ރިޔާސީ ގަނޑުވަރު، މުލިއާގެ މަރާމާތުކޮށް ނިމެންދެން ރައީސް ޑރ. މުހައްމަދު މުއިއްޒު ދިރިއުޅުއްވާނީ އެމަނިކުފާނުގެ އަމިއްލަ ގެކޮޅު، މ. ދިމްޔާތުގައި ކަމަށް ސަރުކާރުން ބުނެފިއެވެ.
މައުލޫމާތު ލިބިފައިވާ ގޮތުގައި މުލިއާގޭގައި މިހާރު އިތުރު ދެ ކޮޓަރި ހެދުމުގެ މަސައްކަތް ދަނީ ކުރަމުންނެވެ. އެ މަސައްކަތަށް ދެ މަހެއްހާ ދުވަސް ހޭދަވާނެ ކަމަށް ސަރުކާރުން ލަފާކުރެއެވެ. އަދި ހިލާލީގޭގައިވެސް މަރާމާތުގެ މަސައްކަތްތަކެއް ކުރައްވަމުން ގެންދަވާތީ ނައިބު ރައީސް ހުސައިން މުހައްމަދު ލަތީފުވެސް ދިރިއުޅުއްވަމުން ގެންދަވަނީ އަމިއްލަ ގެކޮޅުގައެވެ.
ކުރީގެ ރައީސް އިބްރާހިމް މުހައްމަދު ސޯލިހުގެ ދެކަނބަލުން މުލިއާގެ ދޫކުރައްވާ އަމިއްލަ ގެކޮޅަަކަށް ދިރިއުޅުން ބަދަލު ކުރައްވާފައިވަނީ މި މަހުގެ 10 ވަނަ ދުވަހުއެވެ.
ކުރީގެ ރައީސް ސޯލިހާއި އަނބިކަނބަލުން ފަޒްނާ މުލިއާގެއަށް ދިރިއުޅުން ބަދަލުކުރެއްވީ ނޮވެމްބަރު 30, 2018 ގައެވެ. ކުރީގެ ރައީސް ސޯލިހުގެ ދެކަނބަލުން މުލިއާއިން މ. ސަނީއަށް ބަދަލުވެވަޑައިގެންނެވީ ރައީސުލްޖުމްހޫރިއްޔާގެ މަގާމުގެ ދައުރު ހަމަވާން ކައިރިވުމާއެކުގައެވެ.
ރައީސުލްޖުމްހޫރީއްޔާ ދެކަނބަލުންނަށް ހާއްސަ ކޮށްފައި ހުންނަ ދައުލަތުގެ ގެކޮޅެކެވެ. މުލީއާގެ އިމާރާތްކޮށްފައިވަނީ މީގެ 104 އަހަރު ކުރިން އައްސުލްތާން މުހައްމަދު ޝަމްސުއްދީންގެ ވެރިކަމުގައެވެ. ކުރީގެ ރައީސް މައުމޫން އަބްދުއްގައްޔޫމް ވެސް ވަނީ އެބޭބޭފުޅުންގެ ރައީސުލްޖުމްހޫރިއްޔާ ކަމުގައި އެ ގެކޮޅުގައި ދިރިއުޅުއްވާފައެވެ. އަދި ކުރީގެ ރައީސް އަބްދުﷲ ޔާމީން ވެސް ވެރިކަމުގެ ފަހު ދުވަސްކޮޅު އެ ގެކޮޅުގައި އުޅުއްވިއެެވެ. އޭގެ ކުރިން އެ މަނިކުފާނު ދިރިއުޅުއްވީ އަމިއްލަ ގެކޮޅުގައެވެ.
