ގދ. ހޯނޑެއްދޫ ކައުންސިލަށް ލިބުނު ފައިސާ އާއި ހަރަދު ކުރި ފައިސާ ކަމަށް ހިސާބުތަކުން ދައްކާ އަދަދާއި މާލީ ބަޔާނުން ދައްކާ އަދަދުގައި ފަރަގު ހުރި ކަމަށް އޮޑިޓާ ޖެނެރަލް ތައްޔާރު ކުރި ރިޕޯޓްގައި ބުނެފިއެވެ.
އޮޑިޓާ ޖެނެރަލް އޮފީހުން އާންމު ކުރި ގދ. ހޯނޑެއްދޫ ކައުންސިލް އިދާރާގެ 2022 ވަނަ އަހަރުގެ މާލީ އޮޑިޓް ރިޕޯޓުގައި ބަޔާންކޮށްފައިވާ ގޮތުގައި، ޑިސެމްބަރު 31، 2022 އަށް ނިންމާފައިވާ މާލީ އަހަރުގެ މާލީ ބަޔާނުގައި ހިމަނާފައިވާ އަދަދުތަކާއި، ކައުންސިލް އިދާރާގެ ހިސާބުތަކުން ދައްކާ އަދަދުތަކާ ދެމެދު ބޮޑު ފަރަގެއް ހުރި ކަމަށެވެ. އެ ފަރަގު އައިސްފައި ވަނީ ކިހިނެއް ކަމާއި އޭގެ ތެރެއިން ސައްހަ އަދަދަކީ ކޮބައިކަން އެނގޭނެ ގޮތަށް ކައުންސިލްގެ އިދާރާއިން ރެކޯޑްތައް ރިކޮންސައިލް ކޮށް ބަލަހައްޓާފައި ނުވުމުގެ ސަބަބުން މާލީ ބަޔާނުގައި ހިމަނާފައިވާ ބައެއް އަދަދު ތަކަކީ ސައްހަ އަދަދުތަކެއް ކަން ކަށަވަރު ކުރެވެން ނެތް ކަމަށް އެ އޮޑިޓް ރިޕޯޓްގައި ބުނެފައި ވެއެވެ.
އެގޮތުން އެ އަހަރު ލިބުނު އާމްދަނީގެ ގޮތުގައި މާލީ ބަޔާނުގައި ހިމަނާފައި ވަނީ 9،521،742 ރުފިޔާ ހިމްނާފައި ވީ ނަމަވެސް އެ އިދާރާގެ ހިސާބުތަކުން ވިޔަ މޮޑިއުލް އިން ދައްކަނީ 8،940،582 ރުފިޔާ ކަމަށް އޮޑިޓް އޮފީހުން ބުނެއެވެ. އެހެންކަމުން އެ އަހަރު ލިބުނު އާމްދަނީގެ ގޮތުގައި މާލީ ބަޔާނުގައި ހިމަނާފައިވާ އަދަދު، އެ އިދާރާގެ ހިސާބުތަކުން ވިޔަ މޮޑިއުލް އިން ދައްކާ އަދަދަށް ވުރެ 581،160 ރުފިޔާ ވަނީ އިތުރުވެފައެވެ.
ހަމައެއާއެކު އެ އަހަރުގެ މާލީ ބަޔާނުގެ "ފައިސާ ލިބުނު ގޮތާއި ހޭދަ ކުރެވުނު ގޮތުގެ ބަޔާން" ގައި އަހަރު ނިމުނު އިރު ހުރި ކަމަށް ހިމަނާފައިވާ އަދަދާއި، ބޭންކް ސްޓޭޓްމަންޓާއި ތިޖޫރީ ބާކީން ދައްކާ އަދަދުގައި 1،121،215 ރުފިޔާގެ ފަރަގު ހުރި ކަމަށް އެ ރިޕޯޓްގައި ބުނެއެވެ. އެގޮތުން އެ އަހަރުގެ ނިޔަލަށް އެ އިދާރާގައި ހުރި ފައިސާ އާއި ފައިސާގެ ގޮތުގައި ބެލެވޭ ތަކެތީގެ އަދަދީ 3.51 މިލިއަން ރުފިޔާ ކަމަށް ދެއްކި ނަމަވެސް އެ ކައުންސިލްގެ ބޭންކް ސްޓޭޓްމަންޓާއި ތިޖޫރީގެ ބާކީން ދައްކާ ގޮތުގައި އެ އަދަދަކީ 2.38 މިލިއަން ރުފިޔާއެވެ. އެހެންކަމުން ރިކޯޑްތަކުން ދައްކާ އަދަދަށް ވުރެ 1.12 މިލިއަން ރުފިޔާ އިތުރުވެފައި ވުމާއެކު އެ އަދަދުގެ ސައްހަކަން ކަށަވަރު ނުވާ ކަމަށް އޮޑިޓް އޮފީހުން ބުނެއެވެ.
މީގެ އިތުރުން އެ އަހަރު ކުރި ހަރަދުގެ ގޮތުގައި މާލީ ބަޔާނުގައި ހިމަނާފައިވާ އަދަދު، އެ އިދާރާގެ ހިސާބުތަކުން ވިޔަ މޮޑިއުލް އިން ދައްކާ އަދަދަށް ވުރެ 897،583 ރުފިޔާ ވަނީ މަދުވެފައެވެ. އަދި އެ ކައުންސިލް އިދާރާއިން ތައްޔާރުކޮށްފައިވާ "ފާސްކުރި ބަޖެޓާއި އެ ބަޖެޓުން ހޭދަކުރި ގޮތުގެ ބަޔާން" ގައިވާ ފާސްކުރި ބަޖެޓް، ރިވައިޒް ކުރި ބަޖެޓް އަދި ހިނގި ހަރަދުގެ ގޮތުގައި ހިމަނާފައިވާ އަދަދާއި ވިޔަ މޮޑިއުލްގައި ހިމަނާފައިވާ އަދަދު ދިމާ ނުވާ ކަމަށް އޮޑިޓް ރިޕޯޓްގައި ފާހަގަކޮށްފައި ވެއެވެ.
އެގޮތުން ފާސްކޮށްފައިވާ ބަޖެޓަށް ވުރެ 3،726،931 ރިފިޔާ މަދުން މާލީ ބަޔާނުގައި ހިމަނާފައިވުމާއި، ރިވައިޒްކުރި ބަޖެޓްގެ ގޮތުގައި ވިޔަ މޮޑިއުލްގައި ރިކޯޑްކޮށްފައިވާ އަދަދަށް ވުރެ 3،896،027 ރުފިޔާ މަދުން މާލީ ބަޔާނުގައި ވަނީ ހިމަނާފައެވެ. އަދި އަހަރު ތެރޭ ހިނގި ހަރަދުގެ ގޮތުގައި ވިޔަ މޮޑިއުލްގައި ރިކޯޑްކޮށްފައިވާ އަދަދަށް ވުރެ މާލީ ބަޔާނުގައި 1،459،531 ރުފިޔާ މަދުކަން ވަނީ ފާހަގަވެފައެވެ.
