އެއްވެސް މީހަކާމެދު ހަސަދަވެރިކަމެއް ނޫނީ ނަފްރަތެއް ނޫނީ ބަދަލުހިފުމުގެ ރޫހެއް ނުވަތަ އެފަދަ އެއްވެސް ކަމެއް އިންތިހާބީ ރައީސް ޑރ. މުހައްމަދު މުއިއްޒު ނުގެންގުޅުއްވާނެ ކަމަށް އެމަނިކުފާނުގެ އަނބިކަނބަލުން ސާޖިދާ މުހައްމަދު ވިދާޅުވެއްޖެއެވެ.

މިއަދު ފާހަގަކުރާ ޖުމްހޫރީ ދުވަހުގެ މުނާސަބަތުގައި ޓީވީއެމްއިން ކުރިއަށްގެންދިޔަ "ދިވެހީންގެ ރާއްޖެ" ޕްރޮގްރާމްއަށް ދެއްވި އިންޓަވިއުއެއްގައި ސާޖިދާ ވިދާޅުވީ މިހާތަނަށް މުއިއްޒު ފެނިގެން ދިޔައީ ހަގީގަތުގައިވެސް އެއްޗެއް ވިދާޅުވެއްޖެނަމަ އެކަމެއް ކުރައްވާ ބޭފުޅެއްގެ ގޮތުގައި ކަމަށާއި ވައުދެއް ވެއްޖެނަމަ ކޮންމެހެންވެސް އެކަމެއް ކުރެއްވޭތޯ މަސައްކަތް ކުރައްވާނެ ކަމަށެވެ.

ސާޖިދާ ވިދާޅުވީ ދައުލަތުގެ މާލީ ހާލަތު ހުރި މިންވަރަކުން މުއިއްޒު ވިދާޅުވި ކަންކަން ކޮށްދެއްވާނެ ކަމަށާއި އެކަންކަން ކުރުމަށްޓަކައި ކުރެވޭނެ ހުރިހާ ކަމެއްވެސް ކޮށްދެއްވާނެ ކަމަށެވެ. އަދި އެންމެ ކުރީގައިވެސް މަސައްކަތުގެ ދާއިރާގައިވެސް މުއިއްޒަކީ ވަރަށް ޑިޓަމިނޭޝަން އަދި ވަރަށް ކޮމިޓެޑް ބޭފުޅެއް ކަމަށް ސާޖިދާ ވަނީ ސިފަކުރައްވާފައެވެ.

ސާޖިދާ ވިދާޅުވީ އެކަމާ އެކީގައި އެއަށްވުރެ ބޮޑު މަސައްކަތަށް އައުމުން އެކަން ކުރައްވާނެ ކަން ޔަގީން ކަމަށާއި މުޅި ހަޔާތުގައިވެސް މުއިއްޒު ވަރުގެ ކެތްތެރި ބޭފުޅަކު ފެނިވަޑައި ނުގަންނަވާ ކަމަށެވެ. އަދި ކުރިއެރުމުގެ އަސްލަކީވެސް ކެތްތެރިވުން ކަމަށާއި ކޮންމެ ކަމެއްގައިވެސް ވަރަށް ކެތްތެރި ބޭފުޅެއްގެ ގޮތުގައި މުއިއްޒު ފެނިވަޑައިގަންނަވާ ކަމަށް ސާޖިދާ ވިދާޅުވިއެވެ.

ސާޖިދާ ވިދާޅުވީ ވަރަށް މަޑުމައިތިކަމާއި ވިސްނުންތެރިކާމާއެކު ކަންކަމުގައި އެކަންކަމާ ގުޅޭ ބޭފުޅުންނާއެކީ މަޝްވަރާކޮށް އެކަންކަން ކުރިއަށްގެންދަވާނެ ކަމަށާއި ކަންކަން ނިންމަވާނީ އެންމެންގެ މަޝްވަރާއާއެކު ކަމަށެވެ.

ޑރ. މުއިއްޒުއަކީ ތުއްޕުޅުއިރުން ފެށިގެންވެސް މައިންބަފައިންގެ ބަސްއަހާ އެއްވެސް އިރަކު އެއްވެސް މީހެއްގެ ހައްގަކަށް އަރުއްވާނެ ބޭފުޅެއް ނޫންކަމަށް ފާހަގަކުރައްވަމުން ސާޖިދާ ވިދާޅުވީ ޑރ. މުއިއްޒަށް އެހެން މީހަކު އިހާނެތި ކަމެއް ކުރިނަމަވެސް އެ މީހަކާމެދުވެސް ބަދަލު ހިފުމުގެ ރޫހެއް ނުގެންގުޅުއްވާނެ ކަމަށެވެ.

ސާޖިދާ ވިދާޅުވީ ޔަގީނުންވެސް މުއިއްޒު މީހަކަށް ބަދަލު ނުހިފާނެ ކަމަށާއި އެކަހަލަ ވިސްނުންފުޅެއްވެސް ނުކުރައްވާނެ ކަމަށެވެ.

ހަބަރު ޑރ. މުހައްމަދު މުއިއްޒު