އާ ސަރުކާރަށް ބައިނަލްއަގްވާމީ މުޖުތަމައު އިން ދެމުންދާ އެއްބާރުލުން ފެނިވަޑައިގެން އެކަމާ އުފާކުރައްވާ ކަމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު ވިދާޅުވެއްޖެއެވެ.
މުއިއްޒު މިހެން ވިދާޅުވީ، މިއަދު އެމަނިކުފާނު ހުވާ ކުރެއްވުމަށް ބޭއްވި ރަސްމިޔާތުގައި ބައިވެރިވި ބައިނަލްއަގްވާމީ ފަރާތްތައް ފާހަގަ ކުރައްވަމުން އެކްސަގައި ކުރެއްވި ޕޯސްޓެއްގައެވެ.
ރައީސް މުއިއްޒު ވިދާޅުވީ، މިއަދު ހުވާކުރެއްވުމުގެ ރަސްމިއްޔާތުގައި ބައިވެރިވެ ވަޑައިގެންނެވި 49 ގައުމަކުންނާއި ބައިނަލްއަގްވާމީ ގިނަ ޖަމްޢިއްޔާ، ޖަމާޢަތްތަކުން ވަނީ 190 އަށް ވުރެ ގިނަ މަންދޫބުން ވަޑައިގެންފައި ކަމަށެވެ. އެ ފަރާތްތަކަށް މުއިއްޒު ވަނީ ވަރަށް އިހްލާސްތެރިކަމާ އެކު ޝުކުރު އަދާ ކުރައްވާފައެވެ.
އާ ސަރުކާރަށް ބައިނަލްއަގްވާމީ މުޖުތަމައުން ދޭ އެއްބާރުލުމާ މެދު އުފާކުރައްވާ ކަމަށާއި ގުޅުން ބަދަހި ކުރުމުގެ ސިޔާސަތަކަށް އަޒުމް ކަނޑައަޅުއްވައިގެން ހުންނެވި ކަމަށް މުއިއްޒު ވިދާޅުވިއެވެ.
މިއަދު ހަވީރު ޖުމްހޫރީ މައިދާނުގައި ބޭއްވި ރަސްމިއްޔާތުގައި ހުވާ ކުރެއްވުމަށް ފަހު މުއިއްޒު ވަނީ ހިތާބެއް ދެއްވާފައެވެ. އެ ހިތާބުގައި ރައީސް ވިދާޅުވީ، ދިވެހި ސަރުކާރުގެ ސިޔާސަތު ބިނާވާން ވާނީ، ދިވެހި ރައްޔިތުންނަށް އެންމެ މަސްލަހަތު ހުރި ގޮތުގެ މައްޗަށް ކަމަށެވެ. އެހެންކަމުން، ދިވެހި ގައުމަށާއި، ދިވެހި ރައްޔިތުންނަށް ވުރެ ބޮޑަށް އެމަނިކުފާނު އެހެން އެއްވެސް ގައުމަކަށް އިސްކަން ނުދެއްވާނެކަން ވަނީ ހާމަކުރައްވާފައެވެ.
ނަމަވެސް އަވަށްޓެރީންނާއި، ދުރު ހިސާބުތަކުގެ ގައުމުތަކަށް ވެސް އިހްތިރާމް ކުރައްވާނެ ކަމަށާއި، ގައުމުތަކާއެކު ރަހްމަތްތެރި ގުޅުން ވެސް ބާއްވަވާނެ ކަމަށް ރައީސް ވިދާޅުވިއެވެ. އަދި އެހެން ގައުމުތަކުގެ މިނިވަން ކަމާއި، ސިޔާދަތީ އިމަށް، ދިވެހި ދައުލަތުން ފުރިހަމައަށް އިހްތިރާމް ކުރާނެ ކަމުގައި ވިދާޅުވަމުން ރައީސް ވަނީ، ހަމަ މިފަދައިން ދިވެހި ދައުލަތުގެ ސިޔާދަތީ އިން ރައްކާތެރި ކުރުމުގެ ހައްގު އޮންނަންވާނެ ކަން ވެސް ފާހަގަ ކުރައްވާފައެވެ.
