އޭޝިއާ ޕެސިފިކް އިކޮނޮމީ ބްލޫ ފޯރަމް ރާއްޖޭގައި ބާއްވަން ނިންމައިފިއެވެ.
އެކަމާ ގުޅިގެން އިކޮނޮމިކް މިނިސްޓަރު މުހައްމަދު ސައީދު ވިދާޅުވީ އެ ފޯރަމް ރާއްޖޭގައި ބާއްވަން ލިބުމުން އެކަމާ މެދު ފަހުރުވެވަޑައިގެންނަވާ ކަމަށެވެ. އަދި ކްލައިމެޓް ފައިނޭންސް ނެޓްވޯކް (ސީއެފްއެން) ގެ ގައުމުތަކުން އިސްވެރިން އެ ފޯރަމްގައި ބައިވެރިވެވަޑައިގަންނަވާކަން ފާހަގަކުރައްވާ އެކަމަށްޓަކައި މިނިސްޓަރު ވަނީ މަރުހަބާ ވިދާޅުވެފައެެވެ.
ސައީދު އިތުރަށް ވިދާޅުވީ އެ ފޯރަމްގައި މުހިއްމު ނިންމުންތަކެއް ނިންމަވާނެ ކަމަށެވެ.
އޭޝިއާ ޕެސިފިކް އިކޮނޮމީ ބްލޫ ފޯރަމް ރާއްޖޭގައި ބާއްވަނީ އިކޮނޮމިކް މިނިސްޓްރީއާއި ޔޫއެންޑީޕީގެ ކްލައިމެޓް ފައިނޭންސް ނެޓްވޯކުގެ އިތުރުން އިނގިރޭސިވިލާތުގެ ފޮރިން ކޮމަންވެލްތު އެންޑް ޑިވަލޮޕްމެންޓް އޮފީސް ގުޅިގެންނެވެ.
މާދަމާއަދި މި ހަފްތާ އަންގާރަ ދުވަހު ބާއްވާ އެ ފޯރަމްއަކީ ކަނޑުގެ ވަސީލަތްތައް ދެމެހެއްޓެނިވި ގޮތެއްގައި ބޭނުންކޮށްގެން ވަޒީފާ އުފެއްދުމާއި ދިރިއުޅުން ރަނގަޅުކުރުމާއި ކަނޑުގެ ދިރުންތައް ރައްކާތެރިކޮށް އިގުތިސާދީ ކުރިއެރުމަށް އެހީތެރިވުމަށް ކުރިއަށް ގެންދާ މުހިއްމު ފޯރަމެކެވެ.
