މޯލްޑިވްސް މީޑިއާ ކައުންސިލްގެ އާންމު 2 މެންބަރެއްގެ މަގާމު ހުސްވެފައި ވާތީ، އެ ކައުންސިލްގެ އާންމު މެންބަރު ކަމަށް ކުރިމަތިލުމުގެ ފުރުސަތު ހުޅުވާލައިފިއެވެ.
އާންމު މެންބަރުންގެ ގޮތުގައި ބަލާނީ މީޑިއާއާ ގުޅުންހުރި އެއްވެސް ދާއިރާއެއްގައި މަސައްކަތް ނުކުރާ ފަރާތްތަކެވެ.
މޯލްޑިވްސް މީޑިއާ ކައުންސިލުގެ ގާނޫނުގައިވާ ގޮތުން ކައުންސިލުގެ މެންބަރުންގެ މުއްދަތަކީ 2 އަހަރެވެ. އަދި އެއްވެސް ފަރާތަކަށް ކައުންސިލުގެ މެންބަރުކަމުގައި ވިދިވިދިގެން 2 ދައުރު އަދާ ނުކުރެވޭނެއެވެ.
މީޑިއާ ކައުންސިލުގެ އާންމު މެންބަރުކަމަށް އެދޭ ފަރާތްތަކުން އަންނަ ބުރާސްފަތި ދުވަހުގެ މެންދުރުފަހު 2:00ގެ ކުރިން މީޑިއާ ކައުންސިލް އިންތިހާބުގައި މެންބަރުކަމަށް ކުރިމަތިލުމަށް އެދޭ ފޯމު އަދި ފޯމާއެކު ހުށަހަޅަންޖެހޭ ތަކެތި ހުށަހެޅުމަށް ޔޫތު މިނިސްޓްރީ އިން ވަނީ އެދިފައެވެ.
މޯލްޑިވްސް މީޑިއާ ކައުންސިލުގެ މެންބަރުންގެ ޝަރުތުތައް:
- ދިވެހިރައްޔިތަކު ކަމުގައިވުން
- އުމުރުން 18 އަހަރު ފުރިފައިވުން
- އިސްލާމްދީނުގައި ހައްދެއް ކަނޑައެޅިފައިވާ ކުށެއް ކުރިކަން ޝަރީއަތަށް ސާބިތުވެފައިވާ މީހަކު ކަމުގައި ނުވުން
- މަސްތުވާތަކެތީގެ ވިޔަފާރިކުރުމުގެ ކުށް ސާބިތުވެފައިވާ މީހަކު ކަމުގައި ނުވުން
- ކުޑަކުދީންނަށް ޖިންސީ ގޯނާކުރުމުގެ ކުށް ޝަރީއަތަށް ސާބިތުވެފައިވާ މީހަކު ކަމުގައި ނުވުން
- ވޭތުވެދިޔަ 2 އަހަރު ދުވަހުގެ ތެރޭގައި ޖިނާއީ ކުށެއް ކުރިކަން ޝަރީއަތަށް ސާބިތުވެފައިވާ މީހަކު ކަމުގައި ނުވުން
- ހިޔާނާތުގެ ނުވަތަ ރިޝްވަތުގެ ކުށެއް ކުރިކަން ޝަރީޢަތަށް ސާބިތުވެފައިވާ މީހަކު ކަމުގައި ނުވުން
- މުޖްތަމައު ގަބޫލުކުރާ މިންގަނޑުތަކުން، އަބުރުވެރި، އަހްލާގު ރަނގަޅު މީހެއްކަމުގައިވުން
- ފާއިތުވެދިޔަ 12 މަސްދުވަހުގެ ތެރޭގައި ނޫސް މަޖައްލާއެއްގައި އެމީހަކު ލިޔުނު އެއްޗަކާބެހޭ ގޮތުން ޝަރީއަތަށް ކުށެއް ސާބިތު ވެފައިވާ މީހަކު ކަމުގައި ނުވުން
ޔޫތު މިނިސްޓްރީގެ އީމެއިލް މެދުވެރިކޮށް ފޯމު އަދި ލިޔެކިޔުންތައް ހުށަހަޅާއިރު ހުންނަންވާނީ ޕީޑީއެފް ފޯމެޓުގައި ކަމަށް އެ މިނިސްޓްރީ އިން ބުނެއެވެ. މީޑިއާ ކައުންސިލްގެ މެންބަރުކަމަށް އެދޭ ފޯމުގެ އިތުރުން އައިޑީ ކާޑުގެ ކޮޕީ، ތައުލީމީ ފެންވަރު އަންގައިދޭ ލިޔުންތަކުގެ ކޮޕީ، ކުށުގެ ރެކޯޑް އަދި ޕާސްޕޯޓް ސައިޒްގެ ފޮޓޯ ހުށަހަޅަން ޖެހެއެވެ.
ޔޫތު މިނިސްޓްރީއިން ބުނީ މީޑިއާ ކައުންސިލަށް މެންބަރަކު އައްޔަން ކުރުމުގައި ގާނޫނީ ދާއިރާއިން ނުވަތަ ދިވެހި ބަހުގެ ދާއިރާއަކުން ނުވަތަ އިންސާނީ ހައްގުތަކުގެ ދާއިރާއިން ނުވަތަ ދީނީ އިލްމުގެ ދާއިރާއިން ނުވަތަ އިޖްތިމާއީ ސައިންސަސް ގެ ދާއިރާއަކުން މަތީ ތައުލީމު ހާސިލް ކޮށްފައިވާ ފަރާތްތަކަށް އިސްކަން ދޭނެ ކަމަށެވެ.
މީގެއިތުރުން އިޖްތިމާއީ ތަރައްގީއާއި ދުޅަހެޔޮ ކަންް ހާއްސަ ގޮތެއްގައި ކުޑަކުދިންނާއި، އަންހެނުންނާއި، ނުކުޅެދުންތެރިކަމަށް މަސައްކަތްކުރުން ނުވަތަ އެކަށީގެންވާ ގޮތެއްގައި މަސައްކަތްކޮށްފައިވާ ފަރާތްތަކަށް އިސްކަންދެވޭނެ ކަމަށް ވެސް އެ މިނިސްޓްރީއިން ބުނެއެވެ.
