ކުޑަކުދިންނަށް ކުރާ އެކި ބާވަތުގެ އަނިޔާ ހުއްޓުވުމަށާއި، އެކުދިންގެ ހައްގުތައް ރައްކާތެރިކުރުމުގެ ނިޒާމު ވަރުގަދަކޮށް، އަނިޔާގެ މައްސަލަތަކަށް އިޖާބަދިނުމުގައި ގައުމީ އަދި ބައިނަލްއަގްވާމީ ފެންވަރުގައި ކުރެވޭ މަސައްކަތްތައް ހަރުދަނާކުރުމަށް އެކުލަވާލާފައިވާ "ބޮގޯޓާ ކޯލް ޓު އެކްޝަން" ގަރާރުގައި ދިވެހިރާއްޖެއިން ސޮއިކޮށްފިއެވެ.
މި ގަރާރުގައި ރާއްޖޭގެ ފަރާތުން ސޮއިކުރެއްވީ މިނިސްޓާ އޮފް ހެލްތު، ފެމިލީ އެންޑް ވެލްފެއާ ގީލާ އަލީ އެވެ. "ބޮގޯޓާ ކޯލް ޓު އެކްޝަން" އަކީ 2024 ވަނަ އަހަރުގެ ނޮވެންބަރު މަހު ކޮލަމްބިއާގެ ބޮގޯޓާގައި ބޭއްވި، ކުޑަކުދިންނަށް ކުރާ އަނިޔާ ހުއްޓުވުމާ ބެހޭ ފުރަތަމަ ބައިނަލްއަގްވާމީ މަހާސިންތާގައި ބައިވެރިވި ގައުމުތަކުން އިސްނަގައިގެން އިފުތިތާހުކުރި މުހިންމު ގަރާރެކެވެ.
މި ގަރާރުގެ މައިގަނޑު މަގްސަދަކީ ކުޑަކުދިންނަށް ކުރާ އަނިޔާތައް ހުއްޓުވުމަށާއި، އެފަދަ ކަންކަމާ ދެކޮޅަށް އަޅާ ފިޔަވަޅުތައް ބައިނަލްއަގްވާމީ ފެންވަރުގައި ހަރުދަނާކޮށް، ކުޑަކުދިން ރައްކާތެރިކުރުމުގެ ނިޒާމު އިތުރަށް ވަރުގަދަކުރުމެވެ. މިގޮތުން، ހޯދުންތަކާއި ހެކިތަކުގެ މައްޗަށް ބިނާކޮށް ރައްކާތެރިކަމުގެ ފިޔަވަޅުތައް އެޅުމަށާއި، ގާނޫނީ އަދި ސިޔާސަތުގެ އޮނިގަނޑުތައް ހަރުދަނާކުރުމަށް މި ގަރާރުގައި އަލިއަޅުވާލާފައިވެއެވެ. މީގެއިތުރުން ޑިޖިޓަލް މާހައުލުގައި ކުދިންނަށް ރައްކާތެރިކަން ކަށަވަރުކުރުމާއި، ކުޑަކުދިންގެ ލާބައާ ގުޅުންހުރި ނިންމުންތަކުގައި އެކުދިންގެ ބައިވެރިވުން މާނަހުރި ގޮތެއްގައި ހިމެނުމަށްވެސް ބާރުއަޅާފައިވެއެވެ.
ބޮގޯޓާ ކޯލް ޓު އެކްޝަންގައި ހިމެނޭ ކަންކަމަކީ، ކުޑަކުދިންނަށް ކުރާ އަނިޔާ ހުއްޓުވުމަށް ރާއްޖެއިން 2024 ވަނަ އަހަރު އެކުލަވާލި "ނޭޝަނަލް އެކްޝަން ޕްލޭން އޮން ޕްރިވެންޝަން އެންޑް ރެސްޕޯންޑިން ޓު ވަޔަލެންސް އަގެއިންސްޓް ޗިލްޑްރަން" އާ ސީދާ ގުޅިލާމެހިފައިވާ ކަންކަމެވެ. މި ޕްލޭންގެ އަމާޒަކީ ގޭތެރެއާއި، ތައުލީމީ މަރުކަޒުތަކާއި، މުޖުތަމައު އަދި އިންޓަނެޓްގެ ޒަރީއާއިންވެސް ކުދިންނަށް އަމާން މާހައުލެއް ހޯދައިދިނުމާއި، ނުރައްކަލަށް ހުށަހެޅޭ ކުދިން ދުރާލާ ދެނެގަނެ އެކުދިންގެ މަސްލަހަތު އިސްކޮށްގެން ހިދުމަތްތައް ފޯރުކޮށްދިނުމެވެ.
މި ގަރާރުގައި ސޮއިކުރުމަށް ބޭއްވި ރަސްމިއްޔާތުގައި ވާހަކަފުޅު ދައްކަވަމުން މިނިސްޓަރު ގީލާ އަލީ ވިދާޅުވީ، ކުޑަކުދިންނަށް ކުރާ އަނިޔާ ހުއްޓުވުމަށް ދެމެހެއްޓެނިވި މަސައްކަތްތަކެއް ބޭނުންވާ ކަމަށާއި، މިކަމުގައި ދައުލަތުގެ މުއައްސަސާތަކާއި މަދަނީ ޖަމްއިއްޔާތަކުގެ އިތުރުން މުޅި މުޖުތަމައުގެ އެއްބާރުލުން މުހިންމު ކަމަށެވެ. އަދި ކުޑަކުދިންގެ ރައްކާތެރިކަމަށް ސަރުކާރުން ދެއްވާ ހާއްސަ އަހަންމިއްޔަތުކަން ފާހަގަކުރައްވައި، ރައީސުލްޖުމްހޫރިއްޔާ ޑރ. މުހައްމަދު މުއިއްޒަށާއި ޔުނިސެފް ފަދަ ބައިނަލްއަގްވާމީ ބައިވެރިންނަށް މިނިސްޓަރު ވަނީ ޝުކުރު އަދާކުރައްވާފައެވެ.
މި ގަރާރުގެ ދަށުން ކުރެވޭ މަސައްކަތްތަކަކީ ކުޑަކުދިންގެ ދިރިއުޅުމަށް ދެމެހެއްޓެނިވި އަދި ދާއިމީ ހެޔޮ ބަދަލުތަކެއް ގެނުވައިދޭނެ އަމަލީ މަސައްކަތްތަކަކަށް ހެދުމަށްޓަކައި، ބައިނަލްއަގްވާމީ އިދާރާތަކާ ގުޅިގެން ރާއްޖެއިން ސާބިތުކަމާއެކު މަސައްކަތް ކުރަމުންދާނެ ކަމަށް ސިއްހަތާއި އާއިލާއާއި އިޖުތިމާއީ އެހީއާ ބެހޭ ވުޒާރާއިން ހާމަކުރެއެވެ.
