އއ. އުކުޅަހުގައި 17 އަހަރުގެ ކުއްޖަކު ސައިކަލުން ވެއްޓި ސީރިއަސް އަނިޔާތަކެއް ވެއްޖެއެވެ.
ފުލުހުން ބުނީ، އުކުޅަސް ހިއްކި ސަރަަހައްދުން ދުއްވާފައި ދިޔަ ސައިކަލެއް ކޮންޓްރޯލް ނުކުރެވި ވެއްޓިގެން އެ ސައިކަލު ދުއްވަން އިން މީހާއަށް އަނިޔާވެފައިވާ ކަމުގެ މައުލޫމާތު މިއަދު މެންދުރު ފަހު 2:30 ހާއިރު ލިބިފައިވާ ކަމަށެވެ.
މި އެކްސިޑެންޓްގައި އަނިޔާވެފައި ވަނީ އުމުރުން 17 އަހަރުގެ ފިރިހެން ކުއްޖަކަށް ކަމަށާއި އަނިޔާ ވުމާ އެކު އެ ރަށުގެ ސިއްހީ މަރުކަޒަށް އެ ކުއްޖާ ގެންގޮސް ފަރުވާ ދެމުންދާ ކަމަށް ފުލުހުން ބުނެއެވެ. ސިއްހީ މަރުކަޒާ ހަވާލާދީ ފުލުހުން ބުނީ، އެ ކުއްޖާގެ ހާލު ސީރިއަސް ކަމަށެވެ. ނަމަވެސް ލިބިފައިވާ އަނިޔާތަކުގެ ތަފްސީލެއް ފުލުހުން ހާމައެއް ނުކުރެއެވެ.
ފުލުހުން ބުނީ މި ހާދިސާއާ ގުޅިގެން ބަލަންޖެހޭ ކަންކަން ބަލަމުން އަންނަ ކަމަށެވެ.
