ކޮމަންވެލްތް އެންޓަޕްރައިސް އެންޑް އިންވެސްޓްމަންޓް ކައުންސިލް (ސީޑަބްލިއުއީއައިސީ) އިން ރާއްޖޭގައި އާ ހަބް އޮފީހެއް ހުޅުވައި ކަންޓްރީ ޗެއާގެ މަގާމަށް ރައީސުލްޖުމްހޫރިއްޔާގެ ޕްރިންސިޕަލް އެޑްވައިޒަރު މުހައްމަދު އަލީ ޖަނާހު އައްޔަން ކޮށްފިއެވެ.
ޖަނާހަކީ ރާއްޖެ އާއި މެދުއިރުމަތީގެ އެކި ކަންކޮޅުތަކުގައި ހިންގާ ވިޔަފާރިތަކުގައި 30 އަހަރަށް ވުރެ ގިނަ ދުވަހުގެ ތަޖުރިބާ ލިބިވަަޑައިގެންފައިވާ ވިޔަފާރިވެރިއެއް އަދި ޑިވެލޮޕަރެކެވެ. އޭނާ އަކީ ހޮޓެލްސް އެންޑް ރިޒޯޓް ކޮންސްޓްރަކްޝަންގެ ޗެއާމަންކަމާއި، ކޮންސްޓްރަކްޝަން ޓެކްނޮލޮޖީ އާއި މެރިން ޕްރޮޑަކްޓްސް އަދި ހޮޓެލްސް އެންޑް ރިޒޯޓްސް އިންވެސްޓްމަންޓް މޯލްޑިވްސް (ހާރިމް) ގެ ގްރޫޕް ޗެއާމަންގެ މަގާމު ފުރުއްވަމުން ގެންދަވާ ބޭފުޅެކެވެ.
ހަބް އޮފީހަކީ ކޮމަންވެލްތުގެ ވިޔަފާރިތަކަށް ރާއްޖޭގައި ހުރި އިންވެސްޓްމަންޓާއި ވިޔަފާރީގެ ފުރުސަތުތައް ދެނެގަނެ، ސަރުކާރާއި ރާއްޖޭގެ ޕްރައިވެޓް ސެކްޓަރަށް ފުރުސަތުތައް ފަހިކޮށްދޭ ފޯކަލް ޕޮއިންޓެއްގެ ގޮތުގައި މަސައްކަތް ކުރާނެ އޮފީހެކެވެ. މީގެ އިތުރުން ކޮމަންވެލްތުގެ މެންބަރު 56 ގައުމެއްގައި ހުރި ތަފާތު އަދި ގިނަ ފުރުސަތުތައް ދެނެގަތުމަށް ބޭނުންވާ ދިވެހި ވިޔަފާރިތަކަށް ވެސް ހަބް އޮފީހުން އެހީތެރިކަން ފޯރުކޮށް ދޭނެއެވެ. މީގެ އިތުރުން އާ ހަބް އޮފީސް މެދުވެރިކޮށް ރާއްޖޭގެ ވިޔަފާރިތަކަށް ސީޑަބްލިއުއީއައިސީ ސްޓްރެޓެޖިކް ޕާޓްނަރުންގެ ގޮތުގައި އުފައްދައި، ކޮމަންވެލްތުގެ އެކި ކަންކޮޅުތަކުގައި އިވެންޓް ޑެލިގޭޝަންތަކާއި ޕްރޮގްރާމްތަކުގައި ބައިވެރިވުމުގެ ފުރުސަތު ލިބިގެން ދާނެ އެވެ.
ކޮމަންވެލްތު ބިޒްނަސް ފޯރަމް އަންނަ އޮކްޓޫބަރު މަހު ސަމޯއާގައި ބޭއްވުމަށް ހަމަޖެހިފައިވާ އިރު މި ދަނޑިވަޅުގައި ކޮމަންވެލްތްގެ އާ ހަބް އޮފީސް ހުޅުވިގެން ދިއުމަކީ ރާއްޖޭގެ ވިޔަފާރިވެރިންނަށް ރަނގަޅު ފުރުސަތުތަކެއް ލިބޭނެ ކަމެއްގެ ގޮތުގައި ސީޑަބްލިއުއީއައިސީ އިން ބުނެއެވެ.
