މީޑިއާ ރެގިއުލޭޓް ކުރުމަށް ހުށަހަޅާފައިވާ ބިލަށް މަޝްވަރާކޮށް އިތުރަށް ދިރާސާ ކުރަން ވަގުތު ބޭނުންވާނެ ކަމަށް މޯލްޑިވްސް ބްރޯޑްކާސްޓިން ކޮމިޝަން (ބްރޯޑްކޮމް)ގެ ރައީސް ސަފާ ޝަފީގް ވިދާޅުވެއްޖެއެވެ.
ރައްޔިތުން މަޖިލީހުގެ މިނިވަން މުއައްސަސާތަކުގެ ކޮމިޓީގައި މިއަދު ބޭއްވި ބައްދަލުވުމުގައި ވަނީ މީޑިއާ ރެގިއުލޭޓް ކުރުމަށް ހުށަހަޅާފައިވާ ބިލް ދިރާސާ ކުރުމަށް ބްރޯޑް ކޮމް އާ އެކު މަޝްވަރާކުރުމަށް ބައްދަލުވުމެއް ބާއްވާފައެވެ. މި ބައްދަލުވުމުގައި ބްރޯޑްކޮމްގެ ރައީސް ސަފާ ޝަފީގް ވަނީ އެ ބިލް ޑްރާފްޓްކުރުމުގެ މަރުހަލާގައި އެ ކޮމިޝަނާ މަޝްވަރާކޮށްފައި ނުވާ ކަން ހާމަކުރައްވާފައެވެ.
ސަރުކާރުގެ ސިޔާސަތަކީ ވެސް ކަންކަން ނިންމުމުގެ ކުރިން ފުޅާ ދާއިރާއެއްގައި ދިރާސާކުރުން ކަން ފާހަގަ ކުރައްވަމުން ސަފާ ވިދާޅުވީ، މިފަދަ ބިލެއް ހަދާއިރު، ގައުމީ ފެންވަރުގެ ދިރާސާއެއް ހެދުމަކީ މުހިންމު ކަމެއް ކަމަށެވެ. މީޑިއާތަކާއި އޯޓީޓީ ޕްލެޓްފޯމްތައް ވެސް ބެލެހެއްޓުން އެއްކޮމިޝަނަށް ގެންނަ ގޮތަށް އެ ބިލުގައި ހިމަނާފައިވާ އިރު އެއީ ވެސް ކުރަން އެންމެ ރަނގަޅު ކަމެއްތޯ ބަލައި ދިރާސާ ކުރަން ޖެހޭ ކަމަށް ސަފާ ވިދާޅުވިއެވެ. އެގޮތުން މިވަރުގެ ބިލަކަށް މަޝްވަރާކޮށް އިތުރަށް ދިރާސާކުރަން ވަގުތު ބޭނުންވާނެ ކަމަށް ސަފާ ވިދާޅުވިއެވެ.
އެ ބިލުގައި އޭނަ ފާހަގަކުރެއްވި ކަންބޮޑުވުންތަުގެ ތެރޭގައި ނޫސްވެރިންނާއި މީޑިއާތައް ޖޫރިމަނާ ކުރަން ކަނޑައަޅާފައިވާ އަދަދުތައް ކަނޑައަޅާފައި ވަނީ ދިރާސާއެއް ނުކޮށް ކަމަށް ސަފާ ވިދާޅުވިއެވެ. އެ ޖޫރިމަނާ އަދަދުތައް ކަނޑައަޅަން ވާނީ ނޫސްވެރިންނަށް ލިބޭ މުސާރަ އާއި މީޑިއާތަކުގެ އާމްދަނީއަށް ބަލައިގެން ކަމަށް ސަފާ ވިދާޅުވިއެވެ. އެހެން ގައުމުތަކުގަައި މީޑިއާ ރެގިއުލޭޓް ކުރަން އޮންނަ ގޮތް ދިރާސާކޮށް ރާއްޖެއަށް އެންމެ އެކަށޭނަ ގޮތަކީ ކޮބައިތޯ ބަލަން ޖެހޭ ކަމަށް ވެސް ސަފާ ވިދާޅުވިއެވެ. އަދި ސެލްފް ރެގިއުލޭޓަރީ ނިޒާމަކާ ގުޅޭ ގޮތުން ވެސް ފުޅާ ދާއިރާއެއްގައި ބަހުސް ކުރަން ޖެހޭ ކަމަށް ވެސް އޭނާ ވިދާޅުވިއެވެ.
ތުޅާދޫ ދާއިރާގެ އަމިއްލަ މެންބަރު އަބްދުލްހަންނާން އަބޫބަކުރު ހުށަހެޅުއްވި މީޑިއާ ބިލާއި ގުޅިގެން ސޯޝަލް މީޑިއާގައި ވެސް ގިނަ ބައެއްގެ ނުރުހުން ސަރުކާރާއި، ޕީއެންސީއަށް ނިސްބަތްވާ މަޖިލީސް މެންބަރުންނަށް އަމާޒުވަމުން އަންނައިރު، މި ބިލުގެ މައްސަލަ ވަނީ ވަރަށް ބޮޑަށް ހޫނުވެފައެވެ. މިކަމާ ގުޅިގެން ސަރުކާރުގެ ފަރާތުން އެޓާނީ ޖެނެރަލް އަހުމަދް އުޝާމް ވިދާޅުވެފައި ވަނީ އެ ބިލުގައި ހިމަނާފައިވާ ކަންކަމަކީ 2022 ވަނަ އަހަރުގެ އޮގަސްޓު މަހުގެ ތެރޭގައި މީޑިއާ ކައުންސިލް އިން ފޮނުވި ޑްރާފްޓް ބިލްގައި ހުރި ކަންކަން ކަމަށް ވިދާޅުވެފައެވެ. ނަމަވެސް މީޑިއާ ކައުންސިލުން ފޮނުވި ބިލަކީވެސް ނޫސްވެރިންނަށް ފެނިފައިވާ ބިލެއް ނޫން ކަމަށް ބުނެ ނޫސްވެރިން ވަނީ ކަންބޮޑުވުން ފާޅުކޮށްފައެވެ.
