ސަރުކާރުގެ ލެޖިސްލޭޓިވް އެޖެންޑާގެ ތެރޭގައި ހިމެނިގެން މޯލްޑިވްސް ބްރޯޑްކާސްޓިން ކޮމިޝަނާއި (ބްރޯޑްކޮމް) މޯލްޑިވްސް މީޑިއާ ކައުންސިލް (އެމްއެމްސީ) އެއް ގާނޫނަކުން ފުރިހަމަ ކުރެވިފައިވާ މުއައްސަސާ އަކަށް ހެދުމުގެ މަސައްކަތް ފެށިފައި ވާ ކަމަށް ސަރުކާރުން ބުނެފިއެވެ.
މިއަދު ފާހަގަ ކުރަމުން ދާ ނުސްވެރިކަމުގެ މިނިވަން ދުވަހުގެ މުނާސަބަތުގައި ޔޫތު މިނިސްޓަރު އިބްރާހިމް ވަހީދު (އަސްވާޑު) ދެއްވި ހިތާބުގައި ވިދާޅުވީ، މިނިވަން ނޫސްވެރިކަން ފުރިހަމަ ކުރުމަށް ގާނޫނީ އިމުގެ ތެރެއިން ގެންނަން ހުރި ބަދަލުތައް ގެނައުމުގެ މަސައްކަތް ސަރުކާރުގެ ލެޖިސްލޭޓިވް އެޖެންޑާގެ ތެރޭގައި ހިމެނިގެން ކުރިއަށް ދާ ކަމަށާއި އޭގެ އެއް މަސައްކަތަކީ ބްރޯޑްކޮމް އާއި އެމްއެމްސީ އެއްކޮށްލުން ކަމަށެވެ.
ޒިންމާދާރުކަމާއި މިނިވަންކަމާއެކު ނޫސްވެރިކަން ކުރާނެ މިނިވަން މާހައުލެއް ރާއްޖޭގައި ގާއިމު ކޮށްދެއްވާނެ ކަމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު ވިދާޅުވެފައި ވާކަން ފާހަގަ ކުރައްވައި އަސްވާޑް ވިދާޅުވީ، ނޫސްވެރިންނަށް ކުރިމަތިވާ ގޮންޖެހުންތައް ނައްތަވާލައްވާނެ ކަމަށާއި މިނިވަންކަން ޔަގީން ކޮށްދީ، ނޫސްވެރިންނަށް ފަހި މާހައުލެއް ގާއިމު ކޮށްދިނުމަށް ސަރުކާރުން ގިނަ މަސައްކަތްތަކެއް ކުރާނެ ކަމަށެވެ. އެގޮތުން ކުރަން ނިންމާފައި ވާ ކަންތައްތަކުގެ ތެރޭގައި ހިމެނޭ މީޑިއާ ވިލެޖްގެ މަސައްކަތް މިހާރު ވަނީ ވަޒީރުންގެ މަޖިލީހުން ނިންމާ، އަމަލީ މަސައްކަތާ ހަމައަށް ދިޔުމުގެ މަގުމަތީގައި ކަމަށް ވިދާޅުވިއެވެ.
އަދި ނޫސްވެރިކަން ކުރިއެރުވުމަށް ދައުލަތުގެ ބަޖެޓުން މަގުފަހި ކުރުމަށްޓަކައި ކުރަން ޖެހޭ ކަންކަންވެސް ފުރިހަމަ ކުރަމުން ދާކަން އޭނާ ފާހަގަ ކުރެއްވިއެވެ.
މިއަދާ ގުޅިގެން ރައީސް ޑރ. މުއިއްޒު ދެއްވި ހިތާބުގައި، ރާއްޖޭގައި ނޫސްވެރިކަމުގެ ދާއިރާއަށް އޮތް އެންމެ ބޮޑު ގޮންޖެހުމަކީ، ލިބޭ އެއްޗަކުން ދެކޮޅު ޖެހޭނެ އާމުދަނީއެއް ހޯދަން އޮތް ދަތިކަން ކަމުގައި ފާހަގަ ކުރައްވައި، ދައުލަތުގެ ބަޖެޓުން ނޫސްމީޑިއާތަކަށް ކަނޑައެޅޭ ވަކި އިނާޔަތެއް ދިނުމަށް ސަރުކާރުގެ ސިޔާސަތު ތަކަށް ތާއީދުކުރާ ރައްޔިތުންގެ މަޖިލީހަކާއެކު ހަގީގަތަކަށް ހައްދަވާނެކަމަށް ވިދާޅުވިއެވެ.
