ރާއްޖެއަށް އެތެރެކުރާ ކާބޯތަކެތީގެ ރައްކާތެރިކަން ކަށަވަރުކުރުމަށް ސާމްޕަލް ނަގައި ޓެސްޓުކުރުމުގެ މަސައްކަތް ވަރަށް އަވަސް މުސަތަގުބަލެއްގައި ފެށިގެން ދާނެކަމަށް ހެލްތް މިނިސްޓަރު ޑރ. އަބްދުﷲ ހަލީލު ވިދާޅުވެއްޖެއެވެ.
މިއަދު ހެލްތް މިނިސްޓްރީން ބޭއްވި ނޫސްވެރިންގެ ބައްދަލުވުމުގައި ހަލީލު ވިދާޅުވީ ރާއްޖެއަށް އެތެރެކުރެވޭ ފަތްޕިލާވެލީގެ ބާވަތްތަކާ މޭވާއާއި ތަރުކާރީގެ ރައްކާތެރިކަން ކަށަވަރުކުރުމަށް ސާމްޕަލް ނެގުމުގެ މަސައްކަތް ފެށުމަށް އިންތިޒާމުތައް ހަމަޖެއްސުމުގެ މަސައްކަތް ފަށާފައިވާކަމަށެވެ.
ރާއްޖޭގައި ދަނޑުވެރިކަން ކުރާއިރު ތަފާތު ކެމިކަލްތައް ބޭނުން ކުރަމުން އަންނަކަން ފާހަގަކޮށް ހަލީލު ވިދާޅުވީ މި ބާވަތްތަކުގައި ކެމިކަލް ހުރި މިންވަރު ރާއްޖޭގައި ޓެސްޓް ކުރެވޭވަރު މަދުކަމަށެވެ. އަދި މި ބާވާތްތަކުގެ ސާމްޕަލް ނެގުމަށްފަހު ރާއްޖެއިން ބޭރަށް ފޮނުވައިގެން ޓެސްޓުކުރަން ޖެހުނަސް އެކަން ކުރުމުގެ އިންތިޒާމްތައް ހަމަޖެއްސުމުގެ މަޝްވަރާތައް ކުރަމުން އަންނަކަމަށްވެސް ހަލީލު ވިދާޅުވިއެވެ.
މީގެ އިތުރުން ހަލީލު ވިދާޅުވީ ކާބޯތަކެތީގެ ރައްކާތެރިކަން ކަށަވަރުކުރުމުގެ މަސައްކަތް އަމަލީގޮތުން ފެށިގެންދިމުން އެތަކެތީގަ ނުރައްކާތެރި މާއްދާތައް ހުރި މިންވަރު އެނގި އެތެރެކުރާ ފަރާތްތަކަށް ރައްކާތެރި ގޮތުގައި ކާބޯތަކެތި އެތެރެކުރުމަށް ބާރުއެޅިގެން ދާނެކަމަށެވެ. އަދި ރާއްޖޭގައި ތަކެތި އުފައްދާއިރު، އޮންނަ އުސޫލުގެ ތެރެއިން ކެމިކަލް ބޭނުންކުރުމަށް ދަނޑުވެރިންނަށް އެނގިގެން ދާނެކަމަށް ހަލީލު ވިދާޅުވިއެވެ.
އިތުރަށް ހަލީލު ވަނީ މިއީ ރައްކާތެރި ކާބޯތަކެތި ދިވެހިންނަށް ފޯރުކޮށްދިނުމަށް ރައީސުލްޖުމްހުރިއްޔާ ގެންގުޅުއްވާ ސިޔާސަތަށް ލިބޭ ބޮޑު ބާރެއްކަމުގައި ހަލީލު ވަނީ ފާހަގަކުރައްވާފައެވެ.
