ފަލަސްތީނާ މެދު ދިވެހިން ބާއްވާ ގާތްކަމަށް އެގައުމުގެ ހެރިޓޭޖް މިނިސްޓަރު އިމާދު އަބްދުﷲ ހަމްދާން ދިވެހިންނަށް ޝުކުރު އަދާކުރައްވައިފިއެވެ.
އިމާދު އަބްދުﷲ މިފަދައިން ވިދާޅުވީ އިސްލާމިކް ވޯލްޑް އޮފް އެޑިއުކޭޝަނަލް، ސައިންޓިފިކް އެންޑް ކަލްޗަރަލް އޯގަނައިޒޭޝަން (އިސެސްކޯ) ގެ "ކަލްޗަރަލް ކެޕިޓަލް އޮފް ދަ އިސްލާމިކް ވޯލްޑް 2024" ގައި ދިވެހިރާއްޖޭގެ ހެރިޓޭޖް މިނިސްޓަރު އާދަމް ނަސީރު އިބްރާހީމް އަޒަރްބައިޖާނަށް ވަޑައިގެން މިނިސްޓަރު އިމާދު އަބްދުﷲ ހަމްދާން އާ ބައްދަލުކުރެއްވުމުގެ ތެރެއިންނެވެ.
ފަލަސްތީނުގެ ހެރިޓޭޖް މިނިސްޓަރު އިމާދު އަބްދުﷲ ވިދާޅުވީ ރާއްޖެއިން ފަލަސްތީނާމެދު ބާއްވާ ރަޙްމަތްތެރިކަމާއި ގުޅުމަށްޓަކައި ދިވެހީންނަށް ވަރަށް ހާއްސަ ޝުކުރެއް ދަންނަވާ ކަމަށާއި، މިނިސްޓަރު އާދަމް ނަސީރު އާއި ބައްދަލުވުމަކީ ލިބިވަޑައިގެންނެވި ވަރަށް ބޮޑު އުފަލެއް ކަމަށެވެ.
މި ބައްދަލުކުރުމުގައި އާދަމް ނަސީރު ވަނީ ފަލަސްތީނަކީ އދގެ ދާއީމީ މެންބަރަކަށް ވުމަށް ޝަރުތު ހަމަވާ ގައުމެއް ކަމަށް ފާސްކުރުމާ ގުޅިގެން ދިވެހީންގެ ފަރާތުން ފަލަސްތީނުގެ ރައްޔިތުންނަށް ތަހްނިޔާ ރައްދުކުރައްވާ ކަމަށާއި، ފަލަސްތީނާމެދު ޒަމާނުއްސުރެ އޮތް ގާތް ކަމަކީ ހުރިހާ ދިވެހީން ވެސް ހިއްސާ ކުރާ ގާތް ކަމެއް ކަމަށް ވިދާޅުވެފައެވެ.
ރައީސް ޑރ. މުހައްމަދު މުއިއްޒުވެސް ވަނީ އދގެ ދާއީމީ މެންބަރަކަށް ފަލަސްތީން ވުމަކީ ފަލަސްތީނުގެ ރައްޔިތުންނަށް އިންސާފު ހޯދައިދިނުމަށް ކުރަމުންދާ މަސައްކަތުގައި ލިބުނު ތާރީހީ ބޮޑު ކާމިޔާބީއެއް ކަމުގައި ވިދާޅުވެފައެވެ. އަދި ފަލަސްތީން ރައްޔިތުން މިނިވަން އަމިއްލަ ދައުލަތެއްގެ ހައްގު ހޯދުމަށް މަސައްކަތް ކުރާތާ އެތައް ދުވަހެއް ވެފައިވާ ކަމަށާއި އެ މަސައްކަތުގައި ފަލަސްތީން ރައްޔިތުންގެ ފަރާތުން ފެނިގެންދާ ކެތްތެރިކަމާއި ހިތްވަރަކީ ދިވެހީން ނަމޫނާ އަކަށް ދެކޭ ކަމެއް ކަމަށްވެސް ރައީސް ވަނީ ވިދާޅުވެފައެވެ.