ނޫސް މަޖައްލާ ރަޖިސްތްރީ ކުރުމުގައި ހުރި ދަތިތައް ހައްލުކޮށް ބޮޑޮތަނުން އަވަސް ކުރެވިފައި ވާކަން ފާހަގަ ކުރައްވައި އަސްވާޑް ވިދާޅުވެފައި ވަނީ، ނޫސްވެރިކަމުގެ ދާއިރާއަށް މީހުން އަހުލުވެރި ކުރުވުމަށާއި ނޫސްވެރިކަމުގެ ދާއިރާއިން މަތީ ތައުލީމާއި ތަމްރީނުގެ ފުރުސަތުތައް ފަހިކޮށް ދިނުމަށް ވެސް ސަރުކާރުން ގެންދަނީ މަސައްކަތް ކުރަމުން ކަމަށެވެ.
މިއަދުގެ ހިތާބުގައި އޭނާ ވަނީ، މިނިވަން ނޫސްވެރިކަމަކީ ޒިންމާދާރު ކަމާއެކު ހަބަރާއި މައުލޫމާތު ފެތުރުން ކަމުގައި ވާ އިރު، ދިވެހި ކޮންމެ ނޫސްވެރިއަކީ އެ މަސްއޫލިއްޔަތު އެންމެ ޒިންމާދާރު ކަމާއެކު އަދާކުރާ ނޫސްވެރިއަކަށް ވުމަށް ގޮވާލައްވާފައެވެ.
ބަވަނަވެފައިވާ މި ދުނިޔޭގައި ޕްރިންޓް އަދި ބްރޯޑްކާސްޓް މީޑިއާ އަށް ވުރެ އޮންލައިން މީޑިއާގެ ދައުރު ފުޅާވަމުން ދާއިރު، އެ ޒަރީއާއިން ފެތުރެމުން ދަނީ ފޭރާން ހެޔޮ ތެދު މައުލޫމާތުކަން، ކަށަވަރު ކުރުމަކީ ޒިންމާދާރު ނޫސްވެރި ކަމަކަށް މުހިންމު ކަމެެއް ކަމުގައި ވިދާޅުވެ، އެފަދަ ޒަރީއާތަކުގައި ހަބަރާއި މައުލޫމާތު ފަތުރާ ފަރާތްތަކުން ވެސް ޒިންމާދާރުވެ ސާބިތު ނުހިފޭ ވާހަކަތައް ފެތުރުމުން ރައްކާތެރި ވުމަށް ގޮވާލެއްވިއެވެ.
އަދި ރާއްޖޭގެ އެއްވެސް ނޫސް މީޑިއާކަށް ނުވަތަ ނޫސްވެރިއަކަށް އިންޒާރުދީ ނުރައްކަލުގެ ތެރެއަށް ހުށަހެޅުމަކީ ސަރުކާރުން އަޅާނުލައި ދޫކޮށްލާނެ ކަމެއް ނޫންކަމަށް ވެސް ވިދާޅުވެފައި ވެއެވެ. ފާޅުގައިވެސް އަދި ފޮރުވިގެންތިބެވެސް ރާއްޖޭގެ ނޫސްވެރިކަމަށް ދެވޭ އިންޒާރު ތަކަކީ އެންމެ ސީރިއަސްކޮށް ނަގާނެ ކަންކަން ކަމާއި، މި ވެރިކަން ވެގެންދާނީ ނޫސްވެރިކަމަށް އަމާން އަދި ރައްކާތެރި ދުވަސްތަކަކަށް ކަމުގެ އޭނާ ވަނީ ވިދާޅުވެފައެވެ.
