުހަކު ވެގެން އޭނާ ގެންދާ މަންޒަރު ފެނެއެވެ. އަދި ދެކޮޅު ހެދުމެއްނެތި އެ އަންހެން މީހާވެސް ފުލުހުންނާއެކު ދާ މަންޒަރު ފެނެއެވެ.
