މަކަރާއި ހީލަތުން މީހުންގެ އަތުން ފައިސާ ހޯދި ފުލުހެއްގެ މައްސަލަ ފުލުހުންގެ އިދާރާއިން ތަހުގީގު ކުރަން ފަށައިފިއެވެ.
ސޯޝަލް މީޑިއާގެ އެކި މަންސަ ތަކުގައި ދައުރުވަމުންދާ ގޮތުގައި ސ. ފޭދޫއަށް ނިސްބަތްވާ އަލީ ހަނީފް ނަމަކަށްކިޔާ އެ މީހާ ވަނީ ރާއްޖެއިން ބޭރުން ކާރު ގެންނާނެ ކަމަށްބުނެ އެކި މީހުންގެ އަތުން މަކަރާއި ހީލަތުން އެޑްވާންސްގެ ގޮތުގައި ގިނައަދަދެއްގެ ފައިސާ ނަގާފައެވެ. އަދި އޭނާ މިހާރު މަސައްކަތް ކުރަމުންދަނީ ހުޅުމާލެ ޕޮލިސް ސްޓޭޝަންގައި ކަމަށް ސޯޝަލް މީޑިއާގެ ޕޯސްޓުގައި ވެއެވެ.
އެ މައްސަލައާ ގުޅިގެން ފުލުހުން ބުނީ މި ފުލުސް މީހާގެ މައްސަލަ ދިވެހި ފުލުހުންގެ ހިދުމަތުގެ ޕްރޮފެޝަނަލް ސްޓެންޑާޑްސް ކޮމާންޑް އިން ތަހުގީގުކުރަމުންދާ ކަމަށެވެ. ނަމަވެސް އެކަމާ ގުޅޭ އިތުރު އެއްވެސް މައުލޫމާތެއް ފުލުހުން ހިއްސާ ކޮށްފައި ނުވެއެވެ.
ދާދިފަހުން ވަނީ ވެހިކަލް ގެނެސްދޭނެ ކަމަށް ބުނެ މަކަރާއި ހީލަތުން އޮޅުވާލައިގެން ގިނަ ބައެއްގެ އަތުން ފައިސާ ހޯދާފައިވާ މެގަޓްރޯން މޮޓޯސް މޯލްޑިވްސް ވޭވް އިންޓަނޭޝަނަލްގެ މައްސަލަތަކެއްވެސް ފުލުހުން ބަލަން ފަށާފައެވެ.
ވެހިކަލް ގެނެސްދޭނެ ކަމަށް ބުނެ މީހުންގެ އަތުން ފައިސާ ނަގާ ވެހިކަލް ނުގެނެސްދީ ހުރި މިފަދަ މައްސަލަތައް މީގެ ކުރިން ތަހުގީގުކޮށް، ކޯޓުން ހުކުމްކޮށްފައިވެސް އެބަހުއްޓެވެ. އޭގެ ތެރޭގައި ބަގީއާއި ޕިކަޕް ކާރު ފަދަ ތަކެތި ގެެނެސްދޭނެ ކަމަށް ބުނެ ފައިސާ ނަގާ އޮޅުވާލާފައި ހުރި މައްސަލަތައް ހިމެނެއެވެ.
މަކަރާއި ހީލަތުން މީހުންގެ އަތުން ފައިސާ އާއި މުދާ ހޯދާ މިންވަރު ރާއްޖޭގައި އިތުރުވެފައިވާއިރު މިދިޔަ އަހަރުގެ ފަހުކޮޅުން ފެށިގެން މިއަހަރުގެ ޖެނުއަރީގެ ނިޔަލަށް ސްކޭމްގެ އެކި މައްސަލަތަކުގައި 27 މިލިއަން ރުފިޔާ އާންމުން އަތުން ގެއްލިފައިވާ ކަމަށް ފުލުހުން ވަނީ ދާދިފަހުން މައުލޫމާތު ދީފައެވެ.
