ހައްޖުގެ އަޅުކަމާއި އުމުރާގެ އަޅުކަން އަދާކުރުމަށް ދާ ފަރާތްތަކަށް ޕޯސްޓު މެދުވެރިކޮށް ސައުދި އަރަބިއްޔާއިން ރާއްޖެއަށް ޕެކޭޖް ފޮނުވުމުގެ ހިދުމަތް މޯލްޑިވްސް ޕޯސްޓުން ތައާރަފްކޮށްފިއެވެ.
ޕޯސްޓު އޮފީހާއި އިތުރު އިދާރާތައް ގުޅިގެން މިއަދު ބޭއްވި ނޫސްވެރިންގެ ބައްދަލުވުމުގައި އެ އޮފީހުގެ ފަރާތުން މުހައްމަދު ޝަފީގް ވިދާޅުވީ، ހައްޖުވެރިންނާއި އުމްރާވެރިން ބޭނުންވާ ތަކެތި ސައުދީ ޕޯސްޓު މެދުވެރިކޮށް ރާއްޖެއަށް ގެނައުމުގެ ހިދުމަތް ތައާރަފު ކުރުމުގެ މަސައްކަތް ކުރަމުން އަންނަ ކަމަށެވެ. އެގޮތުން އެކަމަށް ބޭނުންވާ އެއްބަސްވުމުގައި މިހާރު ސޮއިކޮށްފައިވާ ކަމަށް ވިދާޅުވި އެވެ.
އޭގެ އެންމެ ބޮޑު ބޭނުމަކީ އެކްސެސް ލަގެޖްގެ ސަބަބުން، އަޅުކަމަށް ފަހު ރާއްޖެ ގެންނަން ބޭނުންވާ ތަކެތި ގެނައުމަށް ހުންނަ ދަތިތައް ހައްލުކުރުން ކަމަށް ޕޯސްޓުން ބުނެއެވެ. "އަޅުގަނޑުމެން މިހާރު ސައުދީ ޕޯސްޓާ އެކުގަ ގުޅުންތަކެއް ގާއިމްކުރެވިއްޖެ. އޭގެ ތެރޭގައި ހައްޖާއި އުމްރާވެރިންނަށް ގެންނަން ބޭނުންވާ ތަކެތި ސައުދީ ޕޯސްޓު މެދުވެރިކޮށް ރާއްޖެ ގެނައުމުގެ ހިދުމަތް އަޅުގަނޑުމެން މިހާރު މި ތައާރަފުކުރަނީ،" ޝަފީގް ވިދާޅުވި އެވެ.
މި އެއްބަސްވުމާއެކު ކޮންމެ ހައްޖުވެރިއަކަށް އަދި އުމްރާވެރިއަކަށް 30 ކިލޯގެ ބަރުދަން ހުރި ޕެކޭޖެއް ސައުދީ ޕޯސްޓު މެދުވެރިކޮށް ފޮނުވޭނެ ކަމަށް ޕޯސްޓުން މައުލޫމާތު ދިނެވެ. "ކޮންމެ ފަރާތަކަށްވެސް 30 ކިލޯގެ ބަރުދަން ހުރި ޕެކޭޖެއް ޕޯސްޓު މެދުވެރުކޮށް ފޮނުވޭނެ. އަގުތަކަށް ބަލާއިރު، ކޮމާޝިއަލް އެއާލައިންތަކުން ނަގާ އަގުތަކަށްވުރެ ވަރަށް ހެޔޮ އަގުތަކެއްގަ ޕޯސްޓު ފޮނުވޭނެ،" ޝަފީގް ވިދާޅުވިއެވެ.
އެކަމަގު އަގުތައް މިހާތަނަށް ކަނޑައަޅާފައިނުވި ނަމަވެސް އަގުތަކުގެ އިތުރުން ފޮނުވާތަކެތި ނެގޭނެ ސަރަހައްދުތައް ހައްޖު ކޯޕަރޭޝަން މެދުވެރިކޮށް ކަނޑައެޅުނުހާ އަވަހަށް އެ މައުލޫމާތުތައް ހިއްސާ ކުރާނެ ކަމަށް ޕޯސްޓުން ބުންޏެވެ.
"ސައުދީ ޕޯސްޓާ ގުޅިގެން މަސައްކަތް ކުރަމުން އެބަދަން އެބޭފުޅުންނަށް ފަސޭހަ ލޮކޭޝަންތަކެއްގަ އެ ހިދުމަތް ލިބޭނެ އިންތިޒާމުތައް ހަމަޖެއްސުމަށް. އެހެންވީމަ ހައްޖުގެ ޕްރައިވެޓް ސެކްޓާ އޮޕަރޭޓްކުރާ ފަރާތްތަކާ ގުޅިގެން އަޅުގަނޑުމެން ފަހުން އެ މައުލޫމާތު އަރުވާނަން" ޝަފީގް ވިދާޅުވިއެވެ.
