ފުލުހުންގެ ޑްރަގް އެންފޯސްމެންޓް ޑިޕާޓްމަންޓުން ހުޅުމާލޭގެ ފުރަތަމަ ފިޔަވަހީގައި ހިންގި އޮޕަރޭޝަންގައި މަސްތުވާތަކެއްޗާ އެކު ހައްޔަރު ކުރި 8 މީހުންގެ ބަންދުގެ މުއްދަތު ޖަހައިފިއެވެ.
މި މައްސަލައިގައި ފުލުހުން ހައްޔަރު ކޮށްފައި ވަނީ 7 ފިރިހެނުންނާއި އަންހެނެކެވެ. މި މީހުންގެ އުމުރާއި އަދި މި މީހުންނާއެކު އަތުލައިގެން މަސްތުވާތަކެތީގެ ތަފްސީލް އަދި މިހާތަނަށް އައި އިރު ފުލުހުން ހާމަ ކޮށްފައެއް ނުވެއެވެ.
މި މައްސަލައާ ގުޅީގެން ހައްޔަރު ކުރި މީހުންގެ ބަންދާ މެދު ގޮތެއް ނިންމުމަށް ކޯތަށް ހާޒިރު ކުރުމުން ވަނީ އެމީހުންގެ ބަންދުގެ މުއްދަތު ޖަހާފައެވެ. އެ ގޮތުން 7 މީހެއްގެ ބަންދަށް 7 ދުވަސް ޖަހާފައިވާ ކަމަށާއި އެކަކުގެ ބަންދަށް 3 ދުވަސް ޖަހާފައިވާ ކަމަށް ފުލުހުން ބުނެއެވެ.
މި މައްސަލަ އަދިވެސް ފުލުހުން ދަނީ ތަހުގީގު ކުރަމުން ކަމަށް ބުނެއެވެ.
މި އަހަރު ތެރޭ މަސްތުވާތަކެތި އަތުލައިގަތުމަށް 56 އޮޕަރޭޝަން ހިންގާފައިވާ އިރު، މިދިޔަ މަހުގެ ތެރޭގައި ކޯޓު އަމުރުގެ ދަށުން ވަނީ 12 އޮޕަރޭޝަން ހިންގާފައެވެ. ހަަމައެއާއެކު މި އަހަރު ތެރޭ 13 އުޅަނދެއް ބަލައި ފާސްކޮށްފައިވާ އިރު މިދިޔަ މަހުތެރޭ 5 އުޅަނދެއް ވަނީ ބަލައި ފާސްކޮށްފައެވެ. އަދި މިއަހަރުތެރޭ 5 ކާޓެލް ބަންދުކޮށްފައިވާ އިރު މިދިޔަ މަހުގެ ތެރޭގައި ވަނީ 2 ކާޓެލް ބަންދުކޮށްފައެވެ.
